ព្រិលចាប់ផ្តើមធ្លាក់កាលពីយប់ថ្ងៃពុធ ទី១៦ មីនា ដោយគ្របដណ្តប់នៅលើផ្ទៃដីកម្រាស់ចាប់ពី២,៥សង្ទីម៉ែត្រឡើង ធ្វើឱ្យមានការភ្ញាក់ផ្អើលដល់ភ្ញៀវទេសចរទាំងជនជាតិវៀតណាម និងបរទេស ដែលធ្វើទស្សនកិច្ចក្នុងខេត្តឡាវកាយ ប្រទេសវៀតណាម ។
គួរបញ្ជាក់ថា នៅឆ្នាំ២០០៧ ក៏ធ្លាប់មានព្រិលធ្លាក់ដែរ ប៉ុន្តែវាគ្រាន់តែជាប្រភេទទឹកសន្សើមកករឹងនៅលើស្លឹកឈើ និងស្មៅប៉ុណ្ណោះ ។ ដោយឡែកនៅក្នុងខែមករា ឆ្នាំ២០១១ ក៏កើតមានបាតុភូតទឹកសន្សើមកករឹងគ្របដណ្តប់នៅទូទាំងទីក្រុងសាប៉ាម្តងទៀត ក្រោមសម្ពាធអាកាសធាតុដ៏ត្រជាក់ ប៉ុន្តែក្នុងពេលបច្ចុប្បន្នក៏មានព្រិលចាប់ធ្លាក់យ៉ាងជាក់ស្តែង ។
មជ្ឈមណ្ឌលឧតុនិយមនៅក្រុងហាណូយបានក្រើនរំឭកដល់ភ្ញៀវទេសចរ កាលពីចុងសប្តាហ៍កន្លងមក ទាក់ទិននឹងអាកាសធាតុត្រជាក់ និងការដែលមានអាកាសជាតុត្រជាក់មួយដំណាក់កាលទៀត ដែលមានរយៈពេលពី៣ទៅ៤ថ្ងៃ ខណៈពេលនៅភាគខាងត្បូង ក៏មានភ្លៀងធ្លាក់ និងសមុទ្រនៅភាគខាងកើតមានរលកខ្ពស់ និងខ្យល់ខ្លាំង ។
សីតុណ្ហភាពនៅទីក្រុងហាណូយធ្លាក់ចុះដល់១១អង្សាសេ នៅថ្ងៃពុធ ទី១៦ មីនា ហើយរំពឹងថា នឹងធ្លាក់ដល់៩អង្សាសេ នៅពេលយប់ ។ អ្នកព្យាករណ៍អាកាសធាតុថ្លែងថា អាកាសធាតុដ៏ត្រជាក់លើកនេះ គឺជាលើកដំបូងចាប់តាំងពីអំឡុងពេលបុណ្យចូលឆ្នាំចិន នាដើមខែកុម្ភៈកន្លងទៅ ប៉ុន្តែកើតឡើងតែប៉ុន្មានថ្ងៃប៉ុណ្ណោះ ខណៈពេលនៅភាគខាងជើង និងភាគកណ្តាលវៀតណាមកំពុងប្តូរពីរដូវផ្ការីកចូលទៅរដូវក្តៅ ៕
ចែករំលែកព័តមាននេះ