ភ្នំពេញ៖ រាជរដ្ឋាភិបាលកម្ពុជា បានប្រកាសបើកទទួលទេសចរអន្តរជាតិឡើងវិញ ក្រោមទម្រង់ជា «ទេសចរណ៍វ៉ាក់សាំង» ដោយចាប់ផ្តើមមុនគេ នៅក្រុងព្រះសីហនុ ក្រុងកោះរ៉ុង ក្នុងខេត្តព្រះសីហនុ និងនៅតារាសាគរ…
ភ្នំពេញ៖ រាជរដ្ឋាភិបាលកម្ពុជា បានប្រកាសបើកទទួលទេសចរអន្តរជាតិឡើងវិញ ក្រោមទម្រង់ជា «ទេសចរណ៍វ៉ាក់សាំង» ដោយចាប់ផ្តើមមុនគេ នៅក្រុងព្រះសីហនុ ក្រុងកោះរ៉ុង ក្នុងខេត្តព្រះសីហនុ និងនៅតារាសាគរ នៃខេត្តកោះកុង នាថ្ងៃទី៣០ ខែវិច្ឆិកា ឆ្នាំ២០២១។ បន្ទាប់មក នៅខេត្តសៀមរាប នៅក្នុងខែមករា ឆ្នាំ២០២២។ នេះបើតាមសេចក្តីប្រកាសរបស់ក្រសួងទេសចរណ៍។
សេចក្តីប្រកាស លើកឡើងថា នៅក្នុងក្របខណ្ឌនៃកម្មវិធីទេសចរណ៍វ៉ាក់សាំង អនុញ្ញាតឲ្យភ្ញៀវទេសចរអន្តរជាតិ ស្នាក់នៅ និងទស្សនាក្នុងតំបន់ ឬគោលដៅទេសចរណ៍សុវត្ថិភាព រយៈពេល ៥ថ្ងៃ ដោយមិនតម្រូវឲ្យធ្វើចត្តាឡីស័ក ក្នុងសណ្ឋាគារទេ។
សេចក្តីប្រកាសរបស់ក្រសួងទេសចរណ៍ លើកឡើងថា ភ្ញៀវទេសចរ ដែលមកក្នុងកម្មវិធីទេសចរណ៍វ៉ាក់សាំង តម្រូវឲ្យធ្វើតែតេស្តរហ័ស រកអង់ទីហ្សែន កូវីដ១៩ ប៉ុណ្ណោះ នៅពេលមកដល់អាកាសយានដ្ឋាន។ ករណីទទួលបានលទ្ធផលអវិជ្ជមាន ភ្ញៀវទេសចរ អាចដើរកម្សាន្ត ដោយសេរី នៅក្នុងតំបន់ ឬគោលដៅទេសចរណ៍សុវត្ថិភាព ដោយមូលដ្ឋានអាជីវកម្មទេសចរណ៍ទាំងអស់ សុទ្ធតែត្រូវបានត្រួតពិនិត្យការអនុវត្តតាមនីតិវិធីប្រតិបត្តិស្តង់ដា និងវិធានសុវត្ថិភាពទេសចរណ៍ជាមុន។
សេចក្តីប្រកាសដដែល លើកឡើងថា ភ្ញៀវទេសចរអន្តរជាតិ ដែលមកតាមកម្មវិធីទេសចរណ៍វ៉ាក់សាំង អាចស្នើសុំប្រភេទទិដ្ឋាការទេសចរណ៍ ប្រភេទ T នៅតាមស្ថនទូត ឬស្ថានកុងស៊ុលកម្ពុជា ប្រចាំនៅបរទេស ឬអាចស្នើសុំទិដ្ឋាការ អេឡិចត្រូនិច E-Visa ហើយត្រូវមកតាមកញ្ចប់ទស្សនកិច្ចទេសចរណ៍វ៉ាក់សាំង កូវីដ១៩ ឬជាទេសចរ មកជាលក្ខណៈគ្រួសារ ឬក្រុមតូចៗ ជាទេសចរកម្រិតខ្ពស់ ដែលបានចាក់វ៉ាក់សាំងគ្រប់ដូស៕
ចែករំលែកព័តមាននេះ