ម្ចាស់និពន្ធបទ «ស៊ូឃ្លាត» លោក Tin Mark បានរួចផុតពីសេចក្តីស្លា.ប់ បន្ទាប់ពីក្រុមគ្រូពេទ្យបានព្យាយាមសង្គ្រោះជីវិតលោកចេញពីការវាយលុកនៃជំងឺកូវីដ១៩។ នេះជាសំណាងមួយក្នុងមួយម៉ឺនគ្រោះថ្នាក់ លោក Tin Mark នៅអាចរក្សាអាយុជីវិតរបស់លោកបាន បើទោះជា
រាជធានីភ្នំពេញ ៖ ម្ចាស់និពន្ធបទ «ស៊ូឃ្លាត» លោក Tin Mark បានរួចផុតពីសេចក្តីស្លា.ប់ បន្ទាប់ពីក្រុមគ្រូពេទ្យបានព្យាយាមសង្គ្រោះជីវិតលោកចេញពីការវាយលុកនៃជំងឺកូវីដ១៩។ នេះជាសំណាងមួយក្នុងមួយម៉ឺនគ្រោះថ្នាក់ លោក Tin Mark នៅអាចរក្សាអាយុជីវិតរបស់លោកបាន បើទោះជាមេរោគកូវីដ១៩ បានចូលទៅបំផ្លាញសួតស្ទើរតែអស់ពាក់កណ្តាលទៅហើយ។
លោកត្រូវបានគេអះអាងថា លោកមិនបានទទួលការចាក់ថ្នាំវ៉ាក់សាំងជំងឺកូវីដ១៩នោះទេ សូម្បីតែមួយដូស នោះជាហេតុធ្វើអោយលោកឆ្លង និងមានអាការៈធ្ងន់ធ្ងរបែបនេះ។
នាង កែវ សៀហៃ ដែលជាក្រុមគ្រួសារ និងជាអ្នកមើលថែ លោក Tin Mark បានអះអាងប្រាប់កោះសន្តិភាព តាមសារអេឡិចត្រូនិចនៅថ្ងៃនេះថា នាងពិតជាមិននឹកស្មានដល់ថា លោក Tin.Mark. បានវិលមកភាពល្អប្រសើរវិញឡើយ ដោយសារស្ថានភាពដំបូងនៃជំងឺរបស់លោកបានឈានដល់ដំណាក់កាលធ្ងន់ធ្ងរទៅហើយ។
នាងបញ្ជាក់ថា ដំបូងដោយមានអាការៈមិនស្រួល និងសង្ស័យពីការឆ្លងជំងឺកូវីដ១៩ លោក Tin Mark. បានសម្រេចព្យាបាលនៅផ្ទះដោយខ្លួនឯង។ ប៉ុន្តែក្រោយការព្យាបាលប្រមាណ១សប្តាហ៍មិនធូរ និងដោយគាត់មិនមានវ៉ាក់សាំងផងនោះ ទើបក្រុមគ្រួសារបញ្ជូនលោកទៅកាន់មន្ទីរពេទ្យរដ្ឋតែម្តង។
នាងបន្តថា មុនពេលទៅមន្ទីរពេទ្យ លោក Tin Mark ហាក់មានអាការៈធម្មតា ដោយលោកអាចដើរឡើងឡានដោយខ្លួនឯង។ តែនៅពេលទៅដល់មន្ទីរពេទ្យប្រមាណ៣ថ្ងៃ លោកក៏ចាប់ផ្តើមមានអាការៈមិនស្រួល ដោយការដកដង្ហើមដង្ហក់ ជាមួយនឹងការបញ្ជូលអុកស៊ីហ្សែនពីក្រុមគ្រូពេទ្យ។ យ៉ាងណាក្រុមគ្រូពេទ្យក៏បានបញ្ជាក់ថា លោកបានឈានដល់ដំណាក់កាលធ្ងន់ធ្ងរ ដោយសារមេរោគបានចូលទៅបំផ្លាញសួតជិតអស់ពាក់កណ្តាលទៅហើយ។
នាងបន្តទៀតថា ពេលនោះក្រុមគ្រួសារហាក់មិនអស់ចិត្ត បើទោះបីជាគាត់ត្រូវស្លា.ប់ក៏ត្រូវមើលអោយអស់ចិត្តដែរ ហេតុនេះក្រុមគ្រួសារក៏សុំការអនុញ្ញាតិពីគ្រូពេទ្យរដ្ឋ ដើម្បីចេញមកព្យាបាលនៅពេទ្យឯកជនវិញ។
នាងបន្ថែមថា ក្រោយចេញពីពេទ្យរដ្ឋមកព្យាបាលនៅមន្ទីរពេទ្យឯកមួយ ផ្តុំច្បារអំពៅ ដែលមន្ទីរពេទ្យនោះមានការអនុញ្ញាតិត្រឹមត្រូវពីក្រសួងសុខាភិបាលសម្រាប់ទទួលព្យាបាលអ្នកជំងឺកូវីដ១៩ រយៈពេលប្រមាណ១សប្តាហ៍ អាការៈរបស់លោកក៏បានវិលមកភាពល្អប្រសើរបន្តិចម្តងៗ។
កែវ សៀងហៃ បានលើកឡើងបន្ថែមថា ពេលមកដល់ពេទ្យឯកជន គ្រូពេទ្យក៏បានថតសួត និងបានចាក់ថ្នាំដើម្បីបំផ្លាញមេរោគកូវីដដែលចូលទៅបំផ្លាញសួត។ កត្តានេះ ទើបធ្វើអោយក្រុមគ្រូពេទ្យអាចជួយសង្គ្រោះលោក Tin Mark គេចផុតពីសេចក្តីស្លា.ប់បាន។
យ៉ាងណានាងថា មិនមែនពេទ្យរដ្ឋមិនល្អទេ ប៉ុន្តែដំណាក់កាលរបស់គាត់ គឺវាធ្ងន់ធ្ងរទៅហើយ ខណៈពេលអ្នកជំងឺកូវីដដដែលមានអាការៈធ្ងន់ធ្ងរបែបនេះ ក៏ត្រូវចំណាយពេលរកកន្លែងធ្វើការព្យាបាលផងដែរ។ បើតាម កែវ សៀងហៃ ថា រហូតមកទល់ពេលនេះ ការសម្រាកព្យាបាលនៅមន្ទីរពេទ្យឯកជនប្រមាណ១សប្តាហ៍របស់លោក Tin Mark នាពេលនេះ គឺបានចំណាយថវិការផ្ទាល់ចំនួន១ម៉ឺនដុល្លារហើយ។
នាងបញ្ជាក់ថា សម្រាប់ការព្យាបាលអ្នកជំងឺកូវីដ១៩ នៅពេទ្យឯកជន គឺគេមានកញ្ចប់ថវិកាសម្រាប់ជ្រើសរើស ដោយអ្នកជំងឺស្រាលរយៈពេល៩យប់១០ថ្ងៃចំនួន២៥០០ដុល្លារ ហើយសម្រាប់លោក Tin Mark ក៏បានជ្រើសរើសកញ្ចប់នេះដែរ តែមានការបន្ថែមថ្នាំពិសេស ទើបការចំណាយក្នុងមួយថ្ងៃបូករួមទាំងបន្ទប់គេង ត្រូវចំណាយជាង១ពាន់ដុល្លារ។
យ៉ាងណា សម្រាប់ថ្លៃការព្យាបាលជំងឺរបស់លោក Tin.Mark. នាពេលនេះ គឺជាការចំណាយតាមលទ្ធភាពរបស់គ្រួសារលោកផ្ទាល់ ដោយមិនមានជំនួយពីខាងណាឡើយ។ នាងថា ក្រុមគ្រួសារ និងលោក Tin Mark. ផ្ទាល់មិនបានលើកដៃសុំជំនួយពីសប្បុរសជនឡើយ កុំអោយគេដៀលថា អ្នកសិល្បៈអោយតែឈឺ គឺដឹងតែសុំជំនួយ។
យ៉ាងណា ក្រោយពេលលោក Tin Mark បានធូរបន្តិច លោកក៏បានបង្ហោះហ្វេសប៊ុកប្រាប់មហាជនពីអាការៈនៃការឆ្លងជំងឺកូវីដ១៩នេះ។ ប៉ុន្តែនៅពេលមិត្តភក្តិលោកបានឃើញលោកបង្ហោះ ក៏បានសម្តែងការភ្ញាក់ផ្អើល ហើយក៏មានការជួយឧបត្ថម្ភជាបន្តបន្ទាប់តែម្តង។
កែវ សៀងហៃ ក៏បានស្នើសុំ និងអំពាវនាវដល់ប្រជាពលរដ្ឋទាំងអស់អោយមានការប្រុងប្រយ័ត្នខ្ពស់ពីការឆ្លងជំងឺកូវី១៩នេះ។ ប្រសិនបើមានអាការៈមិនស្រួលឆាប់ទៅពិនិត្យ និងព្យាបាលភ្លាមៗ ជាពិសេសការទទួលការចាក់វ៉ាក់សាំង។ នាងបញ្ជាក់ថា លោក Tin Mark ដែលបានឆ្លងមេរោគកូវីដនេះដោយសារមិនបានចាក់វ៉ាក់សាំង ដោយសារលោកមានជំងឺសួតតាំងពីកំណើត៕
ចែករំលែកព័តមាននេះ