ខេត្តបន្ទាយមានជ័យ ៖ ប្រជាពលរដ្ឋជាច្រើន រអ៊ូរទាំពេលមានភ្លៀងធ្លាក់ម្តងៗ ហើយទទូចស្នើដល់មេភូមិ មេឃុំ មេត្តាចុះពិនិត្យ ជួសជុលផ្លូវមួយខ្សែ គ្រាន់បានធ្វើដំណើរងាយស្រួលផង ព្រោះសិស្សសាលា…
ខេត្តបន្ទាយមានជ័យ ៖ ប្រជាពលរដ្ឋជាច្រើន រអ៊ូរទាំពេលមានភ្លៀងធ្លាក់ម្តងៗ ហើយទទូចស្នើដល់មេភូមិ មេឃុំ មេត្តាចុះពិនិត្យ ជួសជុលផ្លូវមួយខ្សែ គ្រាន់បានធ្វើដំណើរងាយស្រួលផង ព្រោះសិស្សសាលា លំបាកក្នុងការធ្វើដំណើរទៅរៀន នៅវិទ្យាល័យយាងដង្គុំ ស្ថិតនៅភូមិបន្ទាយថ្មី ឃុំអូរបីជាន់ ស្រុកអូរជ្រៅ ។
បើតាមគណនីហ្វេសប៊ុកឈ្មោះ Sreang Toch បានបង្ហោះរូបភាព និងសរសេរកាលពីថ្ងៃទី២១ តុលា ២០២១ ថា «សុំថ្នល់កៅស៊ូមួយខ្សែមក ទុកអោយកូនសិស្សទៅរៀន បានស្រួលបន្តិច វិទ្យាល័យយាងដង្គុំ» ។
រីឯអ្នកគ្រូបង្រៀនឈ្មោះ ឆោម ម៉ូលីកា ក៏បានលើកឡើងដែរថា «ផ្លូវមកសាលាវិទ្យាល័យយាងដង្គុំ រូបភាពថ្ងៃទី២០ ខែតុលា ឆ្នាំ២០២១ ឥឡូវកំពុងភ្លៀង សិស្សមករៀនម្តងៗ គឺដើរបើអាចសុំជំនួយខាងបន្ទាយមានជ័យ ជួយសម្រួលផង អាណិតសិស្សណាស់» ។
អ្នកគ្រូបង្រៀនឈ្មោះ ឆោម ម៉ូលីកា បន្តថា «គ្រូអាណិតសិស្សណាស់ ហេតុតែចង់រៀន ទោះផ្លូវពិបាកក៏តស៊ូមករៀនដែរ សិស្សទី៨B សុខចិត្តផ្ញើម៉ូតូ នៅផ្ទះអ្នកភូមិ ហើយដើរមករៀន សូមមេភូមិ មេស្រុកអូរបីជាន់ ជួយសម្រួលផងផ្លូវមួយនេះ ។ មានសាលាវិទ្យាល័យផង សាលាបឋមផង ព្រមទាំងមានវត្ត ផ្លូវប្រជាជនទៀត ហេតុអ្វីមិនខ្វល់ខ្វាយសោះចឹង ? នាងខ្ញុំ មកបង្រៀនទីនេះ ពេលរដូវប្រាំង ផ្លូវមានក្រឡុកធំៗ ហើយពេលរដូវវស្សា ចូលមកដល់ ពិបាកជិះណាស់ លិចផង ភក់ផង រអិលផង អៀចផង ស្អិតផង ឃើញហើយមានតែសុំសម្រួលផ្លូវមួយខ្សែនេះផង» ។
ចំណែក ហ្វេសប៊ុកមួយទៀតឈ្មោះ ឯម ម៉ារ៉ាឌឺ ក៏បានអោយដឹងដែរថា សូមលោកមេឃុំជួយមើលផង ផ្លូវចូលទៅសាលារៀន ពិបាកខ្លាំងណាស់ផ្លូវចូលទៅវិទ្យាល័យផង ទាំងកូនគេ កូនខ្ញុំ ចង់ស្រែកយំម្ដងៗហើយ ។
ក្នុងនាមខ្ញុំ ជាប្រជាពលរដ្ឋ ដែលរស់នៅក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក៏ដូចជាតំណាងអោយប្រជាពលរដ្ឋទាំងអស់ និងសិក្សានុសិស្សគ្រប់រូប សូមអំពាវនាវដល់អាជ្ញាធរ ភូមិ ឃុំ គ្រប់រូប ជួយពិនិត្យមើលផ្លូវមួយខ្សែនេះ ដែលជាផ្លូវដ៏សំខាន់បំផុត ជាពិសេសនោះ គឺសំរាប់កូនៗ ប្អូនៗ សិក្សានុសិស្ស ដែលត្រូវធ្វើដំណើរទៅសាលារៀន ដើម្បីទទួលយកចំណេះដឹង ចំណេះវិជ្ជា និងជាទំពាំងស្នងឫស្សី ដល់ប្រទេសជាតិយើង ។
ក្នុងឆ្នាំ ២០០៥ ខ្ញុំក៏ធ្លាប់ជាសិស្សអនុវិទ្យាល័យយាងដង្គំ ខ្ញុំបានធ្វើដំណើរតាមផ្លូវមួយខ្សែនេះ ទៅសាលារៀនផងដែរ ហើយផ្លូវនេះពិតជាពិបាកក្នុងការធ្វើដំណើរខ្លាំងណាស់ ពេលមេឃភ្លៀង ស្អិតផង ជាប់ផង ទៅមុខមិនរួច ទៅក្រោយមិនរួច ទំរាំដល់សាលាប្រលាក់ខោអាវអស់ បើមេឃអត់ភ្លៀងវិញ កាឡុកធំៗ ហើយរលាក់ចង់ធ្លាក់ថ្លើមអស់ហើយ ។ ហេតុអ្វី រហូតមកដល់ពេលនេះហើយ ២០២១ នៅតែមិនទាន់ឃើញមានការអភិវឌ្ឍន៍ ឬជួយសម្រួលអោយផ្លូវនេះ បានស្រួលជាងមុនសោះចឹង ?
សូមមេត្តាលោកចៅហ្វាយស្រុក លោកមេឃុំ លោកមេភូមិ ជួយគិតគូរផង សង្ឃឹមថា លោកមេឃុំ និងមើលឃើញពីទុក្ខលំបាករបស់បងប្អូនប្រជាពលរដ្ធ និងសិក្សានុសិស្ស ដែលត្រូវធ្វើដំណើរឆ្លងកាត់ផ្លូវនេះ និងត្រូវធ្វើដំណើរឆ្ពោះទៅកាន់សាលារៀន សាលាអនុវិទ្យាល័យ និងវិទ្យាល័យ ៕
ចែករំលែកព័តមាននេះ