នគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២៣ ខែតុលា ឆ្នាំ២០២១ បានបញ្ជូនជនសង្ស័យជា
ខេត្តបន្ទាយមានជ័យ ៖ នគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២៣ ខែតុលា ឆ្នាំ២០២១ បានបញ្ជូនជនសង្ស័យជាជនជាតិបង់ក្លាដែសចំនួន០២នាក់ ទៅកាន់សាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធី ។
បើតាមលោកស្រី ឧត្តមសេនីយ៍ត្រី ឌី សុជាតិ ស្នងការរងទទួលផែនការងារប្រឆាំងការជួញដូរមនុស្សនិងការពារអនីតិជន បានឲ្យដឹងថា ជនសង្ស័យជាជនជាតិបង់ក្លាដែសទាំង០២នាក់នេះ ១/- ឈ្មោះ មៀ ហាប៊ឹប ភេទប្រុស អាយុ៣១ឆ្នាំ និង២/- ឈ្មោះ អ៊ីស្លាម អ៊ែលសារុល ភេទប្រុស អាយុ៣១ឆ្នាំ ទាំង០២នាក់ស្នាក់នៅផ្ទះជួលលេខ៦E ផ្លូវ៣១២ ស្ថិតក្នុងភូមិ៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
លោកស្រីស្នងការរងបានបន្តថា ជនសង្ស័យទាំង០២នាក់នេះ ដោយទទួលបាននូវបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនរបាលខេត្តបន្ទាយមានជ័យ ដោយមានការអនុញ្ញាតិពន្លាតដែនសមត្ថកិច្ច ពីឯកឧត្តម កើត សុវណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ កម្លាំងនគរបាលការិយាល័យជំនាញ និងកម្លាំងអធិការដ្ឋាន បានសហការជាមួយកម្លាំងនគរបាលរាជធានីភ្នំពេញ បន្តស្រាវជ្រាវរហូតឈានដល់នាំខ្លួនជនសង្ស័យទាំង០២នាក់មកសាកសួរនៅស្នងការដ្ឋាននគរបាលខេត្តបន្ទាយមានជ័យ ដែលធ្វើការឃាត់ខ្លួនបាននៅថ្ងៃទី២២ ខែតុលា ឆ្នាំ២០២១ វេលាម៉ោង០៤និង២៥នាទីល្ងាច ។
លោកស្រីឧត្តមសេនីយ៍ស្នងការរង បញ្ជាក់ថា ជនសង្ស័យជាជនជាតិបង់ក្លាដែសទាំង០២នាក់នេះ បានជាប់ពាក់ព័ន្ធនឹងករណីការចាប់ពង្រត់ ការឃុំឃាំង ឬការបង្ខាំងមនុស្ស ជាមួយនឹងជនសង្ស័យជាជនជាតិចិន០២នាក់ទៀត ដោយ ១/- ឈ្មោះ ស៊ីន សៅស៊ុន ភេទប្រុស អាយុ៣៦ឆ្នាំ, និង២/- ឈ្មោះ កៅ ឈុង ភេទប្រុស អាយុ៣៥ឆ្នាំ ទៅលើជនរងគ្រោះជនជាតិខ្មែរ០២នាក់ ដោយដឹកពីភ្នំពេញមកក្រុងប៉ោយប៉ែត ហើយបង្ខាំងទុកនៅចំណុចភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត កាលពីថ្ងៃទី០៨ ដល់ថ្ងៃទី១៨ ខែតុលា ឆ្នាំ២០២១ ដោយឲ្យជនរងគ្រោះទាំង០២នាក់រកលុយម្នាក់១,០០០ដុល្លារ មកសងខ្លួនវិញ (គួរបញ្ជាក់ថា ៖ ជនជាតិចិនទាំង០២នាក់នោះត្រូវបានបញ្ជូនទៅសាលាដំបូងខេត្តកាលពីថ្ងៃទី២០ ខែតុលា ឆ្នាំ២០២១មកម្ល៉េះ) ៕
ចែករំលែកព័តមាននេះ