ខេត្តប៉ៃលិន ៖ បុរសមិនស្គាល់អត្តសញ្ញាណម្នាក់បានបើកបរថយន្តយីឌុប១គ្រឿង ពាក់ស្លាកលេខ ភ្នំពេញ4A-7406 ពណ៌ក្រហមលាយសដឹកផ្លែស្វាយស្អុយខូច ក្នុងទិសដៅពីជើងទៅត្បូង ។ លុះឱកាសស្ងាត់ក៏បានចតរថយន្តនៅក្បែរចិញ្ចើមផ្លូវ រួចទម្លាក់ផ្លែស្វាយទាំងនោះក្បែរផ្លូវ…
ខេត្តប៉ៃលិន ៖ បុរសមិនស្គាល់អត្តសញ្ញាណម្នាក់បានបើកបរថយន្តយីឌុប១គ្រឿង ពាក់ស្លាកលេខ ភ្នំពេញ4A-7406 ពណ៌ក្រហមលាយសដឹកផ្លែស្វាយស្អុយខូច ក្នុងទិសដៅពីជើងទៅត្បូង ។ លុះឱកាសស្ងាត់ក៏បានចតរថយន្តនៅក្បែរចិញ្ចើមផ្លូវ រួចទម្លាក់ផ្លែស្វាយទាំងនោះក្បែរផ្លូវ ស្រាប់តែមេភូមិឃើញទាន់ក៏បញ្ជាឱ្យកើបដាក់រថយន្តវិញ យកទៅបោះចោលនៅកន្លែងផ្សេង ដើម្បីកុំឱ្យប៉ះពាល់ដល់បរិស្ថាន ។
ហេតុការណ៍នេះ បានកើតឡើងនៅវេលាម៉ោងវេលាម៉ោង១ និង៣០នាទី រសៀលថ្ងៃទី២៣ តុលា នេះ ស្ថិតនៅចំណុចផ្លូវជាតិលេខ៥៩ ក្នុងភូមិភ្នំស្ពុង ឃុំសាលាក្រៅ ស្រុកសាលាក្រៅ ខេត្តប៉ៃលិន ។ ប្រភពព័ត៌មានពីលោក ស្រី សាមី មេភូមិភ្នំស្ពុង បានឱ្យដឹង
ថា ពេលកំពុងជិះម៉ូតូតាមដងផ្លូវ ស្រាប់តែឃើញបុរសម្នាក់បើកបររថយន្តយីឌុបមួយគ្រឿង ឆ្លងមកពីទឹកដីខេត្តបាត់ដំបង ក្នុងទិសដៅពីជើងឆ្ពោះទៅទិសខាងត្បូង បម្រុងចូលទៅក្នុងក្រុងប៉ៃលិន ដោយមានដឹកផ្លែស្វាយស្អុយរលួយខូចជាច្រើន ខណ:ដែលគេលក់ផ្លែស្វាយល្អៗ អស់នៅប្រទេសថៃ ។
លោកបន្តទៀតថា ពេលឃើញសភាពស្ងប់ស្ងាត់មនុស្សបើកបរតាមដឹងផ្លូវ ម្ចាស់រថយន្តខាងលើ បានចតឈប់រថយន្តនៅក្បែរចិញ្ចើមផ្លូវ ក៏បានកៀរទម្លាក់ចោលផ្លែស្វាយទាំងនោះ ស្របពេលលោកឃើញ ក៏ចុះទៅត្រួតពិនិត្យ និងណែនាំឱ្យម្ចាស់កើបដាក់លើរថយន្តឡើងវិញ ព្រោះការចោលបែបអនាធិបតេយ្យ ធ្វើឱ្យប៉ះពាល់ដល់បរិស្ថាន ជះក្លិនស្អុយ ដល់អ្នកធ្វើដំណើរតាមដងផ្លូវ ។
លោកបញ្ជាក់ទៀតថា បានឃើញទាន់ម្ដង តែមានចិត្តអាណិតម្ចាស់រថយន្តពេក មិនចង់ផាកពិន័យអ្វីនោះទេ គឺឱ្យកើបផ្លែស្វាយឡើងលើឡានវិញ រួចណែនាំឱ្យយល់ដឹងពីផលប៉ះពាល់សុខភាពផ្លូវដង្ហើម គឺមិនត្រូវចោលសំរាមពាសវាលធ្វើឱ្យបាត់បង់ សោភ័ណភាពផ្លូវថ្នល់នោះទេ ។
គួរបញ្ជាក់ដែរថា ចំពោះមូលហេតុដែលផ្លែស្វាយជាច្រើនបានរលួយស្អុយបែបនេះ គឺបន្ទាប់ពីបានត្រូវទឹកភ្លៀងពេលបេះនៅចំការ ហើយដឹកតាមត្រូវក៏ត្រូវភ្លៀងទៀត ក៏សម្រេចទម្លាក់ចោលបែបនេះ ។
ម្យ៉ាងវិញទៀត បើសិនជាចង់បោះចោលផ្លែស្វាយខូចបែបនេះ ត្រូវរកកន្លែងដី ដែលនៅឆ្ងាយពីថ្នល់ អាចរកគុម្ពោតព្រៃណាមួយ ដែលមិនប៉ះពាល់ដល់បរិស្ថាន ឬបោះចោលនៅតាមវាលណា ដែលគ្មានមនុស្សរស់នៅ ដើម្បីឱ្យក្លាយទៅជាជីជាតិដំណាំប្រជាពលរដ្ឋផងដែរ ៕
ចែករំលែកព័តមាននេះ