ខេត្តកណ្តាល ៖ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដឹកនាំដោយលោកវរសេនីយ៍ឯក ឡាក់ ម៉េងធី នាយការិយាល័យ បានបើកកិច្ចប្រតិបត្ដិការ ស្រាវជ្រាវ…
ខេត្តកណ្តាល ៖ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដឹកនាំដោយលោកវរសេនីយ៍ឯក ឡាក់ ម៉េងធី នាយការិយាល័យ បានបើកកិច្ចប្រតិបត្ដិការ ស្រាវជ្រាវ ស៊ើបអង្កេត សហការជាមួយកម្លាំងអធិការដ្ឋាននគរបាលស្រុកមុខកំពូល និងអធិការដ្ឋាននគរបាលស្រុកអង្គស្នួល ស្រាវជ្រាវបង្ក្រាបដល់ឬសគល់ និងឃាត់ខ្លួនជនសង្ស័យ០២នាក់ នៅថ្ងៃទី២០-២១ ខែតុលា ឆ្នាំ២០២១ ករណីលួចគាស់ហាងដែលមានយីហោ «សន្យា» ។
ករណីចូលលួចគាស់យកសម្ភារមាននេះ កើតឡើងកាលពីវេលាម៉ោង១២និង៤៥នាទី រំលងអាធ្រាត្រ ថ្ងៃទី០២ ខែតុលា ឆ្នាំ២០២១ នៅចំណុចក្នុងហាងសន្យា ស្ថិតនៅក្នុងភូមិព្រែកសំរោង សង្កាត់តាខ្មៅ ក្រុងតាខ្មៅខេត្តកណ្តាល ។
ប្រភពពីមន្ត្រីនគរបាលខេត្តកណ្តាល បានអោយដឹងថា ជនរងគ្រោះ ជាម្ចាស់ហាង មានឈ្មោះ ឃិន សុផល ភេទប្រុស អាយុ៣៩ឆ្នាំ ទីលំនៅភូមិអូរបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនសង្ស័យឃាត់ខ្លួនបានទាំង២នាក់ មានទី១. ឈ្មោះ គង់ ដាវី ហៅ មាស សុវណ្ណារិទ្ធ ហៅ ផល ភេទប្រុស អាយុ៤២ឆ្នាំ ទីលំនៅភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ និងទី២. ឈ្មោះ ចាន់ សុធី ហៅ វ៉ា ភេទប្រុស អាយុ៣៤ឆ្នាំ មានទីលំនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
សម្ភារៈដែលបាត់បង់រួមមាន ៖
១. ម៉ាស៊ីនឌីជេ ចំនួន០១គ្រឿង
២. ធុងបាសធំ(សាហ្វ) ០១គ្រឿង
៣. បាស់សូឡូ ០១គ្រឿង
៤. ម៉ិចស័រ សំឡេង ០១គ្រឿង
សរុបជាទឹកប្រាក់ប្រហែល ១០,០០០ដុល្លារអាមេរិក ។
វត្ថុតាងដែលសមត្ថកិច្ចចាប់យក រួមមាន ៖
១. រថយន្តម៉ាក KIA CARNIVAL ពណ៌ខ្មៅ សេរីឆ្នាំ២០១៩ មិនមានស្លាកលេខ ។
២. ធុងបាស ០១គ្រាប់។
៣. ម៉ាស៊ីនចាក់ សម្រាប់ឌីជេ ០១គ្រាប់ ។
៤. កន្ត្រៃកាត់ដែក ពណ៌បៃតង ប្រវែង០១ម៉ែត្រ ។
៥. មេសោរសូឡេច ០១ ។
៦. ស្ព្រាយបាញ់ទ្វារ ០១កំប៉ុង ។
ប្រភពពីមន្ត្រីនគរបាលខេត្តកណ្តាល បានបញ្ចាក់ថា កាលពីថ្ងៃ០២ ខែតុលា ឆ្នាំ២០២១ វេលាម៉ោង ១២និង៤៥នាទីយប់ មានជនសង្ស័យចំនួន០២នាក់ បានជិះឡានមួយគ្រឿង ពណ៌ខ្មៅ មិនស្គាល់ម៉ាក មកឈប់នៅចំណុចមុខហាង សន្យា ស្ថិតនៅភូមិព្រែកសំរោងសង្កាត់ តាខ្មៅ ក្រុងតាខ្មៅ ខេត្តកណ្តាល ហើយនាំគ្នាដើរសំដៅ ទៅខ្លោងទ្វារហាង រួចយកកន្ត្រៃកាត់មេសោរទ្វារ និងមានស្ព្រាយបាញ់កង់ទ្វារ អោយងាយស្រួលរុញទ្វារ បើកកុំអោយឮសំឡេងខ្លាំង បន្ទាប់មកជនសង្ស័យ ក៏បាននាំគ្នាចូលទៅក្នុងហាង និងបានធ្វើសកម្មភាពលួច ឧបករណ៍ភ្លេង មួយចំនួនដូចជា ៖ ១. ម៉ាស៊ីនឌីជេ ចំនួន ០៣គ្រឿង ២. ធុងបាស់ធំ(សាហ្វ) ០១គ្រឿង ៣. បាស់សូឡូ ចំនួន ០១គ្រឿង ៤. ម៉ិចស៊រសំឡេង ០១គ្រឿង ហើយលើកយកទៅដាក់ក្នុងឡាន (ប្រើរយៈពេលប្រហែលកន្លះម៉ោង) ក្រោយពីធ្វើ សកម្មភាពរួច ជនសង្ស័យ ក៏បាននាំគ្នាបើកឡានគេចខ្លួន បាត់តែម្តង ។
បើតាមចម្លើយសារភាពរបស់ជនសង្ស័យទាំងពីរនាក់ បានអោយដឹងថា ៖ កាលពីថ្ងៃទី៣០ ខែកញ្ញា ឆ្នាំ២០២១ មានបុរសម្នាក់ឈ្មោះ ទឹង (ជាកម្មករហាងសន្យា) អាយុប្រហែល៣៧ឆ្នាំ មិនស្គាល់ទីលំនៅ បានទំនាក់ទំទងគ្នា តាមប្រព័ន្ធតាឡេក្រាម ដោយថតរូបឧបករណ៍ភ្លេងផ្សេងៗ នៅក្នុងហាងសន្យា ផ្ញើមកឲ្យឈ្មោះ គង់ ដាវី ដើម្បីឲ្យមកធ្វើសកម្មភាពលួច ។ លុះនៅថ្ងៃទី០១ តុលា ២០២១ ឈ្មោះ គង់ ដាវី ហៅផល បានរៀបចំផែនការ លួចសម្ភារក្នុងហាងនោះ ដោយឈ្មោះ ទឹង បានជិះម៉ូតូម៉ាកម៉ាក Viva ទៅចាំនៅផ្ទះជួលរបស់ គង់ ដាវី នៅភូមិត្នោតជ្រុំ សង្កាត់បឹងទំពុន១ ខណ្ឌមានជ័យ រាជធានីភ្នំពេញ ។ បន្ទាប់មក ឈ្មោះ គង់ ដាវី បានជិះរថយន្តម៉ាក KIA ពណ៌ខ្មៅ គ្មានផ្លាកលេខ ចេញពីម្ដុំស្ថានីយ៍ទូរទស្សន៍បាយ័ន ហើយបានតេទូរសព្ទប្រាប់ឈ្មោះ ចាន់ សុធី ឲ្យមកឈរចាំនៅលើផ្លូវជាតិលេខ១ ជិតស្ពានច្បារអំពៅ ឲ្យយកកន្ដ្រៃទៅជាមួយផង រួចហើយនាំគ្នាចេញទៅយកឈ្មោះ ទឹង នៅផ្ទះជួលភូមិត្នោតជ្រុំ ។
ជនសង្ស័យសារភាពបន្តថា រហូតដល់វេលាម៉ោង១២យប់ ឈានចូលថ្ងៃទី០២ តុលា ២០២១ ឈ្មោះ ទឹង បានប្រាប់ផ្លូវធ្វើដំណើរ មកហាងមួយកន្លែង យីហោសន្យា ស្ថិតនៅភូមិសាស្ត្រ ក្រុងតាខ្មៅ ដល់វេលាម៉ោង១២និង៤៥នាទីយប់ ក៏បានធ្វើសកម្មភាពលួចតែម្តង ដោយឈ្មោះ គង់ ដាវី ហៅរិទ្ធ និង ឈ្មោះ ចាន់ សុធី បានយកកន្ត្រៃដែកដងពណ៌ខៀវ កាត់សោរបើកទ្វារ ចូលក្នុងទៅលួចឧបករណ៍ភ្លេង បានមួយចំនួនធំ ចំណែកឈ្មោះ ទឹង អង្គុយចាំក្នុងឡាន ជាអ្នកមើលផ្លូវ ។ ក្រោយពីលួចបានភ្លាម ឈ្មោះ ទឹង បានដើរទៅផ្ទះ ចំណែកឈ្មោះ គង់ ដាវី និង ឈ្មោះ ចាន់ សុធី បានដឹកឧបករណ៍ភ្លេងទាំងនោះ ទៅទុកនៅផ្ទះជួលរបស់ឈ្មោះ គង់ ដាវី ។
រហូតមកដល់វេលាម៉ោង១១ និង៤០នាទីព្រឹកថ្ងៃទី០៨ ខែតុលា ឆ្នាំ២០២១ ឈ្មោះ ចាន់ សុធី បានយកម៉ាស៊ីនចាក់ សម្រាក់ឌីជេ ១គ្រឿង ជិះ ម៉ូតូកង់បី យកទៅលក់នៅចំណុចចុងស្ពានដែកចំការដូង លក់ក្នុងតម្លៃ ៣៥០$ (បីរយហាសិបដុល្លារ) រហូតដល់ថ្ងៃទី២០ តុលា ២០២១ ទើបកម្លាំងជំនាញស្រាវជ្រាវឃាត់ខ្លួន ឈ្មោះ គង់ ដាវី និងឈ្មោះ ចាន់ សុធី រួមជាមួយនឹងវត្ថុតាង តែម្តង ។
បច្ចុប្បន្ន ជនសង្ស័យទាំង២នាក់ ត្រូវបានមន្ត្រីការិយាល័យនគរបាលព្រហ្មទណ្ឌកម្រិតស្រាល កសាងសំណុំរឿង ចាត់ការតាមនីតិវិធី ៕
ចែករំលែកព័តមាននេះ