វត្តទូទាំងរាជធានីភ្នំពេញទទួលកឋិនទានជាធម្មតា តែមិនមានការដង្ហែ ឬជួបជុំមនុស្សច្រើនឡើយ
- ភ្នំពេញ
រាជធានីភ្នំពេញ ៖ លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ បានឱ្យកោះសន្តិភាពដឹងថា គ្រប់១៥១វត្តទូ
រាជធានីភ្នំពេញ ៖ លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ បានឱ្យកោះសន្តិភាពដឹងថា គ្រប់១៥១វត្តទូទាំងរាជធានីភ្នំពេញឆ្នាំនេះនៅទទួល និងធ្វើពិធីបុណ្យកឋិនទានជាធម្មតា តែមិនមានការដង្ហែរឬផ្សព្វផ្សាយបុណ្យឡើយ គឺពុទ្ធបរិស័ទឬបងប្អូនប្រជាពលរដ្ឋ អាចធ្វើពិធីបុណ្យកឋិនទាននៅផ្ទះទៅតាមវិធានរបស់ក្រសួងសុខាភិបាល រួចម្ចាស់ដើមបុណ្យ ដែលមានចំនួនមនុស្សតិចតួច ដើម្បីនាំយកត្រៃយ៏ និងលាង ព្រមទាំងទេយ្យទានទៅវេប្រគេនដល់ព្រះសង្ឃក្នុងវត្តតែម្តង។
លោកបានបញ្ជាក់ថា រហូតមកដល់ពេលនេះ មន្ទីរធម្មការ និងសាសនា រាជធានីភ្នំពេញ នៅមិនទាន់មានផែនការឬគោលការណ៏ពីថ្នាក់លើថា មិនអនុញ្ញាតឱ្យធ្វើបុណ្យកឋិននោះទេ ប៉ុន្ដែមន្ទីរបានទទួលផែនការ គឺមិនអនុញ្ញាតឱ្យធ្វើពិធីដង្ហែរកឋិនតាមផ្លូវឬជុំវិញព្រះវិហារ និងមិនឱ្យមានការជួបជុំគ្នានោះឡើយ។
គួររំលឹកថា យោងតាមសេចក្ដីជូនដំណឹងរបស់ក្រសួងធម្មការ និងសាសនា ចុះថ្ងៃទី១៤ ខែតុលានេះ បានឱ្យដឹងថា បុណ្យកឋិនទាន ជាកាលទានមួយដ៏ថ្លៃថ្លាក្នុងព្រះពុទ្ធសាសនាមានផលានិសង្ឃខ្ពស់ ទាំងទាយក ទាយិកា និងបដិគ្គាហក ជាទីជ្រះថ្លារបស់ពុទ្ធបរិស័ទខ្មែរ តែងតែប្រារព្ធធ្វើឡើងរៀងរាល់ឆ្នាំ មានរយ:ពេលកំណត់តែ២៩ថ្ងៃ ដោយវត្តនីមួយៗទទួលអង្គកឋិនបានតែមួយលើកប៉ុណ្ណោះ។
សម្រាប់ឆ្នាំ២០២១នេះ ពិធីបុណ្យកឋិនទាន នឹងប្រព្រឹត្តទៅចាប់ពីថ្ងៃសុក្រ១រោច ខែអស្សុជ ដល់ថ្ងៃសុក្រ១៥កើត ខែកត្តិក ត្រូវនឹងថ្ងៃទី២២ ខែតុលា ដល់ថ្ងៃទី១៩ ខែវិច្ឆិកា ឆ្នាំ២០២១។
សេចក្ដីជូនដំណឹងបានបញ្ជាក់ថា ដើម្បីរៀបចំបុណ្យកឋិនទានឱ្យដំណើរការ នឹងប្រព្រឹត្តទៅស្របតាមទំនៀមទម្លាប់ប្រពៃណីព្រះពុទ្ធសាសនា និងចូលរួមបដិបត្តិតាមសេចក្តីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ក្នុងការអនុវត្តវិធានការចាំបាច់នានា សំដៅកាត់ផ្តាច់ និងក្នុងការទប់ស្កាត់ការឆ្លងរីករាលដាលនៃជំងឺកូវីដ-១៩ នៅទូទាំងប្រទេស ជាពិសេសមេរោគបំប្លែងខ្លួនថ្មី ប្រភេទដែលតា(Delta)ដែលមានកម្រិតនៃការឆ្លងរាលដាលឆាប់រហ័ស និងយោងលើភាពចាំបាច់ដើម្បីធានាការពារអាយុជីវិត និងសុខភាពរបស់ប្រជាជនខណៈដែលព្រះរាជាណាចក្រកម្ពុជា ឈានឆ្ពោះទៅបើកដំណើរការប្រទេសពេញលេញឡើងវិញនាពេលខាងមុខ ក្រសួងសូមធ្វើការណែនាំដូចខាងក្រោម៖
១-ត្រូវយកចិត្តទុកដាក់បង្កលក្ខណៈឱ្យបានល្អប្រសើរ ប្រគេនព្រះសង្ឃ ជូនពុទ្ធបរិស័ទ ប្រារព្ធពិធីបុណ្យកឋិនទានស្របតាមប្រពៃណីព្រះពុទ្ធសាសនា ដោយត្រូវអនុវត្តឱ្យបានយ៉ាងម៉ឺងម៉ាត់នូវវិធានការការពារនានា របស់ក្រសួងសុខាភិបាល វិធានការរដ្ឋបាល និងជាពិសេសត្រូវប្រកាន់ភ្ជាប់ជានិច្ចនូវវិធានការ ៣ការពារ ៣កុំ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
២-ហាមឃាត់ផ្សព្វផ្សាយកម្មវិធីបុណ្យ ដង្ហែតាមដងផ្លូវ ឬជុំវិញព្រះវិហារ ដោយគ្រាន់តែវេរប្រគេនព្រៃចីវរជាកិច្ចសម្រេចបុណ្យតែម្តង ៕
ចែករំលែកព័តមាននេះ