សិល្បការិនីភាពយន្តប្រាំជំនាន់ និងជាភរិយាទី១ របស់លោកណុបណែម គឺលោកយាយ ដួងតារា កំពុងរស់នៅក្នុងជីវភាពក្រីក្រគ្មានទីពឹង ខណៈលោកយាយសុំតែជម្រកតូចមួយរស់នៅក្នុងជីវិតចុងក្រោយតែប៉ុណ្ណោះ
រាជធានីភ្នំពេញ ៖ សិល្បការិនីភាពយន្តប្រាំជំនាន់ និងជាភរិយាទី១ របស់លោកណុបណែម គឺលោកយាយ ដួងតារា កំពុងរស់នៅក្នុងជីវភាពក្រីក្រគ្មានទីពឹង ខណៈលោកយាយសុំតែជម្រកតូចមួយរស់នៅក្នុងជីវិតចុងក្រោយតែប៉ុណ្ណោះ។
យោងតាមការជូនដំណឹងរបស់ក្រុមព្រះសុរិយា បានអោយដឹងថា លោកយាយ ដួង តារា ឆ្នាំនេះមានអាយុ៨២ឆ្នាំហើយ កំពុងរស់នៅក្នុងជីវភាពខ្វះខាតលំបាកជាខ្លាំង នៅខណៈដែលមិត្តសិល្បករដូចគ្នា និងមហាជនមួយចំនួនបាត់ដំណឹងលោកយាយឈឹង ក្រោយពេលដែលលោកយាយធ្លាប់ខ្លួនឈឺមិនអាចបំរើសិល្បៈបាន ហើយជីវិតលោកយាយកាន់តែដុនដាបទៅៗ ក្រោយពីកូនស្រីបង្កើតជាទីពឹងតែមួយគត់របស់លោកយាយក៏លាចាកលោកទៅដោយសារជំងឺមហារីក។
តាមការជូនដំណឹងរបស់ក្រុមព្រះសុរិយា បានអោយដឹងបន្តថា ជីវិតលោកយាយកាន់តែលំបាកៗទៅ លោកយាយធ្លាប់ខ្លួនរស់នៅជាមួយអ្នកសប្បុរសម្នាក់ដែលរាប់អានគ្នាតាំងពីក្នុងរបបខ្មែរក្រហម ហើយបន្ទុកគ្រួសារបានធ្លាក់ទៅលើចៅស្រីតែមួយគត់របស់លោកយាយ ដែលកំពុងជាប់សិក្សានៅឡើយ។
តាមការជូនដំណឹងរបស់ក្រុមព្រះសុរិយា បានអោយដឹងទៀតថា ដោយបានដឹងពីទុក្ខលំបាករបស់លោកយាយយ៉ាងដូច្នេះ កាលពីថ្ងៃទី១៦ ខែតុលា ឆ្នាំ២០២១ លោកជំទាវ សុខ ស៊ីថន អនុប្រធានកិត្តិយសនៃក្រុមព្រះសុរិយា លោក យាង វណ្ឌី ប្រធានក្រុមព្រះសុរិយា វីរៈ វ៉ារ៉ានី អនុប្រធានក្រុមព្រះសុរិយា និងលោក ជា វណ្ណា តំណាងក្រុមហ៊ុន ព្រមទាំងក្រុមការងារ បានមូលមតិគ្នានាំយកអំណោយមួយចំនួនដូចជា អង្ករ១ប៉ាវ ៥០គីឡូក្រាម, ទឹកសុទ្ធ, ទឹកសណ្តែក, ទឹកផ្លែឈើ, មី, ទឹកត្រី, ទឹកស៊ីអ៊ីវ, សាប៊ូលាងចាន, សាប៊ូបោកខោអាវ ព្រមទាំងថវិកាចំនួន៦០ម៉ឺនរៀលទៅជូនលោកយាយដោយផ្ទាល់នៅភូមិបាក់ចិញ្ជៀន ឃុំត្រពាំងគង ស្រុកសំរោងទង ខេត្តកំពង់ស្ពឺ។
ក្នុងជំនួបនេះ លោកយាយបានសម្តែងអារម្មណ៍រំភើបរីករាយលាយជាមួយអារម្មណ៍ក្តុកក្តួលអួលអាក់ ទឹកភ្នែកហៀហូរ។ លោកយាយចង់ទៅសម្តែងភាពយន្តបន្ត តែដោយសារជំងឺមិនអាចធ្វើអោយលោកយាយទៅបាន។ បំណងក្នុងជីវិតចុងក្រោយលោកយាយ គឺចង់សុំតែកូនផ្ទះតូចមួយប៉ុណ្ណោះដើម្បីរស់នៅ ដោយលោកយាយមិនចង់បានអ្វីច្រើនទេ។ ក្រុមព្រះសុរិយា ក៏សូមអំពាវនាវយ៉ាងទទូចសុំសប្បុរសជនខ្មែរទាំងក្នុងស្រុក និងក្រៅស្រុកទាំងអស់មេត្តាជួយលោកយាយតាមកម្លាំងសទ្ធាតិចក្តីច្រើនក្តី តាមរយៈចៅស្រីបង្កើតរបស់លោកយាយឈ្មោះ យ៉ា រ៉េត 0967111406 ឬតាមគណនី ABA លេខ 000710640 PICH MAKARED។
គួរបញ្ជាក់ថា លោកយាយ ដួងតារា ដែលគេស្គាល់នាមថា លោកស្រី ណុបណែម បានចូលបំរើក្នុងវិស័យសិល្បៈខ្មែរតាំងពីដើមទសវត្ស៦០ ក្នុងខ្សែភាពយន្តដំបូងរឿង «រលកវាសនា»។ នៅពេលនោះ លោកយាយក៏បានរួមមេត្រីភាពស្នេហាជាមួយតារាភាពយន្តណុប ណែម ដោយកូនប្រុសស្រីពីរនាក់រួមគ្នា។ លោកយាយបានសម្តែងភាពយន្តជាច្រើនដូចជា រឿង «សព្វសិទ្ធិ» រឿង «លោហិតវាសនា» រឿង «ប្រហារដួងចិត្ត» រឿង «តិកឆេង» រឿង «ស៊ីយិនគុយ» និងរឿង «កន្សែងស្លាដក» ជាដើម។
គួរបញ្ជាក់ទៀតថា ក្រោយរបបខ្មែរក្រហម លោកយាយវិលមកបំរើវិស័យសិល្បៈភាពយន្តវិញ ហើយក៏មានឈ្មោះល្បីល្បាញម្តងទៀត។ ជាអកុសលកម្ម កូនៗដែលជាតំណក់ឈាមរបស់តារាភាពយន្តណុប ណែម ទាំងពីររូបនោះ បានបាត់ស្រមោលពីផែនដីនេះទៅហើយ ដោយកូនប្រុសច្បងឈ្មោះ ណុបណែម វីរៈ បានបាត់ដំណឹងសូន្យឈឹងជាង១០ឆ្នាំមកហើយ ក្រោយពីទៅធ្វើជាពលករនៅប្រទេសថៃ ដែលលោកយាយគិតថា រូបគេប្រាកដជាស្លា.ប់ជាមិនខាន ហើយកូនស្រីទី២ ឈ្មោះ ណុបណែម ចរិយា ក៏លាចាកលោកទៅកាលពីឆ្នាំ២០២០ ដោយសារជំងឺមហារីកទៀត៕
ចែករំលែកព័តមាននេះ