ខេត្តតាកែវ ៖ ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ នៅថ្ងៃទី១៨ ខែតុលា ឆ្នាំ២០២១នេះ បានចេញសេចក្តីបំភ្លឺព័ត៌មាន ករណីអំពើហិង្សារវាងក្រុមអ្នកជល់មាន់ ជាមួយ ក្រុមអ្នកសារព័ត៌មាន នៅភូមិត្បែង ឃុំក្រាំងធ្នង់ ស្រុកបាទី ខេត្តតាកែវ ។
ករណីអំពើហិង្សា កើតឡើងកាលពីវេលាម៉ោង១៤ និង៣០នាទី ថ្ងៃទី១៦ ខែតុលា ឆ្នាំ២០២១ បង្កឡើងដោយជនសង្ស័យមួយក្រុមមិនស្គាល់អត្តសញ្ញាណ ជាក្រុមដែលទៅលួចលាក់ជល់មាន់ នៅចំណុចព្រៃខាងលិចភូមិត្បែង ឆ្ងាយពីទីប្រជុំជន ដែលនៅជាប់ព្រំប្រទល់ជាមួយភូមិជន្លង់ ឃុំត្បែង ស្រុកកណ្តាលស្ទឹង ខេត្តកណ្តាល ។
ករណីខាងលើ បណ្តាលឲ្យរងរបួសជនរងគ្រោះជាអ្នកកាសែតចំនួន ០២នាក់រួមមាន ទី១ឈ្មោះ សិត ឡូត ភេទប្រុស អាយុ៣៩ឆ្នាំ ស្នាក់នៅផ្ទះជួលនៅភូមិខ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ មុខរបរជាចាងហ្វាងគេហទំព័រ តេជោ សន្តិភាព រងរបួសស្រាល បាត់បង់ទ្រព្យសម្បត្តិ រួមមាន ៖ ទូរសព្ទ០៤គ្រឿង ចិញ្ចៀនមាស ០១វង់ ទម្ងន់០៥ជី ប្រាក់ដុល្លារ ៧៥៨ដុល្លារ ប្រាក់រៀលចំនួន ២៥ម៉ឺនរៀល និងទី២ឈ្មោះ សោម រ៉ន ភេទប្រុស អាយុ៣៧ឆ្នាំ ស្នាក់នៅបន្ទប់ជួលនៅភូមិត្រពាំងថ្លឹងទី៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ រងរបួសស្រាល មុខរបរអ្នកសារព័ត៌មាន រស្មីស្ទឹងត្រង់ បាត់បង់ទ្រព្យសម្បត្តិរួមមាន ៖ ទូរសព្ទដៃ ០២គ្រឿង និងខ្សែកប្រាក់ ០១ខ្សែ ។
សូមរំលឹកថា ក្រោយពីទទួលបានព័ត៌មានអំពីករណីលួចលាក់ប្រមូលផ្តុំជល់មាន់ នៅទីតាំងខាងលើភ្លាម លោកឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ បានបញ្ជាកម្លាំងអធិការដ្ឋាននគរបាលស្រុកបាទី រួមជាមួយកម្លាំងគណៈបញ្ជាការឯកភាពរដ្ឋបាលស្រុក ដឹកនាំដោយលោកអភិបាលស្រុកបាទី ចុះធ្វើការបង្ក្រាបភ្លាមៗ លុះនៅវេលាម៉ោង១៧ និង៣០នាទី ទើបអធិការដ្ឋាននគរបាលស្រុកបាទី បានទទួលពាក្យបណ្តឹងពីជនរងគ្រោះទាំងពីរនាក់ខាងលើ ។
បច្ចុប្បន្ន កម្លាំងជំនាញកំពុងកសាងសំណុំរឿង និងបន្តស្រាវជ្រាវ កំណត់មុខសញ្ញាជនល្មើស ដើម្បីផ្តន្ទាទោសតាមផ្លូវច្បាប់ ។
ក្នុងរយៈពេលដែលកម្លាំងសមត្ថកិច្ច កំពុងមមាញឹក ក្នុងយុទ្ធនាការ ដើម្បីទប់ស្កាត់ការរីករាលដាលជំងឺកូវីដ-១៩ មិនត្រឹមតែក្នុងមូលដ្ឋានស្រុកបាទីនោះទេ ពោលគឺទូទាំងខេត្តតាកែវ ក្រុមអ្នកដែលញៀននឹងល្បែងស៊ីសងជល់មាន់ បានប្រមូលគ្នា លួចលាក់ ណាត់ភ្នាល់គ្នាបញ្ជល់មាន់ នៅតាមទីកន្លែងដាច់ស្រយាល ឆ្ងាយពីទីប្រជុំជន ដែលមានភូមិសាស្ត្រ ងាយស្រួលរត់គេច ពេលដែលសមត្ថកិច្ចកិច្ចចុះបង្ក្រាបម្តងៗ ។
ជាក់ស្តែងនៅទីតាំងខាងលើជាដើម គឺនៅកណ្តាលព្រៃ ផ្លូវចូលក៏ស្ងាត់ មានចម្ងាយឆ្ងាយពីទីប្រជុំជនភូមិត្បែង ដែលជាតំបន់នៅជិតព្រំប្រទល់រវាងស្រុកបាទី ខេត្តតាកែវ ជាមួយស្រុកកណ្តាលស្ទឹង ខេត្តកណ្តាល ដែលនៅពេលសមត្ថកិច្ចចុះបង្ក្រាប ក្រុមអ្នកជល់មាន់ទាំងនោះដឹងខ្លួនមុន គេចខ្លួនអស់ពីកន្លែងជល់ ហើយការលួចលាក់ណាត់គ្នា ជល់មាន់នេះទៀតសោត គឺតែងចល័ត ពីកន្លែងមួយទៅកន្លែងមួយ មិនមានទីតាំង ឬសង្វៀនច្បាស់លាស់ គ្មានអ្នកគ្រប់គ្រងពិតប្រាកដ ធ្វើឲ្យសមត្ថកិច្ចពិបាកក្នុងការកំណត់មុខសញ្ញា និងពិបាកពេលចុះបង្ក្រាប មួយវិញទៀត កម្លាំងជំនាញសង្កេតឃើញថា នៅរាល់ពេលមានការណាត់គ្នាជល់ ក្រុមនេះ គឺមានអ្នកចាំមើលនៅតាមផ្លូវចូលទៅកន្លែងជល់តែម្តង ដើម្បីផ្តល់ដំណឹងទៅអ្នកកំពុងភ្នាល់គ្នា ខាងក្នុងឲ្យរត់គេចខ្លួន បានទាន់ពេលវេលា ។
ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តតាកែវ ក៏បានថ្លែងអំណរគុណ ចំពោះគេហទំព័រសារព័ត៌មាន អនឡាញនានា ក៏ដូចជាអ្នកលេងបណ្តាញសង្គមហ្វេសប៊ុក ដែលតែងតែសហការផ្តល់ព័ត៌មាន មកកាន់ស្នងការដ្ឋាននគរបាលខេត្តតាកែវ (តាមរយៈ ឆាត, ការខមិន) នៅលើទំព័រផេកហ្វេសប៊ុក និងតាមរយៈលេខទូរស័ព្ទ ប្រចាំបញ្ជា២៤ម៉ោង លើ២៤ម៉ោង (០៩៧ ៧៧៨ ០០០៥) របស់ស្នងការដ្ឋាននគរបាលខេត្តតាកែវ ដែលជាហេតុ ធ្វើឲ្យសមត្ថកិច្ចជំនាញមានចំណាត់ការស្រាវជ្រាវបង្ការ បង្ក្រាប ព្រមទាំងដោះស្រាយសំណូមពរផ្សេងៗជូនប្រជាពលរដ្ឋបានទាន់ពេលវេលា និងរង់ចាំទទួលការបំភ្លឺ ជូនជានិច្ច ចំពោះបញ្ហាអវិជ្ជមានទាំងនេះ ជូនបណ្តាសារព័ត៌មាន បងប្អូនប្រជាពលរដ្ឋទូទៅ និងទទួលយកនូវការរិះគន់ ក្នុងន័យស្ថាបនា ដើម្បីចូលរួមបម្រើផលប្រយោជន៍ ជូនប្រជាពលរដ្ឋ និងរក្សាសន្តិសុខ សណ្តាប់ធ្នាប់ សុវត្ថិភាពសង្គមជាតិ ៕
ចែករំលែកព័តមាននេះ