ខេត្តកណ្តាល ៖ រថយន្តតូយ៉ូតាប្រភេទ១បាំងកន្លះ បានហក់ខាំគ្នាមួយចង្កូមជាមួយរថយន្តឡិចស៊ីស ហើយជ្រុលទៅបុកម៉ូតូរបស់អ្នកដំណើរមួយគ្រឿងទៀត បណ្តាលឱ្យដួលច្រងាប់ច្រងិល បន្ទាប់មកទើបរថយន្តតូយ៉ូតានោះជ្រុលទៅធ្លាក់ផ្លូវចូលដេកក្បែរមាត់ស្រែ កាលពីវេលាម់ោង៤និង៣០នាទីរសៀលថ្ងៃទី៣ មីនា ២០១១ តាមបណ្តោយផ្លូវជាតិលេខ៤ ស្ថិតក្នុងភូមិចុងបង្គោល ឃុំបែកចាន ស្រុកអង្គស្នួល ។
រថយន្តដែលត្រូវបានគេអះអាងថា ជាអ្នកបង្កហេតុម៉ាកតូយ៉ូតាប្រភេទ១បាំងកន្លះ ពណ៌ទឹកប្រាក់ ពាក់ស្លាកលេខ ញ-៣៨៩៦-ភព២ អ្នកបើកបរបានរត់គេចខ្លួនបាត់ទៅហើយ ព្រោះដឹងថា មានរឿងគ្រោះថ្នាក់ធំ…រថយន្តដែលត្រូវគេបុកម៉ាកឡិចស៊ីស RX 300 ពណ៌ស្ករ ពាក់ស្លាកលេខ ភ្នំពេញ 2M-2433 អ្នកបើកបរឈ្មោះឡុង ប៊ុនឡាយ អាយុ៥៨ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ រងរបួសស្រាល…ចំណែកម៉ូតូដែលរងនឹងការបុករបស់រថយន្តតូយ៉ូតាដែរនោះ ម៉ាកគុបជ្រុង ពណ៌ខៀវ អត់ស្លាកលេខ បើកបរដោយឈ្មោះសុន សុខគួន អាយុ២៤ឆ្នាំ ស្នាក់នៅភូមិកោះទ្រេត ឃុំភ្នំតូច ស្រុកឧដុង្គ ខេត្តកំពង់ស្ពឺ និងអ្នកជិះរួមដំណើរម្នាក់ទៀតរងរបួសស្រាល ។
ប្រភពព័ត៌មានពីកន្លែងកើតហេតុបានឱ្យដឹងថា រថយន្តម៉ាកតូយ៉ូតា ១បាំងកន្លះ បានធ្វើដំណើរចេញពីភ្នំពេញ គឺពីកើតទៅលិច មិនដឹងជាបើកជ្រែយ៉ាងម៉េចទេ ក៏ជ្រុលទៅបុកគេឯងដែលបើកបញ្ច្រាសទិសគ្នា…រថយន្តត្រូវសមត្ថកិច្ចនាំយកទៅរក្សាទុកនៅអធិការដ្ឋានស្រុកអង្គស្នួលដើម្បីចាត់តាមការច្បាប់ ៕
ចែករំលែកព័តមាននេះ