ខេត្តមណ្ឌលគិរី ៖ អស់រយៈពេលពេញមួយសប្តាហ៍នៅខេត្តមណ្ឌលគិរី បានទទួលរងអាកាសធាតុត្រជាក់ និងមានភ្លៀងធ្លាក់ជាប់ជាប្រចាំ ដែលបណ្តាលឲ្យប្រជាពលរដ្ឋមួយចំនួនពិបាកចេញដំណើរប្រកបរបរចិញ្ចឹមជីវិត។
យោងតាមសេចក្តីប្រកាសក្រសួងធនធានទឹក និងឧតុនិយម ដែលព្យាករណ៍ថា ប្រទេសកម្ពុជា រួមមានខេត្តមណ្ឌលគិរីផងនោះ នឹងទទួលរងឥទ្ធិពលពីជ្រលងនៃព្យុះ KOMPASU 2118 ក្នុងកម្រិតមធ្យម នៅថ្ងៃទី១៣-១៥ ខែតុលា ។ ជាក់ស្ដែងលក្ខណៈបែបនេះ បានធ្វើឲ្យខេត្តមណ្ឌលគិរី ជាពិសេសក្រុងសែនមនោរម្យ និងស្រុកអូររាំង ដែលស្ថិតនៅតំបន់ខ្ពស់ជាងគេនោះ មានភ្លៀងធ្លាក់មិនឈប់ឈរ ប៉ុន្តែកម្រិតទឹកភ្លៀងមិនខ្លាំងទេ ហើយក៏ពុំមានបាតុភូតផ្គររន្ទះ ឬខ្យល់កន្ត្រាក់នោះដែរ ។
បន្ទាប់ពីពិធីបុណ្យភ្ជុំបិណ្ឌបញ្ចប់ ខេត្តមណ្ឌលគិរីស្ទើរតែពុំមានពេលបើកថ្ងៃស្រឡះល្អទេ គឺមានភ្លៀងធ្លាក់ពេញមួយថ្ងៃតែម្ដង ចំណែកនៅថ្ងៃទី១៥ ខែតុលា ឆ្នាំ២០២១នេះ ផ្ទៃមេឃអាចបើកថ្ងៃមួយរយៈពេលខ្លីនឹងមានពពកខ្មៅបាំងបិទជាថ្មី ព្រមទាំងមានភ្លៀងរលឹមផងដែរ ។ សម្រាប់ខេត្តមណ្ឌលគិរី មិនមែនទើបតែទទួលសម្ពាធអាកាសធាតុម្ដងនេះទេ គឺប្រហែល១ខែចុងក្រោយ មានភ្លៀងធ្លាក់ស្ទើររាល់ថ្ងៃ និងទទួលរងសម្ពាធបរិយាកាសអួរអ័ព្ទជាបន្តបន្ទាប់ ។
បើតាមការជូនដំណឹងរបស់ក្រសួងធនធានទឹក និងឧតុនិយម បន្ទាប់ពីឥទ្ធិពលពីជ្រលងនៃព្យុះ KOMPASU រសាត់ផុតទៅ នឹងមានឥទ្ធិពលមូសុងនិរតីខ្លាំង និងប្រព័ន្ធសម្ពាធទាប ព្រមទាំងទ្រនុងសម្ពាធខ្ពស់ចិនរំកិលចុះក្រោមដល់ភាគខាងជើងនៃប្រទេសកម្ពុជាបន្ថែមទៀត នឹងបង្កឲ្យមានភ្លៀងធ្លាក់លាយឡំជាមួយសីតុណ្ហភាពធ្លាក់ចុះទាបអូសបន្លាយដល់ថ្ងៃទី១៩ ខែតុលាខាងមុខ ។
តំបន់ប្រជុំភ្នំនៃខេត្តមណ្ឌលគិរី នៅពេលមានភ្លៀងធ្លាក់ជាប់ៗគ្នាជាច្រើនថ្ងៃបែបនេះ ក៏បានបណ្ដាលឲ្យប្រជាពលរដ្ឋជួបការលំបាកខ្លះដែរ ព្រោះមណ្ឌលគិរី មានសណ្ឋានដីក្រហមស្អិត និងមានស្ថានភាពរអិលពេលធ្វើដំណើរ ដូចនៅតំបន់ជាយខេត្ត ឬក៏តំបន់ជនបទ ដែលពុំទាន់មានផ្លូវកៅស៊ូប្រើប្រាស់ ប្រាកដជាពិបាកធ្វើដំណើរមកក្រុងសែនមនោរម្យ ដើម្បីទិញស្បៀងអាហារ ឬសម្ភារៈផ្សេងៗ ព្រោះផ្លូវនឹងរអិលខ្លាំង អាចជាប់ផុងធ្វើដំណើរមិនកើតក៏មានដែរ ។
លោក ចាន់ រតនា នាយករងរដ្ឋបាលសាលាខេត្តមណ្ឌលគិរី និងជាមន្ត្រីលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយ បានថ្លែងថា ទោះបីខេត្តមណ្ឌលគិរី មានភ្លៀងធ្លាក់រៀងរាល់រថ្ងៃ ប៉ុន្តែមិនទាន់មានគ្រោះមហន្តរាយណាមួយកើតឡើងនោះទេ ខណៈពេលដែលមន្ត្រីជំនាញក៏បាននិងកំពុងតាមដានអំពីស្ថានភាពនេះគ្រប់បណ្ដាក្រុង-ស្រុកទាំង០៥របស់ខេត្តផងដែរ ៕
ចែករំលែកព័តមាននេះ