ក្រុងស៊ីដនីបើកទទួលភ្ញៀវទេសចរឡើងវិញ នៅដើមខែក្រោយនេះហើយ
អូស្ត្រាលី ៖ ទីក្រុង Sydney របស់អូស្ត្រាលីនឹងបើកទទួលអ្នកទេសចរអន្តរជាតិដែលចាក់វ៉ាក់សាំងរួចឡើងវិញ ដោយមិនចាំបាច់ត្រូវ
អូស្ត្រាលី ៖ ទីក្រុង Sydney របស់អូស្ត្រាលីនឹងបើកទទួលអ្នកទេសចរអន្តរជាតិដែលចាក់វ៉ាក់សាំងរួចឡើងវិញ ដោយមិនចាំបាច់ត្រូវធ្វើចត្តាឡីស័កទៀតឡើយ។ វិធានការបើកទទួលយកអ្នកដំណើរអន្តរជាតិនោះនឹងត្រូវអនុវត្តន៍ចាប់ពីថ្ងៃទី ១ខែវិច្ឆការខាងមុខនេះ។ នេះបើតាមការបញ្ជាក់របស់នាយករដ្ឋមន្ត្រីនៃរដ្ឋ New South Wales លោក Dominic Perrottet នៅថ្ងៃសុក្រនេះ។
អូស្ត្រាលីបានបិទព្រំដែនអន្តរជាតិរបស់ខ្លួនកាលពីខែមីនា ឆ្នាំ ២០២០ ដើម្បីទប់ស្កាត់ការរីករាលដាលវិរុសកូវីដ ១៩ និងអនុញ្ញាតឲ្យតែប្រជាពលរដ្ឋ និងអ្នករស់នៅអចិន្ត្រៃយ៍ប៉ុណ្ណោះត្រឡប់ចូលវិញបាន ប៉ុន្តែពួកគេតម្រូវឲ្យធ្វើចត្តាឡីស័ករយៈពេល ២សប្តាហ៍ និងត្រូវចំណាយការចាយវា.យខ្លួនឯង។
លោកបានថ្លែងថា «យើងចង់ឲ្យអ្នកទេសចរត្រឡប់មកវិញ ពួកយើងបានដឹកនាំប្រទេសចេញពីជំងឺរាតត្បាត… ពួកយើងបើកក្រុង Sydney និងរដ្ឋ New South Wales ទៅកាន់ពិភពលោក»។
អត្រាចាក់វ៉ាក់សាំងសម្រាប់មនុស្សពេញវ័យ ក្នុងរដ្ឋ New South Wales របស់អូស្ត្រាលីនឹងសម្រេចបាន ៨០ភាគរយក្នងនៅចុងសប្តាហ៍នេះ ខណៈដែលប្រទេសទាំងមូលត្រូវការពេលច្រើនសប្តាហ៍ទៀតដើម្បីសម្រេចការចាក់វ៉ាក់បានដល់កម្រិតនេះ។
ការសម្រេចបើកទទួលអ្នកដំណើរអន្តរជាតិនេះកើតឡើង បន្ទាប់ពីអត្រាឆ្លងវីរុសកូវីដ ១៩ក្នុងរដ្ឋ New South Wales មានការធ្លាក់ចុះខ្លាំងគួរឲ្យកត់សម្គាល់។ អត្រាឆ្លងវីរុសកូវីដ ១៩ក្នុងប្រទេសអូស្ត្រាលីទាំងមូលមានចំនួន ១៣៩.០០០ករណី និងស្លា.ប់ចំនួន ១.៥០៦នាក់។
សូមរម្លឹកថា កាលពីពេលថ្មីៗនេះ ប្រទេសថៃក៏បានប្រកាសបញ្ចប់ការតម្រូវឲ្យធ្វើចត្តាឡីស័កសម្រាប់អ្នកទេសចរចាក់វ៉ាក់សាំងរួច មកពីប្រទេសយ៉ាងតិច ១០ដែលមានហានិភ័យទាប។ វិធានការរបស់ថៃដែលនឹងត្រូវអនុវត្តចាប់ពីថ្ងៃទី១ ខែវិច្ឆការខាងមុខដូចគ្នា មានគោលបំណងដើម្បីធ្វើឲ្យវិស័យទេសចរណ៍រស់ឡើងវិញ៕ (យោងតាមប្រភព៖ Reuters)
ចែករំលែកព័តមាននេះ