រហូតមកដល់ព្រឹកថ្ងៃទី១៤ ខែតុលា ឆ្នាំ២០២១នេះ អាជីវករលក់ដូរ បន្លែ ត្រី សាច់ និងគ្រឿងធ្វើម្ហូបអាហារកំប៉ិកកំប៉ុកនៅក្នុងផ្សារគុត្តសត ប្រមាណ៤០ទៅ៥០នាក់ បាននាំគ្នាស្រែកទ្រហោយំបង្ហូរទឹកភ្នែកស្ទើរគ្រប់ៗគ្នា ដោយការព្រួយបារម្ភយ៉ាងខ្លាំងចំពោះបញ្ហាជីវភាពប្រចាំថ្ងៃ ខណៈរដ្ឋបាលស្រុកអូរជ្រៅ បញ្ជាឱ្យ
ខេត្តបន្ទាយមានជ័យ ៖ រហូតមកដល់ព្រឹកថ្ងៃទី១៤ ខែតុលា ឆ្នាំ២០២១នេះ អាជីវករលក់ដូរ បន្លែ ត្រី សាច់ និងគ្រឿងធ្វើម្ហូបអាហារកំប៉ិកកំប៉ុកនៅក្នុងផ្សារគុត្តសត ប្រមាណ៤០ទៅ៥០នាក់ បាននាំគ្នាស្រែកទ្រហោយំបង្ហូរទឹកភ្នែកស្ទើរគ្រប់ៗគ្នា ដោយការព្រួយបារម្ភយ៉ាងខ្លាំងចំពោះបញ្ហាជីវភាពប្រចាំថ្ងៃ ខណៈរដ្ឋបាលស្រុកអូរជ្រៅ បញ្ជាឱ្យយកគ្រឿងចក្រអេស្កាវ៉ាទ័រ ជីកកកាយផ្តាច់ផ្លូវចូលទៅក្នុងផ្សារ ស្ថិតក្នុងភូមិយាង ឃុំគុត្តសត ស្រុកអូរជ្រៅ ក្នុងគោលបំណងបណ្តេញពួកគាត់ឱ្យទៅជួល ឬទិញតូប លក់ដូរនៅក្នុងផ្សារ ដែលគេទើបបង្កើតថ្មី ។
បើតាមក្រុមអាជីវករបានប្រាប់ឱ្យដឹងថា ធ្លាប់កក់ប្រាក់ថ្លៃតូប ចូលលក់ដូរទីនោះម្តងហើយ តែលក់មិនដាច់ ព្រោះបញ្ហាវិបត្តជំងឺកូវីដ១៩ ពួកគាត់ក៏នាំគ្នាទៅលក់ដូរនៅកន្លែងដើមវិញ ព្រោះម្ចាស់ដីផ្សារមួយនេះ មិនទាមទារឱ្យបង់ថ្លៃតូប លក់ដូរច្រើននោះទេ ដើម្បីជួយសម្រួលឱ្យពួកគាត់ក្នុងការលក់បានថវិកាសម្រាប់ផ្គត់ផ្គង់ជីវភាព ស្រាប់តែខាងស្រុកអូរជ្រៅ មិនមានការយោគយល់ក៏រកវិធីបណ្តេញពួកគាត់ចេញតែម្តង ។
ក្រុមអាជីវករបន្តថា ខណ:ពេលដែលអាជ្ញាធរស្រុកអូរជ្រៅ កំពុងបញ្ជាឱ្យគ្រឿងចក្រជីកកកាយផ្តាច់ផ្លូវចូលទៅក្នុងផ្សារគុត្តសត មិនអនុញ្ញាតឱ្យប្រជាពលរដ្ឋក្រីក្រមកពីតាមភូមិបន្តចូលលក់ដូរនៅទីនោះទៀតឡើយ ។
ស្រី្តម្នាក់ ឈ្មោះ ចែណាន និងអាជីវករជាច្រើននាក់ទៀត នៅក្នុងផ្សារនេះ ស្ថិតក្នុងភូមិយាង ឃុំគុត្តសត ស្រុកអូរជ្រៅ ក៏បាននាំគ្នាស្រែកទ្រហោរយំ និងអង្វរករឱ្យអាជ្ញាធរខេត្ត ក៏ដូចជាថ្នាក់ដឹកនាំខាងលើមេត្តាជួយសម្រួល ព្រោះបញ្ហាជំងឺកូវីដ១៩ មិនទាន់ធូរស្បើយនៅឡើយទេ ណាមួយការលក់ដូរបន្លែ ត្រី សាច់ សព្វថ្ងៃនេះ គឺលក់មួយពេលរស់មួយថ្ងៃប៉ុណ្ណោះ ។
ក្រុមអាជីវកររៀបរាប់ទាំងទឹកភ្នែក មុខក្រៀមក្រំ ស្តាប់ទៅគួរឱ្យខ្លោចចិត្ត បានបន្តទៀតថា កាលពីប៉ុន្មានឆ្នាំមុន មានក្រុមឈ្មួញសហការជាមួយនឹងអាជ្ញាធរស្រុកអូរជ្រៅ បានបង្កើតផ្សារថ្មីមួយនៅក្បែរភូមិខាងលើ រួចបញ្ចុះបញ្ចូលឱ្យអាជីវករចូលទៅលក់ដូរ ដោយតម្រូវឱ្យពួកគាត់ទិញ ឬជួលមួយតូប ក្នុងតម្លៃ១៥០០ទៅ២០០០ដុល្លារ ។ ហើយមុនពេលចូលទៅលក់ គឺត្រូវកក់ប្រាក់ចំនួន២០០ដុល្លារ លុះពួកគាត់នាំគ្នាកក់ប្រាក់ចូលលក់ដូរមិនដាច់ ក៏នាំគ្នាត្រឡប់មកលក់ដូរនៅកន្លែងដើមវិញ ដោយសារអ្នកខ្លះលក់បន្លែត្រកួន១កញ្ច្រែង ខ្លះលក់ត្រួយអំពិល១ថាស ក៏មានអ្នកលក់ខ្យង ក្តាម និងបន្លែព្រលិត រំចង់ តិចតួច សម្រាប់យកថវិកាទៅដោះទាល់ជីវភាពនាពេលជួបបញ្ហាវិបត្តិកូវីដ១៩ ដែលមិនអាចចេញទៅធ្វើការចិញ្ចឹមជីវិតឆ្ងាយពីផ្ទះបានឡើយ ។
ប្រភពដដែលបន្តថា ស្រាប់តែរហូតមកដល់ពេលនេះ រដ្ឋបាលស្រុកអូរជ្រៅ ដឹកនាំដោយលោក ទូច សីហា អភិបាលរងស្រុក បានបញ្ជាឱ្យគ្រឿងចក្រជីកកកាយផ្តាច់ផ្លូវចូលផ្សារ ក្នុងគោលបំណងបណ្តេញពួកគាត់ឱ្យទៅទិញតូបលក់ដូរនៅក្នុងផ្សារដែលគេបង្កើតថ្មីម្តងទៀត ។
ក្រុមអាជីវករបានរៀបរាប់ទាំងបង្ហូរទឹកភ្នែករហាម និងលើកដៃសំពះសូមអង្វរថា ៖ ពួកគាត់ក្រីក្រលំបាកវេទនាខ្លាំងណាស់ រកព្រឹកខ្វះល្ងាច គ្មានប្រាក់ទៅជួលតូបលក់ដូរនោះទេ ដូច្នេះសូមឱ្យលោកចៅហ្វាយខេត្តបន្ទាយមានជ័យ ក៏ដូចជាសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជួយដោះស្រាយបញ្ហានេះជូនពួកគាត់ផងដែរ ។
ភា្នក់ងារយើងក៏បានទាក់ទងទៅលោក យឹម សំណាង អភិបាលស្រុកអូជ្រៅ កាលពីរសៀលថ្ងៃដដែល នេះ ហើយលោកក៏បានប្រាប់ភ្នាក់ងារសារព័ត៌មានយើងឱ្យដឹងថា ៖ ខាងលោកបានប្រគល់តួនាទីនេះឱ្យទៅលោកអភិបាលរងស្រុកជាអ្នកចាត់ចែង ដោយសារតែព្រោះលោកកំពុងជាប់រវល់ការងារ បើចង់ដឹងច្បាស់ឱ្យទាក់ទងសួរនាំបន្តទៀតទៅ ។
ក្រោយមកភ្នាក់ងារយើងក៏បានទាក់ទងទៅលោក ទូច សីហា អភិបាលរងស្រុកអូរជ្រៅ ដោយលោកបានឆ្លើយយ៉ាងខ្លីថា ៖ ខាងលោកគ្រាន់តែអនុវត្តការងារតាមតួនាទីភារកិច្ចរបស់ខ្លួនតែប៉ុណ្ណោះ បើចង់ដឹងច្បាស់ឱ្យទាក់ទងសួរនាំទៅខាងលោកអភិបាលស្រុកអូរជ្រៅវិញទៅ ព្រោះខាងរដ្ឋបាលស្រុកធ្វើបែបនេះ ដើម្បីកុំឱ្យប្រជាពលរដ្ឋលក់ដូរអនាធិបតេយ្យបន្តទៀត ៕
ចែករំលែកព័តមាននេះ