ខេត្ដកំពត ៖ អ្នកស្នងរូប៧នាក់ ក្នុងនោះមានក្មេងប្រុសម្នាក់ផងដែលអះអាងថា ចេះហិតក្លិនអ្នកសាងបាប ឬអ្នកមានបុណ្យបានចូលរួមពិធីបុណ្យឱ្យត្រីចំលែកមួយក្បាល ដែលអ្នកខ្លះថា ជាត្រីតុកកែមានឈ្មោះថា ត្រីឆ្លាំងជ័យមច្ឆាទេពគំរប់ខួបមួយឆ្នាំ បន្ទាប់ពីបុរសម្នាក់ជាអ្នកសំដែងល្ខោនបាសាក់ចាប់បានកាលពីឆ្នាំ២០០៩ ។ ពិធីបុណ្យនេះបានប្រារឰធ្វើរយៈពេល៣ថ្ងៃ៣យប់នៅផ្ទះអ្នកភូមិឈ្មោះអិន ម៉ាប់ អាយុ៥៣ឆ្នាំ នៅភូមិកោះក្លូត ឃុំកំពង់ត្រាចខាងកើត ស្រុកកំពង់ត្រាច ។
លោកអិន ម៉ាប់ បាននិយាយរៀបរាប់ថា ការរៀបចំធ្វើបុណ្យឱ្យត្រីឆ្លាំងជ័យមច្ឆាទេពថ្ងៃនេះ គឺជាបុណ្យគំរប់ខួបមួយឆ្នាំ បន្ទាប់ពីត្រីនេះបានជាប់មងរបស់គាត់នៅក្នុងព្រែក កំពង់ត្រាច ។ ដោយនិយាយតាមបែបជំនឿថា តាមការទស្សន៍ទាយត្រូវបានគេប្រាប់គាត់ថា ត្រីនេះជាត្រីមានបារមី ហើយត្រូវគាត់ជាអ្នកថែរក្សាធ្វើឱ្យមនុស្សផងទាំងឡាយរួមទាំងប្រជាជនវៀតណាមផងដែរ នាំគ្នាមកសុំទឹកមន្ដបារមីត្រីឆ្លាំងជ័យមច្ឆា ទេព យកទៅផឹកនឹងជារោគា ។ លោក អិន ម៉ាប់ និយាយទៀតថា ចំណែកអាជ្ញាធរមូលដ្ឋានឃុំ-ស្រុកមិនបានជំទាស់ និងការរៀបចំធ្វើបុណ្យនេះទេ ។
គេបានកត់សំគាល់ឃើញថា អ្នកស្នងរូបផ្សេងៗដែលបានមកចូលរួមបុណ្យនេះច្រើនមានគូ គឺ២នាក់ប្ដី ប្រពន្ធ ហើយមានបារមីចូលសណ្ឋិត។ បើតាមការអះអាងពីលោក ម៉ាប់ និយាយថា មានអ្នកស្នងរូប៧នាក់បានមកសំដែងធម៌នៅពិធីបុណ្យនេះវែកញែក និងសួរដេញដោលគ្នាពីរឿងបារមីត្រីឆ្លាំងជ័យមច្ឆាទេពនេះ។ សកម្មភាពអ្នកស្នងរូបនីមួយៗសុទ្ធតែសំដែងឫទ្ធិគួរឱ្យខ្លាចបំផុត ។ ស្ដ្រីម្នាក់ជាអ្នកស្នងរូបព្រះអង្គមកពីភូមិរាប ឃុំពារាំង ស្រុកពារាំង ខេត្ដព្រៃវែង បានប្រាប់ថា គាត់លែងលះជាមួយប្ដីរយៈពេល១៥ឆ្នាំ គឺមិនខ្វល់ខ្វាយពីរឿងអ្វីទេ ។ ស្ដ្រីដែលមានជំនឿស៊ុបទៅនឹងអបិយជំនឿនិយាយទៀតថា ព្រះអង្គបាននាំផ្លូវគាត់ឱ្យមកជួបនឹងមច្ឆាទេព ហើយបានប្រោសព្រំដល់មនុស្សលោកដែលមាននិស្ស័យជឿទៅលើបារមីត្រីឆ្លាំងជ័យមច្ឆាទេពនេះ។ ស្ដ្រីរូបនោះបាននិយាយថា រូបគាត់មិនដែលស្គាល់ ភូមិស្រុកនេះទេ តែបានព្រះអង្គដែលនាំផ្លូវឱ្យពួកគាត់ជួបជុំគ្នា ។ ប្រការដែលគួរឱ្យកត់សំគាល់នោះ គឺក្មេងប្រុសម្នាក់ត្រូវបានបារមីចូលរូបសណ្ឋិតផងដែរ ។ ក្មេងប្រុសនោះចេះមើលក្បូរក្បាច់ និងគូរយ័នបង្ហាញពីតំបន់ផ្សេងៗ និងប្រាប់ឈ្មោះភ្នំដូចជាភ្នំខ្លា ភ្នំជ័យ និងភ្នំផ្សេងៗទៀត តែឈ្មោះភ្នំទាំងនោះមិនធ្លាប់ឮទេ តែជាឈ្មោះនៅក្នុងគម្ពីរ ។ តាមសំដីអ្នកស្នងរូបជាព្រះអង្គម្នាក់ទៀតមកពីខេត្ដព្រៃវែងនិយាយថា ក្មេងប្រុសម្នាក់ដែលចេះគូរយ័នមានឈ្មោះថា កូនទេវតាតូច ហើយក្មេងប្រុសនោះនៅពេលខាងមុខគេអាចនិងចេះហិតក្លិនមនុស្សណាសាងបាបច្រើន ឬអ្នកមានបុណ្យច្រើន ។ បើអ្នកសាងបាបច្រើនគេអាចទៅរំដោះគ្រោះឱ្យរួចផុតពី សេចក្ដីស្លាប់បាន ។
ព្រះតេជគុណមួយអង្គក្នុងចំណោមព្រះសង្ឃ៧វត្ដដែលនិមន្ដចូលរួមបុណ្យឱ្យមច្ឆាទេពបានសង្ឃដីកាថា តាមគន្លងព្រះពុទ្ធសាសនា គឺអបិយជំនឿគេឱ្យឈ្មោះថា អមនុស្ស គឺព្រាយបិសាចរាជភូត ឬអសុរកាយបានចូលសណ្ឋិតក្នុងខ្លួនមនុស្ស។ ព្រះសង្ឃអង្គនោះមានសង្ឃដីកាបន្ដថា ពួកអ្នកចូលរូបទាំងអស់នោះបើយើងរៀបចំបាយសី ឬអុចទៀនធូបយកចិត្ដទុកដាក់គោរពបូជាកាន់តែខ្លាំង អ្នកស្នងរូបទាំងនោះនឹងសំដែងឫទ្ធិកាន់តែខ្លាំង ប៉ុន្ដែយូរៗទៅត្រូវសាបរលាបសូន្យបាត់ទៅវិញហើយ ។ គេបានសំគាល់ឃើញថា នៅឆ្នាំ២០១០នេះ ដោយឡែកខេត្ដកំពតមានរឿងប្លែកៗជាច្រើន ដូចជាមានវល្លិ៍រស់ចេះកំរើកធ្វើឱ្យមានការភ្ញាក់ផ្អើលនៅសង្កាត់អណ្ដូងខ្មែរ ក្រុងកំពត ហើយរឿងដូចគ្នាមួយទៀត គឺមានវល្លិ៍ចេះកំរើកមួយកន្លែងទៀតនៅជើងភ្នំកកេះ ឃុំម៉ាក់ប្រាង្គ ស្រុកទឹកឈូ តែវាជាការក្លែងបន្លំប្រជាពលរដ្ឋដើម្បីរកកំរៃតែប៉ុណ្ណោះ ។ ថ្មីៗនេះលេចឮមានចិនធ្វើទំនប់វារីអគ្គិសនីកំចាយចាប់បានពោះត្បាល់ ទម្ងន់១តោន ការពិតគឺគ្មានប្រភពណាបញ្ជាក់ទាល់តែសោះ ។ កន្លងមកអ្នកតាំងខ្លួនជាកូនស្ដេចនៅស្រុកឈូកក៏ត្រូវចាប់ខ្លួនដាក់ពន្ធនាគារផងដែរ ។
មន្ដ្រីនានាបានអំពាវនាវដល់ប្រជាពលរដ្ឋគ្រប់រូបគួរតែកុំជឿអ្វីដែលគ្មានព្រំដែនខ្លាំងពេកនាំឱ្យខាតបង់ថវិកា ខាតពេលវេលារកស៊ីប៉ុណ្ណោះ ។ ចំណែកត្រីចំលែកដែលពេលនេះជាត្រីអច្ឆរិយៈ គឺជាត្រីតុកកែដែលនៅក្រុងភ្នំពេញគេចិញ្ចឹមក្នុងអាងនិងមិនពិបាករកចំណីឱ្យវាស៊ីទេ ព្រោះវាស៊ីតែស្លែនៅក្នុងអាង ៕
ចែករំលែកព័តមាននេះ