ខេត្តព្រៃវែង ៖ ពិតជាគួរឱ្យហួសចិត្តជុំវិញរឿងរ៉ាវឪពុកក្មេកប្រចណ្ឌប្រពន្ធជាមួយកូនប្រសាប្រុស រហូតដល់ទាញកាំបិតផ្គាក់កាប់កូនប្រសាមួយកាំបិតដាច់កំភួនដៃខាងឆ្វេង សល់តែស្បែក និងចំដើមដោះខាងស្តាំ ។ ប្រការដែលអ្នកស្រុកហួសចិត្តបំផុតនោះ គឺឪពុកក្មេក និងកូនប្រសាសុទ្ធតែមានវ័យចំណាស់ មានចៅ និងចៅទួតអស់ទៅហើយ មិនគួរមានបញ្ហាគ្រោតគ្រាតបែបនេះឡើយ ។
ហេតុការណ៍នេះបានកើតឡើងកាលពីថ្ងៃទី១៦ មីនា វេលាម៉ោងជាង១១យប់ នៅភូមិសហករណ៍ ឃុំពាមមន្ទារ ស្រុកកំពង់ត្របែក ។ បុរសជាឪពុកក្មេកឈ្មោះឆាយ ពុធ អាយុ៦៨ឆ្នាំ បានប្រចណ្ឌកូនប្រសាឈ្មោះសូ សានី អាយុ៥៨ឆ្នាំ ជាមួយប្រពន្ធរបស់ខ្លួនត្រូវជាម្តាយក្មេកឈ្មោះចេង ស៊ីម អាយុ៦៣ឆ្នាំ ។ បើតាមស្ត្រីឈ្មោះស្រេង ស៊ីម អាយុ៤២ឆ្នាំ ជាប្រពន្ធជនរងគ្រោះបានរៀបរាប់ថា ការប្រចណ្ឌនេះគឺកើតមានជាច្រើនឆ្នាំមកហើយ ពេលឪពុករបស់គាត់ផឹកស្រាស្រវឹងមកដល់ផ្ទះតែងរករឿង និងចោទប្រកាន់ប្តីគាត់ដែលជាកូនប្រសាថា លួចសហាយស្មន់ជាមួយម្តាយ ។ ក៏ប៉ុន្តែប្តីគាត់មិនដែលនិយាយតបតទេ ចេះតែស្ងៀមមិនស្តី ម្យ៉ាងខ្មាសអ្នកជិតខាង ព្រោះមានកូនរហូតដល់មានចៅ ចៅទួតទៅហើយ ទៅស្រើបស្រាលពីស្នេហាអីទៀត ។ គាត់រៀបរាប់ទៀតថា រឿងរ៉ាវដែលនាំឱ្យឈានដល់ការកាប់ប្រហារគ្នារវាងឪពុកក្មេក និងកូនប្រសានេះ ទី១-ដោយសាររឿងប្រចណ្ឌ និងទី២-ដោយសារគំនុំ ព្រោះ កាលពីបីថ្ងៃមុន ប្តីរបស់គាត់បានទៅទារលុយពីប្អូនថ្លៃដែលជាប្អូនស្រីបង្កើតរបស់គាត់ ឈ្មោះស្រេង ស្រីពៅ អាយុ២៣ឆ្នាំ ដែលបានជំពាក់ចំនួន៨០ម៉ឺនរៀល ជាច្រើនខែមកហើយ ។
ស្ត្រីជាប្រពន្ធជនរងគ្រោះបានរៀបរាប់បន្តថា ពេលនោះដោយប្អូនស្រីនិយាយថា គ្មានលុយ ក៏មានជម្លោះកើតឡើង ។ ស្រាប់តែនៅថ្ងៃទី១៦ មីនា វេលាម៉ោងប្រមាណជា៩យប់ ប្អូនស្រីស្រេង ស្រីពៅ ខឹង និងគិតខ្លី ក៏បានលេបថ្នាំប៉ងសម្លាប់ខ្លួន ទាំងរូបនាងមានផ្ទៃពោះចំនួន៧ខែទៀតផង ធ្វើឱ្យនាងប្រកាច់សន្លប់បែកពពុះមាត់ ហើយត្រូវប្តីនាង និងក្រុមគ្រួសារជួយសង្គ្រោះនៅផ្ទះតែមិនដឹងថា មានសុខភាពយ៉ាងណាទៀតទេ ។ លុះនៅវេលាម៉ោងជាង១១យប់ថ្ងៃដដែល ឪពុករបស់គាត់មកពីផឹកស្រាវិញ ឃើញកូនស្រីលេបថ្នាំសម្លាប់ខ្លួនដោយសារតែរឿងបងថ្លៃទារលុយ ក៏មានកំហឹងផ្ទុះឡើង ហើយបានទៅយកកាំបិតផ្គាក់មានមុខសស្ងាចមកកាប់ប្តីគាត់ជាកូនប្រសាបំរុងផ្តាច់ជីវិត ។ ពេលនោះប្តីគាត់បានលើកដៃរងក៏ត្រូវមួយកាំបិតដាច់ឆ្អឹងកំភួនដៃ និងដាច់សាច់លើដើមដោះខាងស្តាំ ហូរឈាមក្រហមច្រាល ហើយត្រូវកូនៗ និងចៅនាំគ្នាឃាត់ រួចដឹកយកមកកាន់មន្ទីរពេទ្យបង្អែកស្រុកកំពង់ត្របែក ។ ប៉ុន្តែដោយសាររបួសធ្ងន់ធ្ងរ ក៏បញ្ជូនបន្តទៅកាន់មន្ទីរពេទ្យខេត្តស្វាយរៀងទៀត ។
ក្រោយពីកាប់កូនប្រសាហើយ បុរសជាឪពុកក្មេក បានរត់គេចខ្លួនទាំងយប់ ។ ចំណែកសមត្ថកិច្ចកំពុងស្រាវជ្រាវតាមចាប់ខ្លួនយកមកផ្តន្ទាទោសតាមច្បាប់ ។ ឯចំពោះស្ត្រីជាប្អូនថ្លៃមិនដឹងថា បានរួចផុតពីគ្រោះថ្នាក់ដល់ជីវិតឬយ៉ាងណាទេ រួមទាំងកូនក្នុងផ្ទៃ៧ខែផង ព្រោះគាត់កំពុងតែនៅកំដរប្តីឯមន្ទីរពេទ្យ ៕
ចែករំលែកព័តមាននេះ