ទឹកចិត្តអ្នកវិនិយោគិនសញ្ជាតិកូសូវ៉ូម្នាក់ចំពោះព្រះរាជាណាចក្រកម្ពុជា
- ភ្នំពេញ
រាជធានីភ្នំពេញ ៖ លោក COKOVIC DENIS (កូកូវិក ដេនីស) វិនិយោគិនសញ្ជាតិកូសូវ៉ូ បានប្រកាសពីគម្រោងដាក់ពាក្យស្នើសុំចូល
រាជធានីភ្នំពេញ ៖ លោក COKOVIC DENIS (កូកូវិក ដេនីស) វិនិយោគិនសញ្ជាតិកូសូវ៉ូ បានប្រកាសពីគម្រោងដាក់ពាក្យស្នើសុំចូល
រាជធានីភ្នំពេញ ៖ លោក COKOVIC DENIS (កូកូវិក ដេនីស) វិនិយោគិនសញ្ជាតិកូសូវ៉ូ បានប្រកាសពីគម្រោងដាក់ពាក្យស្នើសុំចូលសញ្ញាតិកម្ពុជា និងគម្រោងវិនិយោគលើវិស័យជាច្រើននៅកម្ពុជា បន្ទាប់ពីខ្លួនទទួលបានយុត្តិធម៌តាមប្រព័ន្ធផ្លូវច្បាប់ ក្រោយពីតុលាការកំពូលបានប្រកាសសាលដីការជាសាធារណៈ កាលពីថ្ងៃទី៣០ ខែកញ្ញា ឆ្នាំ២០២១ថ្មីៗនេះ ដោយបិទបញ្ចប់ទាំងស្រុងលើសំណុំរឿងក្តីក្តាំរវាងលោកនិងគូទំនាស់ ដែលបានអូសបន្លាយអស់រយៈពេលជាង៤ឆ្នាំ ហើយដែលសបញ្ជាក់ច្បាស់ថា លោកមិនមានទោស និងជាបុគ្គលដែលមានភាពស្អាតស្អំ។
ក្នុងសន្និសីទសារព័ត៌មានមួយ ដែលបានធ្វើឡើងនៅល្ងាចថ្ងៃទី០១ ខែតុលា ឆ្នាំ២០២១ នៅសណ្ឋាគារសូហ្វីតែលភ្នំពេញ លោក COKOVIC DENIS បានសម្តែងការដឹងគុណចំពោះព្រះមហាក្សត្រនៃព្រះរាជាណាចក្រកម្ពុជា និងសម្តេចតេជោ ហ៊ុន សែន ក៏ដូចថ្លែងអំណរគុណចំពោះស្ថាប័នតុលាការគ្រប់កម្រិតនៅកម្ពុជា ជាពិសេសតុលាការកំពូលដែលបានផ្តល់នូវយុត្តិធម៌ជូនលោក។
លោក COKOVIC DENIS បានឆ្លើយយ៉ាងក្បោះក្បាយតបទៅនឹងសំណួរជាច្រើនរបស់អ្នកសារព័ត៌មាន ដោយបង្ហាញទស្សនៈជាវិជ្ជមានលើចំណុចល្អៗជាច្រើនរបស់ប្រទេសកម្ពុជា ជាពិសេសលើកត្តាសន្តិភាព ប្រព័ន្ធយុត្តិធម៌ នីតិរដ្ឋមានកម្រិតខ្ពស់ អភិបាលកិច្ចល្អ និង សិទ្ធិមនុស្សត្រូវបានការពារជាអតិបរមា ដែលជាក់ស្តែងគឺលោកផ្ទាល់បានឆ្លងកាត់លើបញ្ហាប្តឹងផ្តល់ និងរហូតលោកបានរងគ្រោះហើយជាប់ក្នុងពន្ធនាគារកម្ពុជាទៀតនោះ គឺលោកពិតជាមានជំនឿខ្ពស់លើប្រព័ន្ធយុត្តិធម៌របស់កម្ពុជា ហើយបើប្រៀបផ្ទឹមប្រព័ន្ធយុត្តិធម៌នៅប្រទេសមួយចំនួន គឺមិនមានកម្រិតស្មើនឹងយុត្តិធម៌របស់កម្ពុជាដែលមានកម្រិតខ្ពស់នេះបានឡើយ។ លោកថា ពេលដែលជួបបញ្ហា គឺលោកទទួលបានបទពិសោធន៍ជាក់ស្តែង ដោយដៃគូគ្រប់កម្រិតបានជួយជ្រោមជ្រែង លើកទឹកចិត្ត និងយកចិត្តទុកដាក់ជួយផ្តល់យុត្តិធម៌ជូនលោក ដែលធ្វើឱ្យលោកមានភាពកក់ក្តៅ ដែលមានស្ថាប័នដឹកនាំរបស់រដ្ឋ បានបែងចែកច្បាស់រវាងខុស និងត្រូវ ។
លោក COKOVIC DENIS បន្តថា បន្ទាប់ពីបញ្ហាត្រូវបានដោះស្រាយចប់សព្វគ្រប់ គឺដល់ពេលដែលត្រូវបន្តគម្រោងវិនិយោគរបស់ខ្លួនហើយ ដោយលោកមានគម្រោងជាច្រើននៅកម្ពុជា ហើយគម្រោងនីមួយៗ ត្រូវចាយពេលពី ៥ ទៅ៦ ឆ្នាំ ប៉ុន្តែនៅពេលដែលរៀបចំ ផែនការមេ រួចរាល់ពេលណា លោកនឹងប្រកាសលម្អិត ប៉ុន្តែពេលនេះ លោកអាចបង្ហើបបានថា គម្រោងនេះនឹងវិនិយោគទូទាំង ២៥ រាជធានី-ខេត្ត ដែលនឹងផ្តល់ការងារជូនមនុស្ស ២០ម៉ឺននាក់ ដែលមិនត្រឹមតែនឹងផ្តល់ការងារជូនពលរដ្ឋកម្ពុជានៅក្នុងស្រុក ប៉ុណ្ណោះទេ តែលោកថា នឹងទាកទាញកំលាំងជំនាញរបស់កម្ពុជារាប់សែននាក់ ដែលកំពុងបំពេញការងារនៅក្រៅប្រទេសឱ្យវិលត្រឡប់មកធ្វើការនៅកម្ពុជាវិញទៀតផង។
លោក COKOVIC DENIS បានបង្ហាញពីបំណងគៀងគរដៃគូវិនិយោគពីប្រទេសជាច្រើនឱ្យមកវិនិយោគនៅកម្ពុជា ដោយលោកបានបញ្ជាក់ពីសក្តានុពលវិនិយោគនៅកម្ពុជាយ៉ាងដូច្នេះថា៖
«កម្ពុជានិងរដ្ឋាភិបាលបច្ចុប្បន្នក្រោមការដឹកនាំរបស់សម្តេចតេជោហ៊ុន សែន កំពុងអភិវឌ្ឍន៍ប្រទេសឱ្យរីកចម្រើននិងការពារវិនិយោគិនបរទេសទាំងអស់ដែលចាប់អារម្មណ៍មកវិនិយោគនៅកម្ពុជា។ សម្រាប់វិនិយោគិនដូចខ្ញុំផ្ទាល់ ខ្ញុំបានឃើញឱកាសជាច្រើន ព្រោះកម្ពុជាគឺជាប្រទេសដែលមានមានធនធានធម្មជាតិជាច្រើន មានកម្លាំងពលកម្មក្មេងជាងគេបំផុតនៅលើពិភពលោក កម្មករវ័យក្មេងមួយចំនួនធំមានជំនាញគ្រប់វិស័យ ។
ខ្ញុំសូមអញ្ជើញអ្នកវិនិយោគមកវិនិយោគនៅកម្ពុជាលើគ្រប់វិស័យទាំងអស់ ព្រោះប្រទេសកម្ពុជាមានសក្តានុពលធំធេង ហើយគំនិតរបស់ខ្ញុំចំពោះការវិនិយោគមួយដុល្លារអាចរកបានមួយពាន់ដុល្លារ។ ហើយអ្វីដែលសំខាន់បំផុត គឺកត្តាសន្តិភាព និងស្ថេរភាពនយោបាយរបស់កម្ពុជា បើធៀបនឹងប្រទេសក្នុងតំបន់ ដែលប្រទេសទាំងនោះ មានភាពប្រែប្រួលនយោបាយមិនច្បាស់លាស់ កំពុងមានបាតុកម្ម ផ្ទុះការតវ៉ាហិ.ង្សាជាដើម ដែលទាំងនេះ តើឱ្យវិនិយោគិនដូចជាខ្ញុំ អាចមានទំនុកចិត្តយ៉ាងម៉េចទៅកើត ប៉ុន្តែបើនិយាយពីកម្ពុជាវិញ គឺពោរពេញ ដោយសន្តិភាព គឺសន្តិភាពក្រោមការដឹកនាំរបស់សម្តេចតេជោ ហ៊ុន សែន ដែលធ្វើឱ្យមានភាពប្រាកដ និងមានការទាក់ទាញទំនុកចិត្តពីអ្នកវិនិយោគិនបរទេស ព្រោះសន្តិភាពផ្តល់ឱកាសឱ្យយើងធ្វើការវិនិយោគលុយ សន្តិភាពធ្វើឱ្យមានការអភិវឌ្ឍន៍ប្រកបដោយស្ថេរភាពនិងនិរន្តរភាព ហើយសូមអរគុណសន្តិភាព និងជឿជាក់ថា សន្តិភាពនឹងនៅស្ថិតស្ថេរជាអមតៈក្នុងប្រទេសកម្ពុជា»។
នៅពេលដែលអ្នកសារព័ត៌មាន Swift News សួរថា លោកវិនិយោគនៅកម្ពុជានៅពេលនេះ លោកមិនខ្លាចផលប៉ះពាល់ពីវិបត្តិកូវីដ-១៩ ទេឬ ?
លោក COKOVIC DENIS បានឆ្លើយយ៉ាងជឿជាក់ថា លោកមិនមានការបារម្មណ៍លើបញ្ហានេះទេ ព្រោះថា រដ្ឋាភិបាលកម្ពុជាបានទទួលជោគជ័យក្នុងការចាក់វ៉ាក់សាំងជូនប្រជាពលរដ្ឋប្រមាណ៩០%ឯណោះ មួយវិញទៀតបើធៀបនឹងចំនួននៃអ្នកឆ្លងនៅតាមបណ្តាប្រទេស នានាក្នុងតំបន់និងពិភពលោក ឃើញថា កម្ពុជាគ្រប់គ្រងបានយ៉ាងល្អ ដែលយើងអាចចាត់ទុកថា ប្រព័ន្ធសុខាភិបាលកម្ពុជា គឺជាប្រព័ន្ធល្អបំផុតជាងគេទាំងអស់នៅលើពិភពលោក។
សូមរំលឹកថា លោក COKOVIC DENIS និងដៃគូ ២នាក់ទៀតមានឈ្មោះ SIRILUCK CHOOCHAR និង SOMPONG SAKULTHAP បានទទួលយុត្តិធម៌ឡើងវិញក្រោយពីមានបញ្ហារយៈពេល ៤ឆ្នាំកន្លងមក ដែលមាន ២សំណុំរឿងគឺ សំណុំរឿងទី១-កាលពីថ្ងៃទី២៦ ខែតុលា ឆ្នាំ២០១៧ លោក COKOVIC DENIS, ឈ្មោះ SIRILUCK CHOOCHAR និងឈ្មោះ SOMPONG SAKULTHAP ត្រូវបានដើមបណ្ដឹងរដ្ឋប្បវេណីម្នាក់ដាក់ពាក្យបណ្ដឹងមកកាន់សាលាដំបូងរាជធានីភ្នំពេញ ពីបទល្មើសមិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត ព្រមទាំងបទល្មើសឆបោក។ បន្ទាប់មកសាលាដំបូងរាជធានីភ្នំពេញ បានសម្រេចតាមសាលក្រមព្រហ្មទណ្ឌលេខ ៨៩២ត ចុះថ្ងៃទី២៦ ខែមីនា ឆ្នាំ២០១៩ ឲ្យជនជាប់ចោទទាំងបីនាក់រួចផុតពីបទចោទមិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត ប៉ុន្តែជនជាប់ចោទទាំង ៣នាក់ ត្រូវបានតុលាការចោទប្រកាន់ពីបទឆបោក ដោយផ្តន្ទាទោសម្នាក់ៗរយៈពេល២ឆ្នាំ។
ជនជាប់ចោទទាំង ៣នាក់ មិនសុខចិត្តក៏ប្តឹងឧទ្ធរណ៍ បន្ទាប់មកសាលាឧទ្ធរណ៍ក៏បានសម្រេចតាមសាលដីកាលេខ ៤១ ក្រ.ប ចុះថ្ងៃទី២៤ ខែឧសភា ឆ្នាំ២០១៩ ដោយតម្កល់សាលក្រមរបស់សាលាដំបូងរាជធានីភ្នំពេញទុកជាបានការ លើកលែងតែចំណុចផ្តន្ទាទោសរយៈពេល ២ឆ្នាំ លើឈ្មោះ COKOVIC DENIS មកដាក់ផ្តន្ទាគាររយៈពេល ១ឆ្នាំ១០ខែ វិញ។ ជនជាប់ចោទទាំង ៣នាក់នូវតែមិនសុខចិត្ត ក៏បន្តប្តឹងសាទុក្ខមកតុលាការកំពូល ហើយត្រូវបានតុលាការកំពូលសម្រេចតាមអំណាចសាលដីកាព្រហ្មទណ្ឌលេខ ២៣៣ IV ចុះថ្ងៃទី២៧ ខែកក្កដា ឆ្នាំ២០២០ ឲ្យជនជាប់ចោទទាំង ៣នាក់រួចផុតពីបទឆបោក។
សំណុំរឿងទី២-ដើមបណ្តឹងរដ្ឋប្បវេណី ក៏បានប្តឹងឈ្មោះ COKOVIC DENIS, ឈ្មោះ SIRILUCK CHOOCHAR និងឈ្មោះ SOMPONG SAKULTHAP ពីបទ «មិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត» ថ្មីមួយទៀត។ ប៉ុន្តែយ៉ាងនេះក្តី សាលាដំបូងរាជធានីភ្នំពេញ បានសម្រេចតាមអំណាចសាលក្រមព្រហ្មទណ្ឌលេខ ១៦១៤ហ ចុះថ្ងៃទី១១ ខែមិថុនា ឆ្នាំ២០១៩ ឲ្យជនជាប់ចោទទាំងបីនាក់ខាងលើ រួចខ្លួនពីបទចោទខាងលើផងដែរ។
ចំណែកឯដើមបណ្តឹងមិនសុខចិត្តនឹងសាលក្រមនេះ ក៏ប្តឹងឧទ្ធរណ៍ ហើយសាលាឧទ្ធរណ៍ក៏បានសម្រេចតាមសាលដីកាព្រហ្មទណ្ឌលេខ ១៥៩ ក្រ.រ ចុះថ្ងៃទី២៣ ខែវិច្ឆិកា ឆ្នាំ២០២០ ដោយច្រានចោលនូវបណ្តឹងឧទ្ធរណ៍របស់ដើមបណ្តឹងរដ្ឋប្បវេណី។ ដើមបណ្តឹងរដ្ឋប្បវេណីនូវតែមិនសុខចិត្តពីសាលដីកានេះ ក៏ធ្វើបណ្តឹងសាទុក្ខទៅតុលាការកំពូលទៀត ហើយតុលាការកំពូលក៏បានជំនុំជម្រះនៅថ្ងៃទី២៧ ខែកញ្ញា ឆ្នាំ២០២១ និងប្រកាសជាសាធារណៈនៅថ្ងៃទី៣០ ខែកញ្ញា ឆ្នាំ២០២១ តាមសាលដីកាព្រហ្មទណ្ឌលេខ ៣៣៧ VI ចុះថ្ងៃទី៣០ ខែកញ្ញា ឆ្នាំ២០២១ ដោយបដិសេធបណ្តឹងសារទុក្ខរបស់ដើមបណ្តឹង និងសម្រេចតម្កល់សាលដីការបស់សាលាឧទ្ធរណ៍ទុកជាបានការ៕
ចែករំលែកព័តមាននេះ