ដោយសារតែទីផ្សារជ្រូកកណ្ដុរធម្មជាតិ និងប្រភេទជ្រូកកណ្ដុរកាត់ជ្រូកព្រៃ កំពុងតែត្រូវប៉ាន់ និងទទួលបានការពេញនិយមទទួលទានយ៉ាងផុសផុលពីសំណាក់បងប្អូនប្រជាពលរដ្ឋ ជាពិសេស
ខេត្តមណ្ឌលគិរី ៖ ដោយសារតែទីផ្សារជ្រូកកណ្ដុរធម្មជាតិ និងប្រភេទជ្រូកកណ្ដុរកាត់ជ្រូកព្រៃ កំពុងតែត្រូវប៉ាន់ និងទទួលបានការពេញនិយមទទួលទានយ៉ាងផុសផុលពីសំណាក់បងប្អូនប្រជាពលរដ្ឋ ជាពិសេសអ្នកទេសចរ ដែលបានទៅលេងកម្សាន្តនៅខេត្តមណ្ឌលគិរី មន្ត្រីជំនាញបានលើកទឹកចិត្តពលរដ្ឋឱ្យចិញ្ចឹមជ្រូកប្រភេទនេះ ជាលក្ខណៈធំដុំ ខណៈតម្លៃកំពុងមានហាងឆេងខ្ពស់ អាចជួយសម្រួលដល់ជីវភាពរបស់ប្រជាពលរដ្ឋបានល្អប្រសើរ។
លោក សុង ឃាង ប្រធានមន្ទីរកសិកម្មខេត្តមណ្ឌលគិរី បានឲ្យដឹងថា ទោះបីជាប្រភេទជ្រូកកណ្ដុរ ឬក៏កណ្ដុរកាត់ព្រៃនេះ កំពុងមានការពេញនិយម ប៉ុន្តែនៅក្នុងខេត្តមណ្ឌលគិរី មិនទាន់មានកសិដ្ឋានចិញ្ចឹមក្នុងលក្ខណៈទ្រង់ទ្រាយធំទេ ពោលគឺមានត្រឹមតែការចិញ្ចឹមជាលក្ខណៈគ្រួសារ នៅតាមភូមិរបស់បងប្អូនជនជាតិដើមភាគតិច និងបងប្អូនជនជាតិខ្មែរមួយចំនួនប៉ុណ្ណោះ។
យ៉ាងណាក្នុងនាមលោក ថ្នាក់ដឹកនាំនៃមន្ទីរកសិកម្ម តែងលើកទឹកចិត្ត និងផ្ដល់ជា ក្រុមការងារបច្ចេកទេសចុះណែនាំ ដល់បងប្អូនប្រជាកសិករ ដែលមានចំណាប់អារម្មណ៍ក្នុងការចិញ្ចឹមជ្រូក អាចយកបច្ចេកទេសល្អៗពីមន្ត្រីជំនាញដើម្បីទៅអនុវត្ត ក្នុងការបង្កើនប្រសិទ្ធភាពផលិតផលឲ្យកាន់តែមានគុណភាពទៅតាមតម្រូវការទីផ្សារ ។
ចំណែកលោក ចាន់ ម៉ារី អាជីវករខ្វៃជ្រូកលក់នៅក្រុងសែនមនោរម្យ ខេត្តមណ្ឌលគិរី បានឲ្យដឹងថា រៀងរាល់ថ្ងៃ ជ្រូកកណ្ដុរគឺពិតជាពេញនិយមខ្លាំងមែន ដោយលោកអាចលក់ចាប់ពី០២ ទៅ០៥ក្បាល ស្ទើរតែមិនលស់មួយថ្ងៃណាសោះ។ ប៉ុន្តែនៅអំឡុងរយៈពេលនៃថ្ងៃបុណ្យភ្ជុំបិណ្ឌកន្លងទៅនេះ ហើយមានថ្ងៃឈប់សម្រាកច្រើន លោកអាចលក់ជ្រូកកណ្ដុរក្នុងមួយថ្ងៃ៣០ក្បាល ទៅ ៦០ ក្បាល ហើយមិនតែប៉ុណ្ណោះ ព្រោះតែមានការបញ្ជាទិញពីសំណាក់អតិថិជនច្រើនពេក លោកក៏បានផ្អាកការទទួលសេវាអាំងជ្រូក ដោយសារតែធ្វើមិនទាន់។
លោកម៉ារី បានបន្តថា ជ្រូកដែលលោកទទួលខ្វៃនេះ មានពីរប្រភេទ មួយជាប្រភេទជាជ្រូកកណ្ដុរសុទ្ធធម្មជាតិ និងមួយប្រភេទទៀតជាពូជជ្រូកកណ្ដុរកាត់ជ្រូកព្រៃ ជ្រូកទាំងពីរនេះមានតម្លៃខុសគ្នាបន្តិចបន្តួច។ ជ្រូកកណ្ដុរ នៅពេលខ្វៃរួចអាចមានតម្លៃប៉ុន្មាន ៥០ ទៅ ៦០ ម៉ឺនរៀល ចំណែកជ្រូកកណ្ដុរកាត់ជ្រូកព្រៃនៅពេលខ្វៃរួច មានតម្លៃពី ៦០ ទៅ ៧០ ម៉ឺនរៀល។
អាជីវករខ្វៃជ្រូកក៏បានបញ្ជាក់ថា លោកបានដើរប្រមូលទិញជ្រូកនៅតាមភូមិឋានរបស់អ្នកស្រុកនៅតាមទីតាំងនានាជុំវិញខេត្តមណ្ឌលគិរី ហើយខ្លះទៀតក៏ត្រូវបានផ្ញើមកពីខាងខេត្តរតនគិរី ដើម្បីបំពេញតម្រូវការជាក់ស្ដែងផងដែរ។ ដោយសារតែការពេញនិយមទទួលទានពីសំណាក់បងប្អូនប្រជាពលរដ្ឋស្ទើរពេញផ្ទៃប្រទេស ជ្រូកកណ្ដុរធម្មជាតិនេះ បានជួយឲ្យបងប្អូនប្រជាកសិករមួយផ្នែក ដែលកំពុងតែចិញ្ចឹម និងបង្កាត់ពូជជ្រូកប្រភេទនេះ ទទួលបាននូវកម្រិតជីវភាពល្អប្រសើរ ដោយសារកន្លងមកជ្រូកប្រភេទនេះ បើគេទិញមានតម្លៃមួយក្បាលតែ ១០ ទៅ ១៥ ម៉ឺនរៀលប៉ុណ្ណោះ។
ចែករំលែកព័តមាននេះ