ខេត្តស្វាយរៀង៖ ស្ត្រីរងគ្រោះម្នាក់ ត្រូវប្ដី កា.ប់ប្រហារពីរដាវ បណ្ដាលឲ្យរងរបួសធ្ងន់ តែបានអាជ្ញាធរ និងប្រជាជនជិតខាង ជួយយកអាសារ ម្នីម្នាបញ្ជូនទៅសង្គ្រោះបន្ទាន់ នៅមន្ទីរពេទ្យខេត្តស្វាយរៀង។…
ខេត្តស្វាយរៀង៖ ស្ត្រីរងគ្រោះម្នាក់ ត្រូវប្ដី កា.ប់ប្រហារពីរដាវ បណ្ដាលឲ្យរងរបួសធ្ងន់ តែបានអាជ្ញាធរ និងប្រជាជនជិតខាង ជួយយកអាសារ ម្នីម្នាបញ្ជូនទៅសង្គ្រោះបន្ទាន់ នៅមន្ទីរពេទ្យខេត្តស្វាយរៀង។ រីឯជនកំណា.ច ជាប្ដី ក្រោយពេលកា.ប់ប្រពន្ធហើយ ក៏លោតទឹក បំណងរត់គេចខ្លួន ប៉ុន្តែកម្មពៀរមកដល់ទាន់ហន់ ក៏ត្រូវលង់ទឹកស្លា.ប់តែម្ដង។
ហេតុការណ៍នេះ កើតឡើង នៅយប់ថ្ងៃទី៩ ខែតុលា ឆ្នាំ២០២១ នៅចំណុចភូមិអង្គាសដី ឃុំតាសួស ស្រុកស្វាយជ្រំ ខេត្តស្វាយរៀង។
លោក ពិន អាន អធិការនៃអធិការដ្ឋាននគរបាលស្រុកស្វាយជ្រំ បានឱ្យដឹងថា មូលហេតុ ដែលនាំឱ្យកើតអំពើហិង្សានេះ គឺដើមឡើយ ប្ដីនោះ ស្រវឹងស្រា ហើយក៏មានជម្លោះពាក្យសម្ដីជាមួយប្រពន្ធ ទើបឈានដល់ការកាប់ប្រហារ ទៅលើប្រពន្ធរបស់ខ្លួនតែម្ដង។
ប្រភពបន្តថា ក្រោយពីកាប់ប្រពន្ធឲ្យរងរបួសហើយ ប្ដីបានរត់ទៅខាងក្រោយផ្ទះ ដោយផ្លោះរបង ហើយលោតចូលក្នុងទឹក នៅស្ពានព្រែកតាសួស ខណៈដែលទឹក កំពុងហូរខ្លាំង បណ្តាលឲ្យជនកំណាចនេះ បាត់ខ្លួន ទៅតាមទឹកហូរតែម្តង។ រីឯស្ត្រីរងគ្រោះ ត្រូវបានក្រុមគ្រួសារ បញ្ជូនទៅសង្គ្រោះ នៅមន្ទីរពេទ្យខេត្តស្វាយរៀងភ្លាមៗ។
លោកអធិការនគរបាល បានបន្តទៀតថា នៅយប់កើតហេតុ ប្រជាពលរដ្ឋនឹកស្មានថា ប្តីនោះ រត់គេចខ្លួន តែមិននឹកស្មានថា ត្រូវលង់ទឹកនោះទេ ទើបមិនបានរកក្នុងទឹកនោះទេ ព្រោះព្រឹកឡើង ទើបអ្នកភូមិ ប្រទះឃើញសពរបស់ជនកំណាច ជាប្ដី អណ្តែតទឹកនៅវេលាម៉ោង ១០ព្រឹក ថ្ងៃទី១០ ខែតុលា នៅចំណុចក្បែរស្ពានព្រែកតាសួស ភូមិអង្គាសដី ឃុំតាសួស ស្រុកស្វាយជ្រំ នៅជិតកន្លែងបុរសនោះ លោតចូលក្នុងទឹក។
លោកអធិការ ពិន អាន ឲ្យដឹងទៀតថា ស្ត្រីរងគ្រោះ ជាប្រពន្ធ មានឈ្មោះ ប្រែង ប៊ុនណារី អាយុ ៤២ឆ្នាំ មុខរបរកម្មកររោងចក្រ រស់នៅភូមិអង្គាស់ដី ឃុំតាសួស ស្រុកស្វាយជ្រំ រងរបួសធ្ងន់ធ្ងរ។ ចំណែកជនសង្ស័យ មានឈ្មោះ ម៉ៅ ភារុន អាយុ ៣៧ឆ្នាំ មុខរបរ កសិករ មានទីលំនៅភូមិឃុំកើតខាងលើ។
លោកអធិការ បានបញ្ជាក់ថា ជនសង្ស័យ ដែលកាប់ប្រពន្ធនេះ ធ្លាប់វាយតប់ប្រពន្ធជាច្រើនលើកច្រើនសាមកហើយ តែលើកនេះ ឈានដល់ប្រើអំពើហិង្សា កាប់ប្រហារ ធ្វើឲ្យប្រពន្ធរបស់ខ្លួន រងរបួសយ៉ាងដំណំ។
លោក ពិន អាន បានបន្តថា ក្រោយពីរកឃើញសាកសពជនសង្ស័យ ដែលកាប់ប្រហារប្រពន្ធរួចហើយ សមត្ថកិច្ច បានបង្កើតគណៈកម្មការមួយ មានការចូលរួមពីសមត្ថកិច្ចជំនាញ និងគ្រូពេទ្យ ដើម្បីធ្វើកោសល្យវិច្ច័យ។ ក្នុងនោះ សមត្ថកិច្ច សន្និដ្ឋានថា ជនសង្ស័យ ពិតជាបានស្លាប់ ដោយសារលង់ទឹកពិតប្រាកដមែន។
អ្នកភូមិបានឲ្យដឹងថា មុនពេលកើតហេតុ គេឃើញជនសង្ស័យ ជាប្ដី បានចេញពីវង់ផឹកស៊ី ដោយអាការស្រវឹងជោក និងបានត្រឡប់មកដល់ផ្ទះ រករឿងប្រពន្ធ បង្កឈ្លោះប្រកែក ទាស់ពាក្យសម្ដីគ្នា។ ក្រោយមក ស្រាប់តែឃើញប្តី បានទាញយកដាវ កាប់ប្រពន្ធ ត្រូវចំនួន ២ដាវ ត្រូវចំគុម្ពត្រចៀកស្តាំ ១ដាវ និងចំកដៃខាងឆ្វេង ១ដាវ បណ្តាលឲ្យរងរបួសធ្ងន់ បង្កការភ្ញាក់ផ្អើលតែម្ដង។
ជនរងគ្រោះ កំពុងសម្រាកព្យាបាលនៅមន្ទីរពេទ្យខេត្តស្វាយរៀង រីឯសាកសពជនសង្ស័យ ត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យ តែខាងសាច់ញាតិឪពុកម្ដាយ មិនទទួលយក។ ដូច្នេះសមត្ថកិច្ច និងអាជ្ញាធរ បានសម្រេចធ្វើការបញ្ចុះសពនៅវត្តតាសួស ស្រុកស្វាយជ្រំតែម្ដង៕ វ៉ាន់ ប៊ុនធឿន
ចែករំលែកព័តមាននេះ