រាជធានីភ្នំពេញ ៖ មានការភ្ញាក់ផ្អើលរហូតដល់កកស្ទះចរាចរណ៍អស់ជាច្រើនម៉ោងនៅមុខហាងអ៊ីនធើរណេតចិន ទីតាំងផ្ទះលេខ៣២Eo វិថីហ្សាលដឺហ្គោល កែងមហាវិថីព្រះមុនីវង្ស ស្ថិតក្នុងសង្កាត់ផ្សារថ្មីទី២ ខណ្ឌដូនពេញ កាលពីថ្ងៃទី៩ មីនា ២០១១ វេលាម៉ោង១២ថ្ងៃត្រង់ ដោយសារបុរសចិនដីគោកម្នាក់ញៀនថ្នាំបានរត់ចូលទៅក្នុងហាងអ៊ីនធើរណេតនោះ ហើយឡើងដល់ជាន់ទី២ ស្រែកឱ្យគេជួយ និងគប់កញ្ចក់ចុះមកក្រោមថ្នល់បែកខ្ចាត់ខ្ចាយ ។
សមត្ថកិច្ចបាននិយាយថា នៅវេលាម៉ោងប្រហែលជា១១ថ្ងៃត្រង់ ថ្ងៃកើតហេតុ ស្រាប់តែមានបុរសជនជាតិចិនម្នាក់អាយុជាង២០ឆ្នាំ បានរត់ឆ្លងភ្លើងស្តុប (អតីតសណ្ឋាគារស) ពីទិសខាងលិច ព្រមទាំងស្រែកឱ្យគេជួយ តែមិនដឹងហេតុអ្វីឡើយ និងមានទឹកមុខស្លេកស្លាំង លុះមកដល់មុខហាងអ៊ីនធើរណេតផ្ទះលេខ៣២Eo កែងមហាវិថីព្រះមុនីវង្ស និងវិថីហ្សាលដឺហ្គោ ស្ថិតក្នុងសង្កាត់ផ្សារថ្មីទី២ ខណ្ឌដូនពេញ ក៏សម្រុកចូលផ្ទះនោះ ហើយរត់ឡើងជាន់ទី២ ។
បុរសនោះបានបិទទ្វារពីក្នុង ហើយឈរមុខហាងស្រែកឆោឡោ និងគប់កញ្ចក់មកលើផ្លូវបង្កឱ្យកកស្ទះចរាចរណ៍ ព្រមទាំងធ្វើឱ្យភ្ញាក់ផ្អើលប្រជាពលរដ្ឋឈរមើលយ៉ាងកកកុញ ។ ភ្លាមៗកម្លាំងនគរបាលប៉ុស្តិ៍រដ្ឋបាលផ្សារថ្មីទី២ ចុះទៅដល់ហាងកើតហេតុ និងសហការជាមួយម្ចាស់ហាងធ្វើការអង្វរករដល់បុរសជនជាតិចិននោះឱ្យចុះមកក្រោមវិញ តែគេមិនព្រម គឺឈរស្រែកឱ្យជួយមិនដឹងមូលហេតុសោះ ។ បន្តិចមកទៀត ទើបសមត្ថកិច្ចសម្រេចចិត្តសម្រុកចូលទៅចាប់ជននោះ វាយខ្នោះយកចុះក្រោម រួចបញ្ជូនទៅការិយាល័យគ្រប់គ្រងជនបរទេសនៃស្នងការដ្ឋាននគរបាលរាជធានីភ្នំពេញ ៕
ចែករំលែកព័តមាននេះ