សម្ភារៈ និងហាងចំនួន២កន្លែងត្រូវបានខូចខាតទាំងស្រុង និងផ្ទះប្រជាពលរដ្ឋផ្សេងទៀតដែលនៅក្បែរគ្នានោះក៏រងការខូចខាតជាមធ្យម នៅក្នុងហេតុការណ៍គ្រោះអគ្គិភ័យមួយ បានកើតឡើងនៅ
ក្រុងកោះរ៉ុង ៖ សម្ភារៈ និងហាងចំនួន២កន្លែងត្រូវបានខូចខាតទាំងស្រុង និងផ្ទះប្រជាពលរដ្ឋផ្សេងទៀតដែលនៅក្បែរគ្នានោះក៏រងការខូចខាតជាមធ្យម នៅក្នុងហេតុការណ៍គ្រោះអគ្គិភ័យមួយ បានកើតឡើងនៅវេលាម៉ោងជាង៨ព្រឹក ថ្ងៃទី០៧ ខែតុលា ឆ្នាំ២០២១ ស្ថិតនៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ។
បើតាមលោក នួន ប៊ុនថុល អភិបាលក្រុងកោះរ៉ុង បានឲ្យដឹងថា អគ្គិភ័យនេះ ផ្តើមចេញពីការធ្លាយធុងហ្គាស ប៉ះជាមួយនឹងភ្លើងចង្ក្រានបាយនៅក្នុងហាងលក់បាយ ដែលសំណង់នៅក្នុងហាងនេះ គឺភាគច្រើនសង់អំពីឈើ និងឫស្សី ។ បន្ទាប់មក ភ្លើងក៏បានឆេះរាលដាលទៅដល់ហាង និងផ្ទះពលរដ្ឋខ្លះទៀតដែលនៅក្បែរគ្នានោះ បណ្តាលឱ្យរងខូចខាតតែម្តង ។ ក្រោយមកត្រូវបានសមត្ថកិច្ច និងពលរដ្ឋនៅក្បែរនោះនាំគ្នាទៅជួយពន្លត់ភ្លើង ដើម្បីកុំឲ្យឆេះរាលដាលបន្តទៀត។
លោកអភិបាលក្រុងបន្តថា ហាងទី១ ដែលផ្តើមមានអគ្គិភ័យនេះ បានខូចខាតទាំងស្រុង និងហាងមួយទៀតដែលនៅជាប់គ្នាក៏ខូចខាតទាំងស្រុងផងដែរ ក្នុងនោះក៏មានផ្ទះពលរដ្ឋមួយចំនួនទៀតដែលនៅក្បែរៗគ្នានោះ ក៏រងការខូចខាតខ្លះដែរ ហើយនៅក្នុងហេតុការណ៍អគ្គិភ័យនេះក៏បណ្តាលឱ្យមានមនុស្សម្នាក់ ដែលជាចុងភៅ រងរបួសរលាកភ្លើង ។
បើតាមអាជ្ញាធរបានបញ្ជាក់ទៀតថា អគ្គិភ័យនេះបណ្តាលមកពីផ្ទុះធុងហ្គាសចេញពីផ្ទះឈ្មោះ ហាប់ សៀកលី ដែលបានជួលទៅអោយឈ្មោះ ប៊ុន ថន បើកមុខរបរលក់បាយ ។ ហើយនៅក្នុងហេតុការណ៍អគ្គិភ័យនេះឆេះរាលដាលបំផ្លាញមានចំនួន៤ល្វែង ដូចជា ៖
១-ផ្ទះរបស់ឈ្មោះហាប់ សៀកលី ឆេះអស់ពីរល្វែង ក្នុងនោះមួយល្វែងឆេះទាំងស្រុង និងមួយល្វែងទៀតឆេះអស់១០ភាគរយ (ត្រង់ដំបូលផ្ទះ) ដែលមានទំហំ៥x២០ម៉ែត្រ សាងសង់ដោយដើមឬស្សី ដំបូលប្រក់ស័ង្កសី និងហ្វ៊ីប្រូស៊ីម៉ងត៍។
២-ផ្ទះរបស់ឈ្មោះ ឃួន កា ឆេះអស់ពីរល្វែង ក្នុងនោះមួយល្វែងឆេះអស់៦០ភាគរយ ផ្នែកខាងជាន់លើ និងមួយល្វែងទៀត ឆេះអស់១០ភាគរយ ដែលមានទំហំ៥x២០ម៉ែត្រ សាងសង់អំពីឈើដំបូលប្រក់ស័ង្កសី និងមួយល្វែងទៀតប្រក់ហ្វ៊ីប្រូស៊ីម៉ង់ត៍ ខូចខាតអស់១០ ភាគរយ (ត្រង់ដំបូលផ្ទះ) ចំណែកសម្ភារៈប្រើប្រាស់ក្នុងផ្ទះខូចខាតទាំងស្រុង។
លោក គួច ចំរើន អភិបាលខេត្តព្រះសីហនុ និងជាប្រធានគណៈកម្មាធិការសាខាកាកបាទក្រហមខេត្ត បន្ទាប់ទទួលដំណឹងអំពីអគ្គិភ័យលើកោះរ៉ុងនោះមក លោកក៏បានដឹកនាំមន្ត្រីចុះសួរសុខទុក្ខ និងនាំយកជំនួយទៅឧបត្ថម្ភដល់គ្រួសាររងគ្រោះភ្លាមៗ ដោយសារអគ្គិភ័យបានឆាបឆេះផ្ទះ ស្ថិតនោក្នុងភូមិកោះតូច សង្កាត់កោះរ៉ុងសន្លឹម ក្រុងកោះរ៉ុងនេះ ៕
ចែករំលែកព័តមាននេះ