ខេត្តមណ្ឌលគិរី ៖ មេដាយថ្នាក់សេនា និងថ្នាក់ការពារជាតិត្រូវបានបំពាក់ជូនចំពោះលោកស្នងការ ស្នងការរង និងនាយផ្នែក នាយរងផ្នែក សរុបចំនួន២៧នាក់ ដែលពិធីនេះប្រារព្ធធ្វើឡើងនៅក្នុងបរិវេណនៃស្នងការដ្ឋាននគរបាលខេត្តមណ្ឌលគិរី កាលពីថ្ងៃទី១ មីនា ក្រោមអធិបតីភាពលោកម៉ៅ ច័ន្ទដារ៉ា អគ្គស្នងការរងនគរបាលជាតិ និងមានការចូលរួមពីលោកស្វាយ សំអ៊ាង អភិបាលរងខេត្ត លោកអេង ប៊ុនហ៊ាង ប្រធានក្រុមប្រឹក្សាខេត្ត លោកអឹម សុផាន ព្រះរាជអាជ្ញាសាលាដំបូងខេត្ត ព្រមទាំងនាយផ្នែក នាយរងផ្នែក នាយ នាយរងប៉ុស្តិ៍ទូទាំងខេត្ត ។
លោកម៉ៅ ច័ន្ទដារ៉ា អគ្គស្នងការរងនគរបាលជាតិបានមានប្រសាសន៍ផ្តាំផ្ញើទៅកាន់ស្នងការ ស្នងការរង នាយផ្នែក នាយរងផ្នែក និងកងកម្លាំងទាំងអស់ ខិតខំជំរុញការងារឱ្យបានល្អប្រសើរជាងនេះទៀត ដូចជាទាក់ទងទៅនឹងការអនុវត្តផែនការភូមិ-ឃុំមានសុវត្ថិភាព ការបង្ក្រាបបទល្មើសព្រៃឈើ និងការបង្ក្រាបបទល្មើសផ្សេងៗជុំវិញខេត្ត។ លោកបានបញ្ជាក់ដោយសង្កត់ធ្ងន់ទៅលើលោកអភិបាលខេត្ត និងក្រុមប្រឹក្សាខេត្តសុំឱ្យជួយពិនិត្យ និងតាមដានរាល់ការងារដែលបានដាក់ចុះ មិនមែនប៉ូលិសតែមួយអង្គភាពអាចមើលសព្វជ្រុងជ្រោយបានទេ គឺត្រូវតែចេះសហការគ្នាទៅវិញទៅមកដើម្បីសម្រេចទិសដៅជាយុទ្ធសាស្ត្រ ៕
ចែករំលែកព័តមាននេះ