រាជធានីភ្នំពេញ ៖ បើទោះបីជាអត្រានៃការឆ្លងកូវីដ-១៩ សម្រាប់ថ្ងៃម្សិលមិញធ្លាក់ចុះខ្លាំងមកត្រឹមតែ២៣២នាក់ ក្តីតែបើក្រឡេកមើលតួលេខនៃការឆ្លងពេញមួយខែកញ្ញា ឆ្នាំ២០២១ គឺមានចំនួនច្រើនសរុប៩៤០២នាក់កើនឡើងប្រមាណ២៤,៤ ភាគរយធៀបនឹងរយៈពេលដូចគ្នានៃខែសីហា ។ ប្រការដែលតួលេខនៃការឆ្លងសរុបរយៈពេល៣០ថ្ងៃនៃខែកញ្ញា…
រាជធានីភ្នំពេញ ៖ បើទោះបីជាអត្រានៃការឆ្លងកូវីដ-១៩ សម្រាប់ថ្ងៃម្សិលមិញធ្លាក់ចុះខ្លាំងមកត្រឹមតែ២៣២នាក់ ក្តីតែបើក្រឡេកមើលតួលេខនៃការឆ្លងពេញមួយខែកញ្ញា ឆ្នាំ២០២១ គឺមានចំនួនច្រើនសរុប៩៤០២នាក់កើនឡើងប្រមាណ២៤,៤ ភាគរយធៀបនឹងរយៈពេលដូចគ្នានៃខែសីហា ។
ប្រការដែលតួលេខនៃការឆ្លងសរុបរយៈពេល៣០ថ្ងៃនៃខែកញ្ញា មានការកើនឡើងខ្លាំង គឺដោយសារតែរយៈពេល៧ថ្ងៃចុងក្រោយនេះការឆ្លងជំងឺរាតត្បាតមួយនេះបានហក់ឡើងខ្ពស់ពីរង្វង់ ៨០០ ទៅ ៩០០ នាក់ក្នុងមួយថ្ងៃ ។
យោងតាមប្រកាសព័ត៌មានរបស់ក្រសួងសុខាភិបាល ចេញថ្ងៃទី ១ ខែតុលា ឆ្នាំ២០២១ នេះបានបញ្ជាក់ថា អត្រានៃការឆ្លងកូវីដ-១៩ កាលពីថ្ងៃទី ៣០ ខែសីហា គឺរកឃើញតែ ២៣២ នាក់ (ក្នុងនោះករណីនាំចូលមានចំនួន ៤៥នាក់) ចំនួនជាសះស្បើយ ៥៥៦ នាក់ និងចំនួនអ្នកស្លាប់ថ្មី ១៧ នាក់ ។
យ៉ាងណាមិញ ក្រសួងសុខាភិបាលមិនបានបញ្ជាក់អំពីមូលហេតុនៃការថយចុះយ៉ាងច្រើននៃការអត្រាឆ្លងប្រចាំថ្ងៃកាលពីថ្ងៃទី ៣០ ខែកញ្ញា ម្សិលមិញទេ ។ ជាមួយនឹងការរកឃើញការឆ្លងមានការថយចុះយ៉ាងគំហុកនេះផងដែរ មានមតិខ្លះលើកឡើងថា ដោយសារតែជាលទ្ធផលតេស្តចេញពីលទ្ធផលតេស្តដោយម៉ាស៊ីនធំ (PCR) មិនមានការតេស្តដោយ Rapit Test ទៀត ហើយបើទោះបីជាតូលេខឆ្លងប្រចាំថ្ងៃបានថយចុះក៏ពិតមែន ហើយបើទោះបីជាបានចាក់វ៉ាក់សាំងបង្ការកូវីដ-១៩ ហើយក៏ពិតមែន សូមបងប្អូនបន្តការពារឲ្យបានខ្ពស់ និងចូលរួមអនុវត្តវិធានការ ៣ការពារ ៣កុំ បន្តទៀត តោងកុំមានការធ្វេសប្រហែសឱ្យសោះ ព្រោះអ្នកអាចភ្លេចកូវីដ-១៩ តែវីរុសឆ្លងមួយនេះ មិនភ្លេចអ្នកនោះទេ ។
តាមរយៈការបូកសរុបការឆ្លងប្រចាំថ្ងៃ យើងឃើញថា ការឆ្លងកូវីដ-១៩ សរុបពេញមួយខែ កញ្ញា ឆ្នាំ២០២១ មានចំនួន ១៩ ៤០២ នាក់ កើនឡើង ២៤,៤ ភាគរយធៀបនឹងរយៈពេលដូចគ្នានៃខែសីហា ដែលមានចំនួនឆ្លងកូវីដ-១៩ សរុប ១៥ ៥៩៦ នាក់ ។
ការព្យាបាលជាសះស្បើយក្នុងខែកញ្ញា មានចំនួន ១៤ ២៦៩ នាក់ (ថយចុះ ២២,៣ ភាគរយ ធៀបនឹងរយៈពេលដូចគ្នានៃខែសីហាដែលមានចំនួន ១៨ ៣៦០) និងករណីស្លាប់សរុបខែកញ្ញា មានចំនួន ៤២០នាក់ (ថយចុះ ១៥,៣២ ភាគរយ ធៀបខែសីហា ដែលមានអ្នកស្លាប់សរុប ៤៩៦ នាក់) ។
សូមបញ្ជាក់ថា កម្ពុជាបានរកឃើញករណីវិជ្ជមានកូវីដ-១៩ ដំបូងបំផុតកាលពីថ្ងៃទី ២៧ ខែមករា ឆ្នាំ២០២១ លើបុរសជនជាតិចិន នៅខេត្តព្រះសីហនុ ។ គិតត្រឹមបំណាច់ខែ កញ្ញា ឆ្នាំ២០២១ កម្ពុជាបានកត់ត្រាអ្នកឆ្លងកូវីដ-១៩ សរុបឡើងដល់ ១១២ ៨៨៣នាក់ អ្នកជាសះស្បើយសរុប ១០៣ ៣៨៣នាក់ និង កម្ពុជាមានករណីស្លាប់ដំបូងដោយសារជំងឺកូវីដ-១៩ កាលពីថ្ងៃទី ១១ ខែមីនា ឆ្នាំ២០២១ ដែលគិតមកត្រឹមបំណាច់ខែកញ្ញា ឆ្នាំ២០២១ អ្នកស្លាប់សរុបបានឡើងដល់ ២៣៣៦នាក់ ៕
ចែករំលែកព័តមាននេះ