រាជធានីភ្នំពេញ ៖ យោងតាមលិខិតមួយច្បាប់របស់លោករ៉ុង ឈុន ប្រធានសមាគមគ្រូបង្រៀនកម្ពុជា ចុះថ្ងៃទី៧ មីនា ២០១១ ជូនសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកោះសន្តិភាពបានទទួលឱ្យដឹងថា កម្មវត្ថុសំណើសុំឱ្យផ្តល់ប្រាក់ឧបត្ថម្ភជីវភាពចំនួន២០.០០០រៀល ក្នុងមួយខែជូនដល់លោកគ្រូ អ្នកគ្រូសម្រាប់ឆ្នាំ២០១១ ។
លិខិតដដែលបន្តថា លោកមានកិតិ្តយសសូមជំរាបជូនសម្តេចតេជោនាយករដ្ឋមន្រ្តីមេត្តាជ្រាបថា កាលពីឆ្នាំ២០០៩ និង២០១០ សម្តេចនាយករដ្ឋមន្រ្តី បានផ្តល់ប្រាក់ឧបត្ថម្ភជីវភាពចំនួន២០.០០០រៀល ជូនលោកគ្រូ អ្នកគ្រូម្នាក់ៗ ដើម្បីសំរួលដល់ជីវភាពរស់នៅប្រចាំថ្ងៃរបស់ពួកគាត់ក្នុងអំឡុងពេលមានវិបតិ្តសេដ្ឋកិច្ចពិភពលោក។ ទាក់ទិននឹងបញ្ហាប្រាក់ឧបត្ថម្ភជីវភាពនេះ មានគ្រូបង្រៀនយ៉ាងច្រើនបានលើកសំណើសុំឲ្យជួយ អន្តរាគមន៍មកសម្តចតេជោដោយសុំឲ្យសម្តេចបន្តឧបត្ថម្ភជីវភាពសំរាប់ឆ្នាំ២០១១នេះទៀត។
លោករ៉ុង ឈុន បន្តទៀតថា យោងតាមសំណូមពរបស់លោកគ្រូអ្នកគ្រូ សមាគមឱ្យបង្រៀន កម្ពុជា ឯករាជ្យសូមឲ្យសម្តេចតេជោជួយផ្តល់ប្រាក់ ឧបត្ថម្ភជីវភាពជូនលោកគ្រូ អ្នកគ្រូ ដូចឆ្នាំ២០០៩ និង២០១០បន្តទៀត ដើម្បីសំរួលដល់ជីវភាពរបស់ពួកគាត់ ព្រោះថាបច្ចុប្បន្ននេះតម្លៃទំនិញមានការឡើងថ្លៃខ្ពស់ដូចជា តម្លៃប្រេងឥន្ធនៈ៥.២០០រៀលក្នុងមួយលីតមិនធ្លាប់មាន បង្កឱ្យគ្រូបង្រៀនបាននឹងកំពុងប្រឈមចំពោះជីវភាពរស់នៅយ៉ាងធ្ងន់ធ្ងរ៕
ចែករំលែកព័តមាននេះ