ខេត្តស្វាយរៀង ៖ រយៈពេលបួនថ្ងៃហើយដែលសមត្ថកិច្ចតាមប្រមាញ់ស្ត្រីម្នាក់ដែលជាជនសង្ស័យ និងបក្សពួក ប្រើល្បិចយកខ្សែ.កក្រឡៃទៅប្តូរយកខ្សែ.កមាសទម្ងន់១ដំឡឹងមាសពីផ្ទះលក់មាសបានសម្រេច ធ្វើឲ្យមានការភ្ញាក់ផ្អើលនៅក្នុងផ្សារកំពង់រោទ៍ ។ហើយក្រោយមក សមត្ថកិច្ចបានពិនិត្យកាម៉េរាសុវត្ថិភាពឃើញមុខស្ត្រីជនសង្ស័យហើយ ក៏ដាក់កម្លាំងតាមស្រាវជ្រាវ ក៏ប៉ុន្តែពុំទាន់បានតម្រុយនៅឡើយ។
បើតាមសមត្ថកិច្ចនគរបាលស្រុកកំពង់រោទ៍បានឲ្យដឹងថា ករណីនេះ បានកើតឡើងកាលពីវេលាម៉ោង៨និង៣៥នាទីព្រឹកថ្ងៃទី២៥កញ្ញា ឆ្នាំ២០២១ នៅផ្សារកំពង់រោទ៍ ស្ថិតនៅក្នុងភូមិស្វាយអាណាត ឃុំញរ ស្រុកកំពង់រោទិ៍ ខេត្តស្វាយរៀង។ សមត្ថកិច្ចបានឱ្យដឹងទៀតថា ម្ចាស់ផ្ទះរងគ្រោះមានឈ្មោះលាង ហៃ ភេទប្រុស អាយុ៥៧ឆ្នាំ រស់នៅភូមិស្វាយអាណាត ឃុំញរ ស្រុកកំពង់រោទិ៍ត្រូវស្ត្រីម្នាក់បន្លំយកខ្សែ.កមាសអស់១តម្លឹង។
ប្រភពបន្តថា ក្រោយកើតហេតុ សមត្ថកិច្ចបានទទួលព័ត៌មានតាមទូរស័ព្ទពីម្ចាស់ផ្ទះលក់មាសថា មានករណីឆបោកយកមាស នៅផ្សារកំពង់រោទិ៍ ទើបលោកអធិការនៃអធិការដ្ឋាននគរបាលស្រុកកំពង់រោទ៌បានបញ្ជាកម្លាំងសមត្ថកិច្ចនគរបាលស្រុក សហការជាមួយកម្លាំងកងរាជអាវុធហត្ថស្រុក និងសហការជាមួយកម្លាំងនគបាលប៉ុស្តិ៍រដ្ឋបាលឃុំញរ និងកម្លាំងជំនាញបានចុះធ្វើការស្រាវជ្រាវដល់ទីតាំងកើតហេតុ។
ដោយធ្វើការស្រាវជ្រាវតាមរយៈការឆែកកាមេរ៉ាសុវត្ថិភាព យើងកំណត់ថា មានមនុស្សម្នាក់ភេទស្រី ចុះពីលើរថយន្តម៉ាកកាមរី (CAMRY) គូទហើម ពណ៌សំបកឪឡឹក បានដើរសំដៅទៅកន្លែងលក់មាសនៅផ្ទះរបស់ឈ្មោះ ញ៉ែម លាងហៃ បន្ទាប់មកបានយកខ្សែ.កមាសចំនួន១តម្លឹងទៅលក់។ បន្ទាប់មក ម្ចាស់ផ្ទះបានដុតមើលឃើញថា ពិតជាមាសពិតមែន រួចក៏ហុចឲ្យជនសង្ស័យដែលមកលក់នោះវិញ ហើយជនរងគ្រោះបានរាប់លុយឲ្យថ្លៃទិញមាស ប៉ុន្តែខណៈនោះស្រាប់តែជនសង្ស័យឃើញឱកាសល្អក៏ឆ្លៀតយកខ្សែ.កផ្សេងមួយទៀតពីក្នុងខ្លួនមកប្ដូរ យកខ្សែកមាសពិតនេះវិញ ហើយប្តូរខ្សែក ក្រឡៃទៅឲ្យអ្នកលក់មាសតែម្ដង។
ប្រភពបន្តថា ក្រោយពីបានខ្សែកហើយស្ត្រីដែលជាជនសង្ស័យក៏ដើរសំដៅមករករថយន្តម៉ាកកាមរី (CAMRY)គូទហើម ពណ៌សំបកឪឡឹក រួចក៏ឡេីងជិះ រថយន្តគេចខ្លួនទៅទិសខាងជើងឆ្ពោះមកផ្លូវជាតិ លេខ៣១៤D បាត់ទើបបង្កការភ្ញាក់ផ្អើលតែម្ដង។
បច្ចុប្បន្ន សមត្ថកិច្ចនគរបាលស្រុកកំពុងធ្វើការស្រាវជ្រាវស្វែងរកមុខសញ្ញាមកផ្ដន្ទាទោសតាមច្បាប់ឱ្យខានតែបាន ៕
ចែករំលែកព័តមាននេះ