ឡានទ្រុងវាក់កុងតឺន័រ កៀរក្រឡា.ប់ធ្លាក់ចូលប្រឡាយ
- ភ្នំពេញ
រាជធានីភ្នំពេញ ៖ រថយន្តទ្រុង១គ្រឿងដឹកក្រដាសឡាំងរោងចក្រ ខណៈកំពុងបើកបរលឿនផង ស្រាប់តែមានរថយន្តកុងតឺន័រ១
រាជធានីភ្នំពេញ ៖ រថយន្តទ្រុង១គ្រឿងដឹកក្រដាសឡាំងរោងចក្រ ខណៈកំពុងបើកបរលឿនផង ស្រាប់តែមានរថយន្តកុងតឺន័រ១គ្រឿងទៀតបើកចេញពីក្នុងផែស្ងួតមួយកន្លែងឡើងលើផ្លូវជាតិកាត់ចំពីមុខ ជាហេតុធ្វើឲ្យរថយន្តទ្រុងនេះវាក់គេចចេញអត់ទាន់ហើយជាន់ហ្វ្រាំងឈប់ក៏មិនទាន់ ក៏ជ្រុលទៅកៀរពីក្រោយរថយន្តកុងតឺន័រនោះបន្តិច រួចរេចង្កូតក្រឡាប់ធ្លាក់ចូលប្រឡាយខ្លួនឯងតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង១០ព្រឹកថ្ងៃទី២៩ ខែកញ្ញា ឆ្នាំ២០២១ នៅតាមផ្លូវជាតិលេខ៣ ត្រង់ចំណុចមុខផែស្ងួតមួយកន្លែង ដែលមានទីតាំងស្ថិតនៅលើផ្លូវជាតិលេខ៣ក្នុងភូមិស្រែញរ សង្កាត់ពងទឹក ខណ្ឌដង្កោ រាជធានីភ្នំពេញ។
រថយន្តដែលក្រឡាប់នោះម៉ាកហ៊ីណូពណ៍ស ពាក់ស្លាកលេខ កណ្ដាល3A-2833 ជាប្រភេទរថយន្តទ្រុងដឹកឡាំងក្រដាស បើកបរដោយបុរសម្នាក់ មិនស្គាល់អត្តសញ្ញាណ ហើយពុំមានរងរបួសឡើយ។ ចំណែករថយន្តដឹកកុងតឺន័រពុំស្គាល់ម៉ាក និងពុំដឹងថាជារថយន្តរបស់ក្រុមហ៊ុនផែស្ងួតខាងលើ ឬពុំមែននោះទេ ប៉ុន្តែបានបើកចេញពីទីនោះហើយបង្កគ្រោះថ្នាក់ដល់អ្នកដ៏ទៃបែបនេះ។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តហ៊ីណូបើកបរធ្វើដំណើរក្នុងទិសដៅពីត្បូងទៅជើងតាមផ្លូវជាតិលេខ៣ ។ លុះពេលទៅដល់ត្រង់ចំណុចកើតហេតុ ស្រាប់តែមានរថយន្តកុងតឺន័រ១គ្រឿងបើកចេញពីក្នុងផែស្ងួតខាងលើឡើងលើផ្លូវជាតិលេខ៣នោះដែរ។
តាមប្រភពដដែលបានបន្តថា ខណៈនោះបានធ្វើឲ្យហ៊ីណូវាក់គេចចេញអត់ទាន់ ហើយជាន់ហ្វ្រាំងឈប់ក៏មិនទាន់ ក៏ជ្រុលទៅកៀរពីក្រោយរថយន្តកុងតឺន័រនោះបន្តិចប៉ុណ្ណោះ រួចរេចង្កូតក្រឡាប់ធ្លាក់ចូលប្រឡាយតែម្ដង។ ពេលនោះពុំបានបណ្ដាលឲ្យអ្នកបើកបររងរបួសឡើយ បន្ទាប់មករថយន្តកុងតឺន័របានបន្ថែមល្បឿនរត់គេចបាត់ស្រមោល។
ក្រោយពេលកើតហេតុ ខាងរោងចក្របានយករថយន្តទ្រុង១គ្រឿងទៀតទៅដឹកឡាំងក្រដាសចេញរួចស្ទូចយករថយន្តទៅធ្វើការជួសជុលឡើងវិញដោយខ្លួនឯង៕
ចែករំលែកព័តមាននេះ