ប្រទេសថៃ ៖ ការនាំចេញនៃបណ្តាប្រទេសអាស៊ានបានធ្លាក់ចុះយ៉ាងខ្លាំងកាលពីឆ្នាំ២០១៥ ស្របនឹងតម្រូវការក្នុងស្រុកចុះខ្សោយ។ ក្នុងនោះដែរ ការនាំចូលពីសិង្ហបុរី និង៤ប្រទេសផ្សេងទៀតដែលមានអត្រាច្រើនជាង៩០% នៃការនាំចេញរបស់បណ្តាប្រទេសអាស៊ាន បានធ្លាក់ចុះ១៣%កាលពីឆ្នាំមុន ដែលជាការធ្លាក់ចុះលើកដំបូងបំផុតក្នុងរយៈពេល៦ឆ្នាំ ។
ការធ្លាក់ចុះនេះ បណ្តាលមកពីការធ្លាក់ថ្លៃនៃតម្លៃប្រេងឆៅ និងធនធានធម្មជាតិផ្សេងទៀត ក៏ដូចជាសេដ្ឋកិច្ចចិនដែលកំពុងចុះខ្សោយ ព្រមទាំងការធ្លាក់ថ្លៃនៃរូបិយប័ណ្ណប្រាក់ចិនផងដែរ ខណៈចិនជាប្រទេសនាំមុខគេនៃការធ្វើដៃគូពាណិជ្ជកម្មក្នុងចំណោមប្រទេសទាំង៥ ។
ទន្ទឹមនឹងនេះ ទឹកប្រាក់សរុបនៃការនាំចេញពីសិង្ហបុរី ម៉ាឡេស៊ី ថៃ ឥណ្ឌូណេស៊ី និងវៀតណាមបានធ្លាក់ចុះ ទោះបីជាអង្គការពាណិជ្ជកម្មពិភពលោកបានព្យាករថា វានឹងកើនឡើង២,៨% ក្តី ។
ម៉ាឡេស៊ី គឺជាប្រទេសនាំចេញធំជាងគេទី២ ក្នុងចំណោមសមាជិកអាស៊ានទាំង១០ប្រទេស ក៏បានរងនូវការប៉ះទង្គិចនៃការធ្លាក់ចុះនេះដែរ ដោយសារតែម៉ាឡេស៊ីពឹងផ្អែកស្ទើរតែទាំងស្រុងលើធនធានធម្មជាតិ ពោលគឺប្រេងឆៅ ឧស្ម័ន និងប្រេងដូង ។ ផលិតផលទាំងបីនេះមានអត្រាច្រើនជាង២០% នៃការនាំចេញសរុប ។ ទន្ទឹមនឹងនេះ តម្លៃនាំចេញបានធ្លាក់ចុះ២២% ស្មើនឹង១៨១,៧ប៊ីលានដុល្លារ ដែលជាការធ្លាក់ចុះដំបូងបំផុតក្នុងរយៈពេល៦ឆ្នាំកន្លងមក ។
ចំណែកការនាំចេញពីឥណ្ឌូណេស៊ីវិញ បានធ្លាក់ចុះនៅត្រីមាសទី៤ ក្នុងអត្រា១៥% គិតជាទឹកប្រាក់ចំនួន១៥០,២ប៊ីលានដុល្លារ ។ នេះក៏ជាលើកដំបូងដែរនៃការធ្លាក់ចុះដែលមិនធ្លាប់មានក្នុងរយៈពេល៦ឆ្នាំនេះ ដោយសារតែការធ្លាក់ថ្លៃនៃធ្យូងថ្ម និងប្រេង ។ មូលហេតុនៃការធ្លាក់ចុះចម្បងមួយទៀតនោះ គឺតម្លៃនៃកៅស៊ូធម្មជាតិបានធ្លាក់ចុះ២០% នៅឆ្នាំ២០១៥ បើធៀបនឹងឆ្នាំ២០១៤ ។
ផ្ទុយទៅវិញ ប្រទេសវៀតណាមទទួលបានប្រាក់ចំណេញលើការនាំចេញសម្រាប់រយៈពេល៦ឆ្នាំជាប់ៗគ្នា ដែលមានតម្លៃ១៦២,១ប៊ីលានដុល្លារ ពោលគឺកើនឡើង៨% ។ ជាក់ស្តែង ការនាំចេញគ្រឿងអេឡិចត្រូនិករបស់វៀតណាមបានកើនឡើងគួរឲ្យកត់សម្គាល់ ។ លើសពីនេះទៀត ក្នុងនាមជាម្ចាស់ហត្ថលេខីនៃកិច្ចព្រមព្រៀងអន្តរភាគីពាណិជ្ជកម្មសេរី ការនាំចេញរបស់វៀតណាមត្រូវបានគេរំពឹងថា នឹងបន្តកើនឡើងទៀត ។
គួរបញ្ជាក់ថា បណ្តាប្រទេសនៅអាស៊ីអាគ្នេយ៍មានសុទិដ្ឋិនិយមក្នុងការនាំចេញនៅឆ្នាំ២០១៦នេះ ។ តួយ៉ាង ប្រទេសថៃរំពឹងថា ការនាំចេញនឹងកើនឡើង៥% ។ ប៉ុន្តែទស្សនវិស័យសេដ្ឋកិច្ចហាក់មានសភាពអាប់អួ ខណៈប្រទេសចិនរាយការណ៍ថា ការនាំចូលនៅក្នុងខែមករារបស់ខ្លួនបានធ្លាក់ចុះ២០% ៕
ចែករំលែកព័តមាននេះ