រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់នៅលើសង្វៀនទូរទស្សន៍ CNC ថ្ងៃសៅរ៍ទី២៧ កុម្ភៈ ខានស្អែកនេះ បានឈានចូលដល់វគ្គផ្ដាច់ព្រ័ត្រហើយ។
កីឡាករថៃណាត់តាផុន គៀតអាវ៉ន ត្រូវជួបប្រកួតជាមួយកីឡាករឡាវឈ្មោះយ៉តឃុនផុន អេកប៉ាងសៃ ដណ្ដើមយកចំណាត់ថ្នាក់លេខ១ ចំណែកកីឡាករកម្ពុជា អ៊ុំ ចំរើន មកពីក្លិបតាឡីដំរីមានរិទ្ធ ជួបប្រកួតជាមួយកីឡាករឡាវឈ្មោះ អូរ៉ូណូ ចំប៉ាសក្ដិ ដណ្ដើមចំណាត់ថ្នាក់លេខ៣ ។
ណាត់តាផុន គៀតអាវ៉ន ធ្លាប់ចាញ់ពិន្ទុយ៉ត យុនផុន អេកប៉ាងសៃ ក្នុងវគ្គជម្រុះវិលជុំក្នុងពូលម្ដងហើយ ប៉ុន្តែលើកនេះគេមិនហ៊ានទាយទុកមុនពីលទ្ធផលចុងក្រោយថា ដូចមុនឬអត់នោះទេ ។ បើប្រៀបធៀបទៅលើល្បិចប្រយុទ្ធនៅលើសង្វៀនរវាងកីឡាករទាំង២ឃើញថា យ៉តឃុនផុន អេកប៉ាងសៃ មានជំហររឹងមាំជាង រីឯចលនាវាយចេញក៏រហ័សរហួនជាងដែរ។ ទាំងផ្លែកែង និងជង្គង់របស់គេពេលវាយចេញម្ដងៗបង្កគ្រោះថ្នាក់ខ្លាំងណាស់ ។ ចំណែកណាត់តាផុន គៀតអាវ៉ន មិនជាអន់ប៉ុន្មានដែរទេ គ្រាន់តែចិត្តរបស់គេរាងតូចបន្តិច រីឯផ្លែកែងនិងជង្គង់ ពេលវាយចេញម្ដងៗមិនឥតប្រយោជន៍ឡើយ បើគូប្រកួតគេចមិនទាន់ច្បាស់ជាស៊យធំមិនខាង ។ ទោះបីយ៉ាងណា សម្រាប់ការប្រកួតលើកនេះគេមានជំនឿចិត្តលើយ៉តឃុនផុន អេកប៉ាងសៃ ថា កីឡាកររូបនេះនឹងក្លាយជាម្ចាស់ខ្សែក្រវាត់គោជល់មិនខាន ។
ចំណែក អ៊ុំ ចំរើន និងអូរ៉ូណូ ចំប៉ាសក្ដិ ដែលត្រូវជួបគ្នាដណ្ដើមយកចំណាត់ថ្នាក់លេខ៣នោះ មិនទាន់ដឹងថា ជ័យជម្នះបានទៅខាងណានោះទេ ។ ការប្រកួតកន្លងមក អ៊ុំ ចំរើន ធ្លាប់ឈ្នះពិន្ទុអូរ៉ូណូ ចំប៉ាសក្ដិម្ដងដែរ តែលើកនេះពិបាកប៉ាន់ស្មានខ្លាំងណាស់ ។ ទោះបីយ៉ាងណា អ៊ុំ ចំរើន ដែលមានប្រៀបទាំងកម្ពស់ និងធ្លាប់ឈ្នះគូប្រកួតម្ដងផងនោះ ច្បាស់ជាមិនបណ្ដោយឱ្យជ័យជម្នះរួចផុតពីកណ្ដាប់ដៃរបស់គេឡើយ ។ ចាំមើល អ៊ុំ ចំរើន ពិតជាអាចយកឈ្នះអូរ៉ូណូចំប៉ាសក្ដិ ជាលើកទី២បានឬយ៉ាងណា ?
ក្រៅពីគូដណ្ដើមខ្សែក្រវាត់ក៏មានការប្រកួតមិត្តភាពរវាងកីឡាករកម្ពុជា-ថៃចំនួន២គូទៀតដែរ ។ កីឡាករកម្ពុជា យ៉េន ឌីណា មកពីក្លិបអប្សរាគុនខ្មែរ ត្រូវជួបប្រកួតជាមួយកីឡាករថៃឈ្មោះភិតណយ ពៀកខាឃែរ និងកីឡាករកម្ពុជាឈូក សេវ័រ មកពីក្លិបរាជសីហ៍ខេត្តរតនគិរី ប្រកួតជាមួយកីឡាករថៃឈ្មោះរ៉ុតឆៃ គៀតសេរី ៕
ចែករំលែកព័តមាននេះ