រាជធានីភ្នំពេញ ៖ ប្រឡាយមេ១ខ្សែ ទំហំ៥ម៉ែត្រ គុណនឹងជាង២០០០ម៉ែត្រ ដែលជាសម្បត្តិរួមក្រុមសាមគ្គីរបស់ប្រជាពលរដ្ឋ នៅក្នុងភូមិស្នួលខ្ពស់ ខណ្ឌពោធិ៍សែនជ័យ ត្រូវបានឈ្មួញជីកដីឈ្មោះកែប សុខមាន ចាក់លុបអស់១កំណាត់ ដើម្បីធ្វើផ្លូវ សម្រាប់រថយន្តដឹកដីរបស់ខ្លួន បើកបរបានធ្វើឱ្យប្រជាពលរដ្ឋ អស់ទំនុកចិត្តទៅលើអាជ្ញាធរខណ្ឌ និងសង្កាត់ ដែលបានបិទភ្នែកធ្វើ មិនដឹងមិនឮ បណ្ដោយឱ្យឈ្មួញខាងលើចាក់ដីលុបប្រឡាយ ដោយគ្មានចំណាត់ការបន្តិចបន្តួចទាល់តែសោះ។
នៅពេលពួកគាត់នាំគ្នារារាំង ត្រូវបានឈ្មួញខាងលើអះអាងថា ការចាក់លុបប្រឡាយនោះ គឺមានការឯកភាពពីអាជ្ញាធរខណ្ឌ និងសង្កាត់ ដើម្បីដឹកដីចេញពីតំបន់នោះ និងបានបង់លុយឱ្យទៅអាជ្ញាធរខណ្ឌក្នុងគ្រឿងចក្រ១គ្រឿង ១ខែ១៥០០ដុល្លារ ជារៀងរាល់ខែទៀតផង ទើបអាចដាក់គ្រឿងចក្រ ដល់ទៅ២គ្រឿង និងចំណាយលុយបង់ចូលខណ្ឌ១ខែៗសរុប៣០០០ដុល្លារឯណោះ ។
ប្រជាពលរដ្ឋបាននិយាយថា ប្រឡាយមេ១ខ្សែនោះ មានសារសំខាន់ខ្លាំងណាស់ សម្រាប់ការបង្ហូរទឹកចេញ-ចូលក្នុងស្រែរបស់ពួកគាត់ នៅពេលដែលមានគ្រោះធម្មជាតិភ្លៀងខ្លាំងទឹកច្រើន បង្កឱ្យលិចលង់ស្រូវសន្ទូង ត្រូវបង្ហូរទឹកចេញពីក្នុងស្រែតាមប្រឡាយមេនេះ ដើម្បីកុំឲ្យរលួយស្រូវខូច និងបើសិននៅក្នុងស្រែមិនសូវមានទឹក គឺបង្ហូរទឹកពីប្រឡាយមួយនេះ បញ្ចូលទៅក្នុងស្រែ មិនឲ្យស្រូវស្កកជាដើម ។
មិនតែប៉ុណ្ណោះ ប្រឡាយមួយនេះ ទើបតែស្ដារឲ្យជ្រៅបានក្នុងឆ្នាំ២០១៥ កន្លងមកនេះប៉ុណ្ណោះ ស្រាប់តែឥឡូវត្រូវបានអាជ្ញាធរខណ្ឌបណ្ដែតបណ្ដោយឱ្យឈ្មួញចាក់ដីលុបបែបនេះទៅវិញ ហើយពួកគាត់ជាប្រជាពលរដ្ឋតូចតាចមិនហ៊ានប្រឆាំងជាមួយទេ ព្រោះឮថាបង់លុយឲ្យអាជ្ញាធររួចអស់ហើយបែបនេះ ។ ប៉ុន្តែពួកគាត់ក៏អស់ទំនុកចិត្ត ជាមួយអាជ្ញាធរខណ្ឌនិងសង្កាត់ដែរ ។
ប្រភពដដែលបន្តថា ពួកគាត់បានដឹងថា ឈ្មួញខាងលើមានបំណងជីករណ្ដៅដីនៅតំបន់នោះ ជាជំហានដំបូង ទំហំជា១ហិកតា គឺដីដែលឈ្មួញទិញទុកយូរហើយ បន្ទាប់ពីជីកបានជ្រៅហើយបាក់ដីអ្នក ស្ថិតនៅជាប់ៗនោះហើយ ឈ្មួញនិងទីយកក្នុងតម្លៃថោកៗជីកពង្រីកបន្ថែមទៀតឲ្យកាន់តែធំ ក្លាយទៅជាកូន បឹងមួយ ដែលមានជម្រៅហួសក្បាលប្រេតមិនខានឡើយ ។
ពួកគាត់មានការមិនសប្បាយចិត្តឡើយ នៅពេលមានការឃុបឃិតគ្នា ចាក់លុបប្រឡាយ និងជីករណ្ដៅដីនៅជាប់ដីស្រែពួកគាត់បែបនេះ ហើយឥឡូវបើលោកហែម ដារិទ្ធិ អភិបាលខណ្ឌ និងលោកសេង គន្ធ ដែលជាអភិបាលរងទទួលបន្ទុករណ្ដៅដី ព្រមទាំងអាជ្ញាធរសង្កាត់ មិនមានចំណាត់ការទៅលើការចាក់ដីលុបប្រឡាយមេនោះហើយ។ ពួកគាត់សំណូមពរដល់លោកអភិបាលរាជធានីភ្នំពេញ ឬក្រសួងមន្ទីរពាក់ព័ន្ធនានា កុំឃុបឃិតជាមួយឈ្មួញអី ហើយជួយមានចំណាត់ការចំពោះបញ្ហានេះ ដើម្បីផ្ដល់ភាពកក់ក្ដៅជូនពួកគាត់ផង ។
ចែករំលែកព័តមាននេះ