ខេត្តស្ទឹងត្រែង៖ ដើមច្បោះជ័រទឹក ជាប្រភពផ្តល់ធនធានសេដ្ឋកិច្ចមួយដ៏សំខាន់បំផុតសម្រាប់ប្រជាពលរដ្ឋរស់នៅតាមតំបន់ព្រៃភ្នំ តែបច្ចុប្បន្នដើមច្បោះនោះបាននិងកំពុងរងការកាប់បំផ្លាញយ៉ាងរង្គៀលដើម្បីរានយកផ្ទៃដី។ ប្រជាពលរដ្ឋជាជនជាតិដើមភាគតិចគួយរស់នៅភូមិអន្លុងភេ ឃុំអន្លុងជ្រៃ ស្រុកថាឡាបរិវ៉ាត់បានទទូចស្នើសុំឲ្យអាជ្ញាធរខេត្ត និងអង្គភាពពាក់ព័ន្ធជុំវិញខេត្ត មេត្តាជួយ ការពារ និងថែរក្សាធនធានធម្មជាតិទាំងនោះខណៈមានការអះអាងពីប្រជាពលរដ្ឋទាំងនោះថាផ្ទៃដីគ្រប ដណ្តប់ដោយដើមច្បោះត្រូវបានអាជ្ញាធរមន្ត្រីមានសមត្ថកិច្ចក្នុងភូមិឃុំប៉ុស្តិ៍ រួមអ្នកសម គំនិត មានលុយនៅពីក្រោយខ្នងរៀបចំគ្រោងចែកដីគ្នាដោយម្នាក់ៗត្រូវយកក្បាលផ្ទៃដីចំនួន២០០ម៉ែត្រតាមបណ្តោយផ្លូវ។
ប្រជាពលរដ្ឋជាជនជាតិនិងពលរដ្ឋខ្មែរទាំងអស់គ្នានោះបានបន្តថាដើមច្បោះទាំងអស់នោះប្រសិនបើលក់ពួកគេឲ្យលុយមួយដើមតម្លៃ៥ម៉ឺនរៀលហើយប្រសិនជាមិនលក់ក៍ពួកគេត្រូវតែកាប់ចោលដែរ។ ប្រភពពី ប្រជាពលរដ្ឋដ៏ដែលបន្តទៀតថាប្រសិនណាបើពុំមានការទប់ស្កាត់ជាមុនរង់ចាំការកើតឡើងទើបបង្ការជា ក្រោយនោះ វាជារឿងយឺតពេលទៅហើយ។ ពាក់ព័ន្ធការមានគម្រោងកាប់រានដីព្រៃរាលដាលដល់ការ បាត់បង់ ដើមច្បោះរាប់ម៉ឺនដើមនោះត្រូវគេសង្កេតឃើញស្របពេលដែលផ្លូវតូចមួយខ្សែក្រវិចក្រវៀន ឆ្លង កាត់ព្រៃភ្នំជ្រលងដងអូរ ត្រូវបានរដ្ឋាភិបាលអភិវឌ្ឍន៍ឲ្យទៅជាផ្លូវធំមួយឆ្លងកាត់ពីខេត្តស្ទឹងត្រែងទៅកាន់កំពង់ធំជាប់និងខេត្តព្រះវិហានោះដែរ។
ប្រជាពលរដ្ឋជនជាតិភាគតិចគួយបានលើកឡើងដែរថាដើមច្បោះបានបង្កើនកម្រៃជីវភាពរបស់ពួកគាត់រហូតទៅដល់៤លានរៀលក្នុងមួយខែ និងសេសសល់ថវិការមួយចំនួនក្រៅពីចំណាយប្រចាំកាលគ្រាមុនតែត្រូវអន់ថយវិញខណៈជ័រទឹកចុះតម្លៃទាប និងដើមច្បោះជាច្រើនត្រូវបំផ្លាញដោយក្រុមទុច្ចរិក។ពួកគេបន្តថាក្នុងជីវភាពរស់នៅតាមបែប ប្រពៃណីទំនៀមទម្លាប់ក្រៅពីដងជ័រទឹកដែលទទួលបានពីដើមច្បោះបរបាញ់សត្វព្រៃបែបលក្ខណៈគ្រួសារ បោចវ័ល្លិ៍ និង រកឃ្មុំ ពួកគេអាស្រ័យលើដំណាំស្រែចំការវិលជុំប៉ុណ្ណោះ។ពាក់ព័ន្ធទៅនឹងជីវភាព គ្រួសារជនជាតិដើមភាគតិច រដ្ឋមន្ត្រីក្រសួងបរិស្ថានក៍បានលើកទឹកចិត្តដល់សហគមន៍ជនជាតិគួយ ដែលរស់នៅអាស្រ័យទៅលើការដងជ័រទឹកពីដើមច្បោះ រកឃ្មុំ ធ្វើស្រែចំការវិលជុំ បែបពនេចរ តាមទំនៀមទម្លាប់ប្រពៃណី ដែលសកម្មភាពទាំងអស់នោះ ត្រូវបានលាតត្រដាងអំពីសុជីវធម៌ និងភាពថ្លៃថ្នូរបស់ពួកគេផងដែរ៕
ចែករំលែកព័តមាននេះ