កោះសន្តិភាពសូមបង្ហាញជូនស្ថាបត្យកម្ម ចម្លែកៗ ក្នុងលោកចំនួន១០ មើលហើយគួរឱ្យអស់សំណើចយោងតាមគេហទំព័របរទេស The Richest ៖
១-ក្រុមហ៊ុន Longaberger Company
Longaberger Company គឺជាក្រុមហ៊ុនផលិតកន្ត្រក និងសិប្បកម្មធ្វើដោយដៃ ដូច្នេះអគាររបស់វាត្រូវបានរចនាឡើងមានរាងដូចកន្ត្រក ។ អតិថិជនមួយចំនួនរបស់ក្រុមហ៊ុននេះតែងតែគិតថាសំណង់អគារហាក់បីដូចជាកាដូពីឋានសួគ៌ ខណៈរូងរាងរបស់វាធំ ។ ក្រុមហ៊ុន Longaberger Company ស្ថិតនៅរដ្ឋអូហាយ៉ូសហរដ្ឋអាមេរិក។
២-មជ្ឈមណ្ឌល MIT’s Strata Center
លោក Frank Gehry ស្ថាបត្យករដើមកំណើតកាណាដា និងជាជនជាតិអាមេរិក មានទស្សនវិស័យខុសប្លែកពីស្ថាបត្យករផ្សេងទៀត ពោលគឺបង្កើតសំណង់អគារប្លែកពីសំណង់អគារធម្មតា ។ ជាក់ស្តែងដូចជាអគារមជ្ឈមណ្ឌល MIT’s Strata Center មានលក្ខណៈបែកខ្ញែកគ្នាយ៉ាងរញ៉េរញ៉ៃ ។ មជ្ឈមណ្ឌលនេះអាចត្រូវបានគេហៅថា អគារ៣២ដែលមាន៦៧.០០០ម៉ែត្រការ៉េ ។
គោលបំណងនៃការសាងសង់អគារនេះ គឺសម្រាប់សាកលវិទ្យាល័យបច្ចេកវិទ្យា Massachusetts Institute of Technology ហៅកាត់ថា MIT ស្ថិតក្នុងរដ្ឋម៉ាសាឈូសេត សហរដ្ឋអាមេរិក ។
៣-សណង់សណ្ឋាគារ The Tianzi Hotel
សណ្ឋាគារ Tianzi ស្ថិតនៅខេត្ត Hebei ប្រទេសចិន ។ វាមិនមែនជាសំណង់សណ្ឋាគារធម្មតាទេ ពោលគឺសង់ឡើងជារូបទេវតាទាំងបីដូចជាតារាអាយុវែង លាភសំណាង និងតារាបុណ្យសក្តិ ។ លើសពីនេះទៅទៀតសណ្ឋាគារ Tianzi ត្រូវបានចុះបញ្ជីកំណត់ត្រាពិភពលោកក្នុងនាមជាសណ្ឋាគាររាងចម្លែកក្នុងលោក ។
៤-ព្រះវិហារ Jaiyi County Church
ព្រះវិហាររាងស្បែកជើងកែងចោទនៅតៃវ៉ាន់ ។ ការរចនារបស់វាហាក់បីដូចជាឱ្យតម្លៃទៅភាគីនារីដែលនិយមស្បែកជើងកែងខ្ពស់ និងរចនាដោយមានកញ្ចក់ជាជញ្ចាំងរបស់ព្រះវិហារ ។
៥-អគារ The Fang Yuan
អគារ The Fang Yuan មានរាងជាប្រាក់យ័នស្ថិតនៅក្រុង Shen Yang ប្រទេសចិន ។ អ្នកទេសចរក្នុងស្រុក និងបរទេសតែងចាត់ទុកអគារនេះថាជាអគារប្រាក់កាក់យ័នយក្សរួមមាន២៥ជាន់ ។
៦-អគារ Tours Aillaud
Tours Aillaud គឺជាអគារលំនៅឋានក្រៅក្រុងប៉ារីសប្រទេសបារាំង ។ សំណង់អគារនេះគ្មានលក្ខណៈទំនើបកម្មនោះទេពោលគឺហាក់បីដូចជាសំណង់ប៉មបុរាណ ហើយវាមានរាងកោង ។
៧-សណ្ឋាគារ The De Vere Grand Harbor
សណ្ឋាគារ The De Vere Grand Harbor ស្ថិតនៅក្រុងសៅហេមតុនប្រទេសអង់គ្លេស ។ បើក្រលេកមើលមួយភ្លែតអ្នកប្រាកដជាគិតថាប្រាសាទពីរ៉ាមីតរបស់ប្រទេសអេហ្ស៊ីបហើយ ប៉ុន្តែមិនមែនជាគ្រាន់តែរចនាមានរាងដូចតែប៉ុណ្ណោះ ។
សំណង់សណ្ឋាគារ The De Vere Grand Harbor មានការរចនាយ៉ាងស្មុគស្មាញ ពោលគឺមានលំនាំច្រើនផ្សេងគ្នាក្នុងការសាងសង់ដូចបង្ហាញក្នុងរូប ។
៨-ផ្ទះបណ្តែតទឹក Freedom Cove
ប្តីប្រពន្ធកាណាដាមួយគូសម្រេចចិត្តបង្កើតផ្ទះបណ្តែតទឹកសម្រាប់ពួកគេ ពោលគឺជាអគារស់នៅលើទឹកដែលមានលក្ខណៈជាចង្កោម ។ វាស្ថិតនៅខេត្ត British Columbia ប្រទេសកាណាដា ។
៩-សណ្ឋាគារ Ryugyong
សណ្ឋាគារ Ryugyong ស្ថិតនៅទីក្រុងព្យុងយ៉ាងប្រទេសកូរ៉េខាងជើង ។ សំណង់នេះមានកម្ពស់១០៥ជាន់ត្រូវបានសាងសង់ឡើងក្នុងឆ្នាំ១៩៨៧ រហូតដល់ឆ្នាំ២០១១ ទើបបញ្ចប់។ សណ្ឋាគារ Ryugyong មានរាងជាកំពូលស្រួច ។
១០-សណ្ឋាគារ First World
First World គឺជាសណ្ឋាគារលំដាប់ផ្កាយ៣ស្ថិតនៅក្នុងប្រទេសម៉ាឡេស៊ី ។ សណ្ឋាគារនេះរួមមានបន្ទប់ចំនួន៧.៣៥១បន្ទប់ ។ First World ត្រូវបានចុះបញ្ជីក្នុងកំណត់ត្រាពិភពលោកក្នុងនាមជាសណ្ឋាគារធំជាងគេផ្អែកលើចំនួនបន្ទប់ ។ រូបរាងខាងក្រៅ និងការលាបពណ៌ហាក់បីដូចជាសណ្ឋាគារសម្រាប់កូនក្មេង ៕
ចែករំលែកព័តមាននេះ