រាជធានីភ្នំពេញ ៖ នៅថ្ងៃយប់ថ្ងៃអាទិត្យទី២១ កុម្ភៈ ខានស្អែកនេះ កីឡាករកម្ពុជា២រូប សុទ្ធតែបានប្រកាសពីជំហរយកឈ្នះថៃឲ្យបានដូចគ្នានៅក្នុងព្រឹត្តិការណ៍«កំពូលអ្នកប្រដាល់របស់ស្រាបៀរBlack Cat» ដែលបានបោះទុនឲ្យពួកគេប៉ះគ្នា
រាជធានីភ្នំពេញ ៖ នៅថ្ងៃយប់ថ្ងៃអាទិត្យទី២១ កុម្ភៈ ខានស្អែកនេះ កីឡាករកម្ពុជា២រូប សុទ្ធតែបានប្រកាសពីជំហរយកឈ្នះថៃឲ្យបានដូចគ្នានៅក្នុងព្រឹត្តិការណ៍«កំពូលអ្នកប្រដាល់របស់ស្រាបៀរBlack Cat» ដែលបានបោះទុនឲ្យពួកគេប៉ះគ្នានៅលើសង្វៀនទូរទស្សន៍អាស៊ីអាគ្នេយ៍ ។ យ៉ាងណាក៏ភាគីកីឡាករថៃក៏បានបង្ហាញពីការត្រៀមខ្លួនដូចគ្នាផងដែរ គឺមិនមែនមកប្រកួតក្នុងនាមដំឡូងមូលដោយមិនបានហ្វឹកហាត់ត្រៀមប្រយុទ្ធដូចគ្នានឹងអ្វីដែលកីឡាករកម្ពុជាបានបង្ហាញការទទួលខុសត្រូវនោះឡើយ ។
កីឡាករមាស ភារម្យ បើទោះជាត្រូវគេមើលឃើញថាបាត់មុខមួយរយៈ និងមិនដឹងថាតើគេធ្លាក់ដៃ ឬល្អដូចមុនយ៉ាងណាក្ដី ក៏អ្វីដែលគេស្ដែងឡើងគឺបានហ្វឹកហាត់សម្បើមណាស់មុននឹងឈានប្រកាសវាយថៃនៅយប់ថ្ងៃខានស្អែក ។ ទាំងសាមីខ្លួនផ្ទាល់ និងក្រុមគ្រូបង្វឹកសុទ្ធតែអះអាងថា កីឡាកររូបនេះហ្វឹកហាត់ម៉ត់ចត់ដោយសារតែគេចង់ឈ្នះ និងមិនចាញ់បាក់មុខក្នុងពេលឡើងប្រកួតយូរៗម្ដង ។ អ្នករៀបចំការប្រកួតបានបន្ថែមចំពោះការអះអាងនេះថា កីឡាករមាស ភារម្យ ប្រឹងប្រែងហ្វឹកហាត់សម្បើមណាស់ដោយសារការប្រដាល់ដ្បិតថា មិនទាន់មានតម្លៃខ្លួនល្អដូចគ្នានឹងកីឡាករបរទេស ប៉ុន្តែក៏ជួយឲ្យអ្នកឡើងប្រដាល់គូអន្តរជាតិទទួលបានច្រើនរយដុល្លារសម្រាប់ការប្រកួតមួយលើកៗដូចគ្នា ។ លោកញាណ សុធី បានអះអាងថា ការប្រដាល់របស់ស្រាបៀរBlack Cat ឲ្យតែដល់ការប្រដាល់អន្តរជាតិមួយលើកៗ រមែងទទួលបានអ្នកទស្សនាកកក្ដាំងខ្លាំងណាស់។
អ៊ីចឹងហើយទើបលោកសម្រេចចិត្តសម្រិតសម្រាំងចំពោះកីឡាករបំផុតទាំងភាគីខាងខ្មែរ និងបរទេស ដើម្បីឲ្យការប្រកួតរបស់ពួកគេទទួលបានការចាប់អារម្មណ៍ ។ លោកថាមាស ភារម្យ នឹងធ្វើឲ្យលោកទុកចិត្តសម្រាប់ការប្រកួតនៅវេលាយប់ខានស្អែក ដើម្បីឲ្យអ្នកឧបត្ថម្ភ គឺក្រុមហ៊ុនស្រាបៀរBlack Cat មានកម្លាំងចិត្តបន្តកុងត្រារយៈពេលវែងបន្តទៀត ជាមួយនឹងស្ថានីយទូរទស្សន៍អាស៊ីអាគ្នេយ៍ ។ លោករំពឹងយ៉ាងខ្លាំងថា ការប្រកួតដែលនឹងចាប់ផ្ដើមតាំងពីម៉ោង៨យប់នោះ នឹងកន្ត្រាក់បានអ្នកទស្សនាកកកុញមិនចាញ់ការប្រដាល់អន្តរជាតិដែលសង្វៀននេះធ្លាប់ធ្វើឡើងនោះឡើយ ដោយសារតែសមាសភាពរបស់មាស ភារម្យគឺជាកីឡាករល្អម្នាក់ ។ លោកថា កីឡាករកម្ពុជារូបនេះនឹងត្រូវឡើងប្រកួតជាមួយកីឡាករថៃឈ្មោះ Phach Bopha ដែលគេក៏ជាកីឡាករល្អម្នាក់ផងដែរ មកពីទីក្រុងបាងកក ។ ឆ្លងកាត់ការប្រកួតបាន១០៩លើក ឈ្នះ៨៩លើក ចាញ់១៨លើក និងស្មើ២លើក លោកមានជំនឿថា កីឡាករថៃនឹងធ្វើឲ្យមាស ភារម្យ តានតឹងសម្រាប់ការប្រកួត ដោយសារតែកីឡាករPhach Bopha ម្នាក់នេះ ក៏មានថ្វីដៃ និងកម្រិតវាយប្រយុទ្ធមុតស្រួចល្អៗរួចមកហើយ ។
គូនេះកីឡាករកម្ពុជាមានប្រៀបតិចជាងប៉ុណ្ណោះ ដោយសារតែគេទើបតែប្រកួតបាន៦៥លើក ឈ្នះ៥០លើក ចាញ់១៣លើក និងស្មើ២លើក ដោយមិនទាន់រាប់បញ្ចូលឆាកប្រយុទ្ធក្រៅផ្លូវការ ។ យ៉ាងណាក៏ដោយលោកអះអាងថា កីឡាករកម្ពុជានឹងមានសង្ឃឹមច្រើនជាង ដោយសារតែមុនពេលផ្គូផ្គងគេហ្វឹកហាត់បានច្រើន ហើយបើនិយាយពីកម្រិតក្នុងការវាយលុក ក៏ល្អធ្វើឲ្យលោក និងមហាជនដែលស្នេហាវិស័យប្រដាល់ជាប់ចិត្តណាស់ទៅហើយ។
នៅក្នុងព្រឹត្តិការណ៍«កំពូលអ្នកប្រដាល់របស់ស្រាបៀរBlack Cat» នោះដែរ កីឡាករយុគ យក្សផ្លែ ដែលកំពុងឡើងកូដ ក៏បានឡើងប្រកួតជាមួយកីឡាករថៃនៅវេលាយប់ខានស្អែកដូចគ្នាផងដែរ ។ កីឡាកររូបនេះ រឹតតែមានអ្នកទុកចិត្តចំពោះការប្រកួតខ្លាំងជាងមាស ភារម្យ ទៅទៀត ដោយសារតែគេមិនដែលឃ្លាតឆ្ងាយពីការហ្វឹកហាត់នោះទេ ដោយទោះមិនបានឡើងប្រកួតនៅសង្វៀនភ្នំពេញក៏ត្រូវបង្វឹកសិស្ស និងត្រូវចេញប្រកួតនៅឯជាយដែនប្រទេសថៃញឹកញាប់។ កីឡាករដែលមានមុខរបរជាអ្នកចិញ្ចឹមជ្រូកនៅខេត្តបាត់ដំបងរូបនេះ មានជំនឿចិត្តខ្ពស់ណាស់ក្នុងការវាយបំបាក់កីឡាករថៃ ។ កីឡាករថៃដែលត្រូវជួបប្រកួតជាមួយគឺកីឡាករ Kam Lai Youk ដែលមានប្រវត្តិធ្លាប់ប្រកួត៦៩លើក ឈ្នះ៥៦លើក និងចាញ់១៣លើក ថែមទាំងធ្លាប់ស៊ីកីឡាករកម្ពុជាល្អៗរាប់មិនអស់នាពេលកន្លងមក ។
លោកម៉ី ជី គ្រូបង្វឹករបស់យុគ យក្សផ្លែ បានអះអាងថា ការប្រកួតយប់ខានស្អែកកូនសិស្សរបស់ខ្លួនគឺពិតជាឈ្នះ បើទោះជាភាពជាក់ស្ដែងនឹងត្រូវប្រែប្រួលជាយថាហេតុក្ដី ។ ហេតុផលនៃការទុកចិត្តគឺដោយសារតែកូនសិស្សរបស់ខ្លួនធ្លាប់ប្រកួតដល់ទៅ១៣៩លើក ឈ្នះ១២២លើក ចាញ់១២លើក និងស្មើ៥លើក ដែលធ្លាប់វាយឈ្នះកីឡាករល្អៗរបស់ថៃច្រើនមកហើយ និងដោយសារតែបានហ្វឹកហាត់ត្រៀមទុកពីចម្ងាយមុននឹងឡើងរេញនោះផ្ទាល់តែម្ដង។ យ៉ាងណាមិញភាគីខាងអ្នកដឹកនាំកីឡាករថៃ បានទទូចឲ្យរង់ចាំកាត់ក្ដី នៅពេលសង្វៀនរបស់ក្រុមហ៊ុនBlack Cat ចាប់ផ្ដើម ដោយសារតែកីឡាកររបស់ខ្លួនក៏មិនណយ ហើយបានត្រៀមទុកពីចម្ងាយមិនខុសគ្នា ។
សម្រាប់សង្វៀនប៉ុស្តិ៍លេខ៥ជ្រោយចង្វានាល្ងាចថ្ងៃសៅរ៍នេះក៏មានការប្រកួតគូល្អៗជូនទស្សនិកទស្សនាកម្សាន្តផងដែរ ។ កីឡាករជាច្រើនគូត្រូវបានស្ថានីយទូរទស្សន៍ប៉ុស្ដិ៍លេខ៥សម្រាំងឲ្យមកប៉ះគ្នារំលេចព្រឹត្តិការណ៍ថ្ងៃសៅរ៍ក្នុងពេលការប្រកួតដណ្ដើមខ្សែក្រវាត់វគ្គទី៣មិនទាន់ចាប់ផ្ដើម ។ ការប្រកួតទាំងមូល នឹងត្រូវគេរំពឹងមានការគាំទ្រមិនខុសពីពេលការប្រកួតដណ្ដើមជើងឯកចាប់ផ្ដើមនោះទេ ដោយសារសមាសភាពកីឡាករដែលគេប្រកាសឡើងសម្រាប់ការប្រកួតនៅល្ងាចថ្ងៃសៅរ៍នេះ សុទ្ធសឹងតែជាកីឡាករល្បីៗ និងមានថ្វីដៃនៅលើសង្វៀន ៕
ចែករំលែកព័តមាននេះ