សារព័ត៌មាន «Mirror» របស់អង់គ្លេស កាលពីថ្ងៃទី១៨ កុម្ភៈ ២០១៥ ផ្សាយថា វេបសាយ «Catawiki» បានលក់ «ស្រោមអនាម័យបុរាណ» អាយុជាង២០០ឆ្នាំ ច្នៃពីពោះវៀនចៀម ក្នុងតម្លៃ៦៧២ដុល្លារ ។ ស្រោមអនាម័យនោះដាក់ឱ្យប្រើប្រាស់នៅសតវត្សទី១៨ឬ១៩ ។ បច្ចុប្បន្នមានសេសសល់តិចតួចក្នុងពេលបច្ចុប្បន្នដោយភាគច្រើនដាក់តាំងបង្ហាញនៅសារមន្ទីរ ។
ស្រោមអនាម័យនៅក្នុងយុគសម័យបុរាណនោះ ច្នៃពីពោះវៀនសត្វនានាដូចជា ចៀម គោ ឬពពែ ហើយមានតម្លៃខ្ពស់ ដូច្នេះអ្នកប្រើភាគច្រើនជាអ្នកមាន ។ ចូលដល់សតវត្សទី១៩ ស្រោមអនាម័យច្នៃពីកៅស៊ូ មានតម្លៃថោកតម្រូវឱ្យស្រោមធ្វើពីពោះវៀនសត្វឈប់ផលិតបន្ត ។
ស្រោមអនាម័យបុរាណនោះ លក់បានថ្លៃលើសពីការរំពឹងទុករបស់ «Catawiki» ដល់ទៅ២ដង ធ្វើឱ្យវាមានតម្លៃថ្លៃបំផុតនៅលើពិភពលោក ។ ស្រោមអនាម័យនោះប្រទះឃើញនៅប្រទេសបារាំង មានប្រវែង១៩សង្ទីម៉ែត្រ វែងជាងស្រោមអនាម័យប្រភេទដូចគ្នា មានប្រវែង១៥សង្ទីម៉ែត្រ ។ នៅពេលដេញថ្លៃស្រោមអនាម័យនោះមានការចាប់អារម្មណ៍ពីសារមន្ទីរជាច្រើន ប៉ុន្តែទីបំផុតអ្នកដែលដេញបានជាអ្នកពីក្រុងអាំស្ទែដាំ ប្រទេសហូឡង់ ។
Catawiki មិនទាន់ដឹងថា តើអ្នកឈ្នះលើការដេញថ្លៃ នឹងយកស្រោមអនាម័យប្រភេទនោះទៅប្រើក្នុងគោលបំណងអ្វីនៅឡើយទេ ៕
ចែករំលែកព័តមាននេះ