ខេត្តកំពង់ស្ពឺ ៖ ម្ចាស់អាហារដ្ឋានមាន់ស្រែ បន្លែធម្មជាតិនៅស្រុកបសេដ្ឋ ដែលលួចលាក់បើកទទួលឆ្នោតខុសច្បាប់ និងជាមេឆ្នោតដ៏ធំប្រចាំស្រុកបសេដ្ឋត្រូវបានសមត្ថកិច្ចបង្ក្រាបបាន និងចាត់វិធានការតាមផ្លូវច្បាប់ជាធរមាន។ ល្បែងស៊ីសងដែលនាំឲ្យអន្ដរាយដល់ខ្លួន និងគ្រួសារនេះត្រូវបានសមត្ថកិច្ចធ្វើការបង្ក្រាបកាលពី រសៀលថៃ្ងទី១៩…
ខេត្តកំពង់ស្ពឺ ៖ ម្ចាស់អាហារដ្ឋានមាន់ស្រែ បន្លែធម្មជាតិនៅស្រុកបសេដ្ឋ ដែលលួចលាក់បើកទទួលឆ្នោតខុសច្បាប់ និងជាមេឆ្នោតដ៏ធំប្រចាំស្រុកបសេដ្ឋត្រូវបានសមត្ថកិច្ចបង្ក្រាបបាន និងចាត់វិធានការតាមផ្លូវច្បាប់ជាធរមាន។ ល្បែងស៊ីសងដែលនាំឲ្យអន្ដរាយដល់ខ្លួន និងគ្រួសារនេះត្រូវបានសមត្ថកិច្ចធ្វើការបង្ក្រាបកាលពី រសៀលថៃ្ងទី១៩ ខែកញ្ញា ឆ្នាំ២០២១ ម្ចាស់ទីតាំងអាហារដ្ឋាន មាន់ស្រែ បន្លែធម្មជាតិ និងKTV ស្ថិតនៅភូមិបឹងស្ដុក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ មេឆ្នោតដែលត្រូវឃាត់ខ្លួនឈ្មោះ ឈ.ស.ធ.វ ភេទស្រី និងប្ដីឈ្មោះ យ.អ។
ប្រភពបានឲ្យដឹងថា មេឆ្នោតខាងលើ ត្រូវបានកម្លាំងនគរបាលស្រាវជ្រាវ និងឈានទៅបង្ក្រាបបទល្មើសជាក់ស្ដែងក្រោយបើកការស៊ើបអង្កេត និងស្រាវជ្រាវ កាលពីថៃ្ងទី១៦ ខែកញ្ញា ឆ្នាំ២០២១។ ប្រតិបត្តិការនេះធ្វើឡើង ក្រោមបទបញ្ជាដឹកនាំរបស់លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ។ ការឈានដល់បង្ក្រាបនេះក្រោយពីសមត្ថកិច្ចទទួលសេចក្ដីរាយការណ៍ពីមហាជនក៏ដូចជាពលរដ្ឋរស់នៅជិតនោះបានអះអាងថា ទីតាំងអាហារដ្ឋាន មាន់ស្រែ បន្លែធម្មជាតិ បានទទួលលួចលាក់កត់ឆ្នោតវៀតណាមគ្មានច្បាប់ និងជាអ្នកស៊ីសងទទួលពីកូនកញ្ច្រែងពីគ្រប់ទិសទីបញ្ជូនមកតាមប្រព័ន្ធ online។
ប្រភពបន្តទៀតថា ករណីនេះធ្វើឡើងដោយកម្លាំងនគរបាល ផែនការងារសន្តិសុខ សហការជាមួយកម្លាំងមូលដ្ឋានស្រុក ចុះស្រាវជ្រាវ និងបង្ក្រាបបានជាក់ស្ដែងក្នុងនេះសមត្ថកិច្ចចាប់យកវត្ដុតាងបម្រើឲ្យការលេងឆ្នោតបានមួយចំនួន។ ក្រោយពីឃាត់ខ្លួនម្ចាស់ទីតាំងខាងលើត្រូវបានបញ្ជូនមកស្នងការដ្ឋាននគរបាលខេត្តកំពង់ស្ពឺ ចំណាត់ការតាមនីតិវិធីច្បាប់។ មហាជនក៏បានសម្ដែងនូវការសាទរចំពោះចំណាត់ការមួយនេះហើយក៏សំណូមពរដល់សមត្ថកិច្ចនគរបាលខេត្តសូមមេត្តាចាត់វិធានការបង្ក្រាបល្បែងឆ្នោតវៀតណាមនេះឲ្យដូចភ្លៀងរលឹមដើម្បីស្របតាមគោលការណ៍ភូមិឃុំសុវត្ថិភាព៕ ដោយ ៖ វង្ស សន
ចែករំលែកព័តមាននេះ