ខេត្តរតនគិរី ៖ទីតាំងគ្រោងនឹងធ្វើការដ្ឋានខ្សាច់មួយកន្លែងត្រូវគេឃើញថាបានអនុវត្តន៍ល្មើសនឹងច្បាប់រដ្ឋ ប៉ុន្តែត្រូវបានផ្អាកដោយសារតែមានការមិនសុខចិត្តពីក្រុមអ្នកភូមិនោះ ហើយក៏ត្រូវអាជ្ញាធរផ្អាកជាបណ្តោះអាសន្ន។ ប្រភពពីប្រជាពលរដ្ឋបានសម្តែងនៅការព្រួយបារម្ភពីទីតាំងគ្រោងធ្វើការដ្ឋានខ្សាច់នោះមិនចំទិសដៅអាចនឹងមានការលួចធ្វើរ៉ែមាសដោយសារតែក្រុមអ្នកភូមិមួយចំនួនឃើញឧបករណ៍ស្រូបយករ៉ែមាសនោះនៅក្នុងការដ្ឋាននេះកាលពីពេលកន្លងទៅថ្មីៗនេះ។
ទីតាំងគ្រោងនិងធ្វើការដ្ឋានខ្សាច់គឺធ្វើឡើងដោយក្រុមហ៊ុនមួយឈ្មោះឆៃលីហាង ស្ថិតនៅចំណុចកោះខ្យងក្នុងភូមិដាល ឃុំញ៉ាង ស្រុកអណ្តូងមាស ។ ប្រភពពីក្រុមអ្នកភូមិ បានឱ្យដឹងថាពួកគេបានឃើញឧបករណ៍ស្រូបរ៉ែមាសកាលពីពេលកន្លងទៅនៅក្នុងទីតាំងក្រុមហ៊ុននោះហើយប្រាកដថាក្រុមហ៊ុនអាចនឹងមិនធ្វើរ៉ែខ្សាច់នោះទេ។ប្រភពបានបន្តថាកាលពីពេលកន្លងទៅក្រុមហ៊ុនបានទិញទឹកចិត្តអ្នកភូមិដោយឱ្យអាជ្ញាធរឃុំហៅក្រុមអ្នកភូមិមុន២ថ្ងៃឱ្យចូលរួមក្នុងពិធីជប់លៀងមួយនៅបរិវេណលើវាលខ្សាច់នៅកោះខ្យងនោះ។ ប៉ុន្តែត្រូវក្រុមអ្នកភូមិបដិសេធន៍ដោយពួកគាត់មិនបានទៅចូលរួមពិធីជប់លៀងនោះទេ។ហើយនឹងអាចមានមតិអ្នកភូមិប្រឆាំងក្រុមហ៊ុនប្រសិនបើមិនបានបង្ហាញឱ្យច្បាស់លាស់អំពីផែនការអនុវត្តន៍របស់ខ្លួននោះទេ។បុរសម្នាក់ដែលគេប្រាប់ថាជាមេការរបស់ក្រុមហ៊ុននោះបានបញ្ជាក់តាមទូរស័ព្ទដោយខ្លីថាខាងសហគមន៍បានយល់ព្រមជាមួយក្រុមហ៊ុនរួចហើយ។
ដោយឡែកអភិបាលស្រុកអណ្តូងមាសស្តីទី លោក ផាត់ សម្បត្តិ នៅរសៀលថ្ងៃទី១៦ ខែកុម្ភៈ ឆ្នាំ២០១៦នេះបានឱ្យដឹងថាក្រុមហ៊ុននោះគឺនៅមិនទាន់មានអាជ្ញាប័ណ្ណពីរដ្ឋាភិបាលនៅឡើយទេហើយការធ្វើសកម្មភាពគឺបានផ្អាកបណ្តោះអាសន្នហើយ។លោកបានបញ្ជាក់ទៀតថាក្រុមហ៊ុននេះគឺបានសុំធ្វើអាជីវកម្ម គ្រួសខ្សាច់ប៉ុន្តែប្រសិនបើក្រុមហ៊ុនធ្វើអ្វីខុសពីការស្នើសុំនោះប្រជាពលរដ្ឋអាចមានសិទ្ធិប្តឹងទៅស្ថាប័នជំនាញឬអង្គការសង្គមស៊ីវិលមួយចំនួនទៀតបាន។
លោកបានបញ្ជាក់ថាការលើកឡើងរបស់ប្រជាពលរដ្ឋវាមិនស្របទៅនឹងច្បាប់រដ្ឋាភិបាលទេ បើជាប្រជាពលរដ្ឋស្នើឱ្យក្រុមហ៊ុនចិញ្ចឹមពួកគេទៅវិញនោះដែលគេអះអាងថាបឹងបួរទន្លេ ជាសម្បត្តិដូនតារបស់ពូកគាត់។លោកថាទោះយ៉ាងណាក៏ដោយមកដល់ពេលនេះខាងសហគមន៍បានយល់ព្រមជាមួយក្រុមហ៊ុននោះហើយ។ចំណែកប្រធានមន្ទីររ៉ែនិងថាមពលខេត្តរតនគិរី លោកហ៊ុន ប៊ុនថានបានស្នើឱ្យទំនាក់ទំនងទៅមន្ត្រីនៅសាលាខេត្តព្រោះពេលនេះលោកកំពុងជាប់រវល់បុណ្យសពនៅឯភ្នំពេញ៕
ចែករំលែកព័តមាននេះ