កែវ ពេជ្រពិសី សម្រាលកូនប្រុសមុនកំណត់
- ភ្នំពេញ
កែវ ពេជ្រពិសី បានសម្រាលកូនវះកាត់មុនកំណត់បាត់ទៅហើយ។ មុននេះ អ្នកនាងប្រាប់ថា វះកាត់កូនប្រុសចុងខែកញ្ញា ឆ្នាំ២០២១នេះ។ យ៉ាងណា អ្នកនាងឆ្លងផុតដល់គោលដៅ
រាជធានីភ្នំពេញ ៖ កែវ ពេជ្រពិសី បានសម្រាលកូនវះកាត់មុនកំណត់បាត់ទៅហើយ។ មុននេះ អ្នកនាងប្រាប់ថា វះកាត់កូនប្រុសចុងខែកញ្ញា ឆ្នាំ២០២១នេះ។ យ៉ាងណា អ្នកនាងឆ្លងផុតដល់គោលដៅ លែងបុកពោះហើយ ក្រោយពេលកូនប្រុសរូបនេះសម្រាលបានដោយជោគជ័យ ។ អ្វីដែលរីករាយ នាងនិងកូន ទទួលបានភាពរឹងមាំទាំងម្តាយនិងកូន ឯស្វាមីនាងក៏រីកចិត្តមិនស្ទើរ។ មកទល់ពេលនេះ កែវ ពេជ្រពិសី បានត្រៀមរួចជាស្រេចហើយ ងារជាម្តាយលើកូនប្រុសជាទីស្រឡាញ់ ដែលកើតចេញពីចំណងស្នេហ៍ពិតប្រាកដ ក្រោយជីវិតធ្លាប់បរាជ័យស្នេហា។
អ្នកនាងពេជ្រពិសី បានសរសេរបង្ហោះថា «ថ្ងៃទី១៤ កញ្ញា ឆ្នាំ២០២១ ជាថ្ងៃដែលកូនប្រុសសម្លាញ់ម៉ាក់បានចាប់កំណើត បានឃើញពិភពលោកដ៏ស្រស់បំព្រង ម៉ាក់និងប៉ាសូមជូនពរកូនឲ្យមានសុខភាពល្អ កំលាំងមាំមួន ប្រាជ្ញាឆ្លាតវៃ ព្រមទាំងមានសំណាងពេញមួយជីវិត។ ប៉ាម៉ាក់ស្រឡាញ់កូន»។
គួររំលឹកថា កែវ ពេជ្រពិសី មានជម្រើសស្នេហ៍ច្រើន ហើយក្នុងនោះក៏មានបុរសជាមន្ដ្រីរាជការដែលមានឋានៈជាន់ខ្ពស់ធ្លាប់តាមស្នេហានាងដែរ ពោលគឺមានន័យថា បើ ពិសី ចង់បានតំណែងជំទាវ វាមិនពិបាកសម្រាប់រូបនាងឡើយ។ ប៉ុន្ដែក្រោយទុកជីវិតឲ្យនៅជាស្រី្ដមេម៉ាយជិត១០ឆ្នាំ បន្ទាប់ពីចែកផ្លូវគ្នាជាមួយអតីតគូស្នេហ៍ជាបុរសអាណិកជនខ្មែរអូស្ដ្រាលីកាលពីឆ្នាំ២០១០ នោះ។
ពេជ្រពិសី ធ្លាប់ប្រាប់អ្នកយកព័ត៌មានយើងថា នាងមិនដែលចង់ប្រាថ្នាចង់បានប្ដីជាមន្ដ្រីធំ ឬចង់បានងារជំទាវនោះទេ ព្រោះបំណងប្រាថ្នាចង់បានគ្រួសារមួយដែលសាមញ្ញមានប្ដី និងកូនរស់នៅជុំគ្នានោះ នាងពេញចិត្តហើយ។ តែពេជ្រពិសីថា ចំពោះអ្នកផ្សេងដែលបានងារជំទាវ នាងថាមានតែអបអរសាទរ ព្រោះពួកគាត់មានសំណាង។
គួររំលឹកទៀតថា កែវ ពេជ្រពិសី បានភ្ជាប់ពាក្យជាមួយអាណិកជនខ្មែរមកពីកាណាដា លោកពៅ សម្បតិ ជិត១ឆ្នាំកន្លះ ពេលនេះនាងទទួលបានកាដូពិសេសក្នុងជីវិតដែលមិនអាចកាត់ថ្លៃបាននោះ គឺកូនប្រុស។
ទាក់ទិននឹងការចាកចេញទៅសាងអនាគតថ្មីនៅលើទឹកដី កាណាដា ត្រូវពិសីបញ្ជាក់ថា មិនទាន់ច្បាស់ពីគម្រោង ដោយចង់នៅក្នុងស្រុកយូរទៀត ឬអាចទៅមកៗ។ ឯសិល្បៈនៅមិនទាន់ដឹងថា សម្តែងឡើងវិញឬយ៉ាងណា ក្នុងពេលដែលនាងកំពុងជាប់ភារៈមើលថែទាំកូនតូច បាត់ទៅហើយនោះ។
ចែករំលែកព័តមាននេះ