រាជធានីភ្នំពេញ ៖ ថ្មីៗនេះណាហ្គាវើលបានបើកកម្មវិធីបរិស្ថានស្តីពី «ការកាត់បន្ថយការប្រើប្រាស់ឡើងវិញ និងការកែច្នៃសំរាមឡើងវិញ» នៅសាលាបឋមសិក្សាព្រៃត្បះ ស្រុកស្រីសន្ធរ ខេត្តកំពង់ចាម ។ គោលបំណងចម្បងនៃការបើកកម្មវិធីនេះ គឺដើម្បីបង្កើនការយល់ដឹងក្នុងចំណោមកុមារស្តីពីសារសំខាន់នៃបញ្ហាបរិស្ថាន និងដើម្បីផ្សព្វផ្សាយចំណេះដឹងនៃការបែងចែកកាកសំណល់ដែលអាចប្រើប្រាស់បានដោយសហគមន៍ ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើលបានមានប្រសាសន៍ថា៖«ណាហ្គាវើលបេះដូងសប្បុរស បាននិងកំពុងយកចិត្តទុកដាក់លើបញ្ហាការបម្រែបម្រួលអាកាសធាតុ ។ ដោយយល់ច្បាស់ពីបញ្ហានេះ យើងបានផ្តួចផ្តើមបង្កើតកម្មវិធីបរិស្ថានដើម្បីអប់រំ និងបង្កើតការយល់ដឹងក្នុងចំណោមក្មេងជំនាន់ក្រោយស្តីពីសារសំខាន់នៃការការពារបរិស្ថានរបស់យើងមានដូចជា កម្មវិធីបរិស្ថានស្តីពី «ការកាត់បន្ថយ ការប្រើប្រាស់ឡើងវិញ និងការកែច្នៃសំរាមឡើងវិញ» កម្មវិធីដាំដើមឈើ និងកម្មវិធីប្រមូលសំរាម និងកាកសំណល់ជាដើម ។ ក្នុងកម្មវិធីនេះយើងបានចែករំលែកនិងអប់រំកុមាររបស់យើងស្តីពីបញ្ហាបរិស្ថាន ។ យើងក៏បានប្រគល់ជូននូវផ្ទាំងរូបភាពអប់រំស្តីពីរបៀបកែច្នៃ ប្រើប្រាស់ឡើងវិញ និងកាត់បន្ថយសំរាមកាកសំណល់ និងថង់ប្លាស្ទិច» ។ លោកបន្ថែមថា៖«ណាហ្គាវើលបេះដូងសប្បុរស និងសិស្សានុសិស្សទាំងអស់បានសម្អាតបរិវេណសាលាដោយការរើសសំរាមកាកសំណល់ និងថង់ប្លាស្ទិច ។ យើងសង្ឃឹមថា អ្នកទាំងអស់គ្នានឹងធ្វើអ្វីមួយទោះបីតិចតួចក្តីក្នុងគោលបំណងដើម្បីជាកិច្ចខិតខំប្រឹងប្រែងរួមគ្នាមួយដើម្បីសង្គ្រោះភពផែនដីរបស់យើង ។ ការសង្គ្រោះភពផែនដីមិនចាំបាច់អ្នកត្រូវតែចំណាយថវិកានោះទេ ប៉ុន្តែយើងត្រូវតែចំណាយពេលវេលាតិចតួចរបស់យើងដើម្បីចូលរួមក្នុងសកម្មភាពបរិស្ថានដូចជាការដាំដើមឈើ និងការសម្អាតបរិស្ថានជាដើម»។
លោក យ៉ាង យ៉ុន នាយកសាលាបឋមសិក្សាព្រៃត្បះ បានមានប្រសាសន៍ថា៖«ខ្ញុំត្រូវតែអរគុណដល់ណាហ្គាវើលបេះដូងសប្បុរសសម្រាប់ការរៀបចំយុទ្ធនាការបង្កើនការយល់ដឹងស្តីពីបរិស្ថានដល់សិស្សានុសិស្សរបស់យើង។ ណាហ្គាវើលបេះដូងសប្បុរស គឺជាក្រុមហ៊ុនឯកជនដំបូងដែលរៀបចំកម្មវិធីបង្កើនការយល់ដឹងស្តីពីបរិស្ថាននៅសាលារបស់យើង ។ ពួកគេបានបង្រៀនសិស្សានុសិស្សរបស់យើងឲ្យចេះថែទាំ និងស្រឡាញ់បរិស្ថាន ។ ខ្ញុំបានកត់សម្គាល់ឃើញថា ណាហ្គាវើលតែងតែរៀបចំកម្មវិធីដាំដើមឈើ និងសកម្មភាពសម្អាតបរិស្ថាននៅតាមបណ្តាខេត្ត និងរាជធានីភ្នំពេញផងដែរ។ កម្មវិធីទាំងនេះបានបង្រៀនកុមារកម្ពុជារបស់យើងឲ្យចេះយកចិត្តទុកដាក់អំពីបរិស្ថានដែលពួកគេកំពុងរស់នៅជាមួយ និងឲ្យចេះទទួលស្គាល់នូវតម្លៃដើមឈើ» ។
កញ្ញា យន ណាវី បុគ្គលិកណាហ្គាវើលចូលរួមក្នុងយុទ្ធនាការបង្កើនការយល់ដឹងស្តីពីបរិស្ថានបានឱ្យដឹងថា ៖«ខ្ញុំសប្បាយរីករាយណាស់ដែលបានចែករំលែកចំណេះដឹងរបស់យើងជាមួយកុមារ ។ យើងបានអប់រំកុមារនិងបានប្រគល់នូវផ្ទាំងរូបភាពអប់រំស្តីពីរបៀបការកាត់បន្ថយ ការប្រើប្រាស់ឡើងវិញ និងការកែច្នៃសំរាមកាកសំណល់និងថង់ប្លាស្ទិច ។ យើងត្រូវតែរួមគ្នាដើម្បីការពារបរិស្ថានរបស់យើង ។ លើសពីនេះទៀត ការប្រមូលសំរាមកាកសំណល់និងថង់ប្លាស្ទិច គឺមានសារសំខាន់ផងដែរដើម្បីចៀសវាងការរីករាលដាលនៃជំងឺគ្រុនឈាមនៅក្នុងសហគមន៍» ។
យុវសិស្សបញ្ញារៀនថ្នាក់ទី៦ នៃសាលាបឋមសិក្សាព្រៃត្បះបាននិយាយថា៖«ខ្ញុំមានក្តីរំភើបយ៉ាងខ្លាំងដែលឃើញណាហ្គាវើលបេះដូងសប្បុរសបានមកសាលារបស់ខ្ញុំនៅថ្ងៃនេះដើម្បីរៀបចំយុទ្ធនាការបង្កើនការយល់ដឹងស្តីពីបរិស្ថាន ។ ខ្ញុំមិនដែលបានឮកម្មវិធីនេះពីមុនមកទេ ។ វាមានប្រយោជន៍ណាស់សម្រាប់យើង ហើយកម្មវិធីនេះផ្តល់នូវព័ត៌មានដ៏មានប្រយោជន៍សម្រាប់ពួកយើងដើម្បីយកចិត្តទុកដាក់អំពីបរិស្ថានរបស់យើង»៕
ចែករំលែកព័តមាននេះ