ប្រទេសមីយ៉ាន់ម៉ា ៖ ក្រុមហ៊ុនអន្តរជាតិ Woodside Energy និង Daewoo បានរកឃើញទីតាំងឧស្ម័នទី២ នៅក្នុងឈូងសមុទ្រ Bengal បន្ទាប់ពីទីតាំងទី១ ត្រូវបានរកឃើញនៅតំបន់នោះកាលពីខែមករា កន្លងមក ។
ការរកឃើញនូវទីតាំងឧស្ម័នថ្មីនេះ គឺនៅក្នុងប្លុកA-6 និងAD-7 បង្ហាញថា វាអាចជាប្រភពនៃផលិតកម្មពាណិជ្ជកម្មឧស្ម័នក្នុងតំបន់នេះនាពេលអនាគត ។ នេះបើយោងតាមប្រសាសន៍របស់មន្ត្រីមួយរូបបានឲ្យដឹងកាលពីពេលថ្មីៗនេះ ។
ក្រសួងថាមពល និងក្រុមហ៊ុនអន្តរជាតិ ដែលមានមូលដ្ឋាននៅប្រទេសអូស្ត្រាលី បានប្រកាសកាលពីថ្ងៃទី១២ កុម្ភៈថា ការរុករកទីតាំងថ្មីនេះត្រូវបានដាក់ឈ្មោះសម្រាប់ប្លុក AD-7 ដែលមានជម្រៅ៦៤ម៉ែត្រ ។ ប្លុកនេះមានទីតាំងប្រមាណ១០០គីឡូម៉ែត្រនៃឈូងសមុទ្រភាគខាងលិចមីយ៉ាន់ម៉ា ។
បើយោងតាមក្រសួងថាមពលឲ្យដឹងថា ក្រុមហ៊ុនអន្តរជាតិ Daewoo គឺជាអ្នកប្រតិបត្តិក្នុងប្លុក AD-7 ដោយកាន់កាប់៦០%នៃភាគហ៊ុនសរុប ខណៈភាគហ៊ុនដែលនៅសល់ត្រូវបានកាន់កាប់ដោយក្រុមហ៊ុន Woodside ។
ការរកឃើញទីតាំងថ្មីដោយក្រុមហ៊ុនកាលពីខែមុននេះ គឺការជីករកឧស្ម័នមានជម្រៅ១២៩ម៉ែត្រ ។ ក្រុមហ៊ុន Woodside ជាអ្នកគ្រប់គ្រងប្លុក A-6 និងកាន់កាប់ភាគហ៊ុន៤០% ។ ទន្ទឹមនឹងនេះ ប្រភពប្រេងឥន្ធនៈមានភាគហ៊ុន២០% ហើយក្រុមហ៊ុនបារាំងមានភាគហ៊ុន៤០% ។
លោកអគ្គនាយកប្រតិបត្តិនៃក្រុមហ៊ុនថ្លែងថា ៖ « ការរកឃើញនូវទីតាំងទាញយកឧស្ម័នថ្មីទាំងពីរកន្លែងនេះ គឺជាដំណឹងល្អបំផុតសម្រាប់ក្រុមហ៊ុន ក្នុងការខិតខំស្វែងរកទីតាំងថ្មីបន្តទៀត និងជាតឹកតាងបញ្ជាក់ពីឈូងសមុទ្រមីយ៉ាន់ម៉ា ដែលមានធនធានធម្មជាតិដ៏កម្រផងដែរ » ។
ក្រុមហ៊ុនទាំងពីរត្រូវការវិនិយោគបន្ថែមទៀតដើម្បីពង្រីកសក្តានុពលរបស់ខ្លួនក្នុងការរុករកឧស្ម័ន ។ នេះបើយោងតាមប្រសាសន៍របស់ទីប្រឹក្សាសហគ្រាសប្រេង និងឧស្ម័នមីយ៉ាន់ម៉ា ។
លោកបន្ថែមថា ៖ « ក្រុមហ៊ុន Woodside មានសំណាងខ្លាំងណាស់ដែលបានរកឃើញនូវទីតាំងថ្មីនេះ ។ កាលពីឆ្នាំ២០០៨ ក្រុមហ៊ុនក៏បានរុករកឧស្ម័នដែរ ប៉ុន្តែមិនទទួលជោគជ័យឡើយ។ ទន្ទឹមនឹងនេះ ក្រុមហ៊ុនក៏ជាអ្នកប្រតិបត្តិលើគម្រោងឧស្ម័នកាលពីឆ្នាំ២០១៣ផងដែរ និងបាននាំចេញទៅកាន់ចិនម្តងរួចមកហើយ » ។
គួរបញ្ជាក់ថា ក្រុមហ៊ុន Woodside មានទីតាំងនៅប្រទេសអូស្ត្រាលី គឺជាអ្នកកាន់កាប់ទីតាំងខួងឧស្ម័នធំជាងគេ ដែលមានប្លុកចំនួន៦ និងមានផ្ទៃក្រឡា៤៧.០០០ម៉ែត្រការ៉េ ស្មើនឹង២០% នៃទំហំទីតាំងសរុបរបស់ក្រុមហ៊ុនជាសកល ។
ការខួងយកឧស្ម័ននៅក្នុងប្លុក A-6 និង AD-7 នឹងលើកទឹកចិត្តដល់ក្រុមហ៊ុនប្រេងអន្តរជាតិឲ្យចាប់ផ្តើមរុករកឧស្ម័ននៅក្នុងឈូងសមុទ្រមីយ៉ាន់ម៉ា ។ ទោះជាយ៉ាងណា ការវិនិយោគលើសកម្មភាពរុករកឧស្ម័ន នឹងអាចរងផលប៉ះទង្គិចដោយសារការធ្លាក់ថ្លៃនៃឧស្ម័នសកល ។
ជាក់ស្តែង ការនាំចេញឧស្ម័នមានតម្លៃ១១ដុល្លារក្នុងមួយ mmbtu នៅឆ្នាំ២០១៤។ បច្ចុប្បន្ននេះ វាបានធ្លាក់ថ្លៃរហូតដល់៧ដុល្លារក្នុងមួយ mmbtu ។ នេះបើតាមក្រសួងប្រេង និងឧស្ម័នមីយ៉ាន់ម៉ា បានរាយការណ៍ឲ្យដឹងកាលពីពេលកន្លងមក ។
ទោះជាយ៉ាងណា មានក្រុមហ៊ុនអន្តរជាតិជាច្រើនគ្រោងនឹងចាប់ផ្តើមផែនការរុករកឧស្ម័ន នៅក្នុងរដូវកាលនេះ ។ មិនតែប៉ុណ្ណោះ នៅអំឡុងឆ្នាំ២០១៦ និងឆ្នាំ២០១៧ រដ្ឋាភិបាលរំពឹងថា ជារយៈពេលដែលមមាញឹកបំផុតសម្រាប់វិស័យថាមពល និងប្រេងឥន្ធនៈនៅមីយ៉ាន់ម៉ា ៕
ចែករំលែកព័តមាននេះ