រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ត្រូវបានអ្នកដំណើរ ក៏ដូចជាជនរងគ្រោះ ចាប់ឃាត់ខ្លួន រួចប្រគល់អោយសមត្ថកិច្ចប៉ុស្តិ៍នគរបាលរដ្ឋបាលទំនប់ទឹក ធ្វើការសាកសួរ បន្ទាប់ពីជនសង្ស័យរូបនោះបានធ្វើសកម្មភាពខ្ចីទូរសព្ទ័របស់អ្នកដំណើរតេ ហើយក៏យកទៅលាក់ទុកបាត់ ដោយមិនព្រមប្រគល់អោយជនរងគ្រោះជាម្ចាស់ទូរស័ព្ទវិញនោះទេ។
សេចក្តីរាយការណ៍បានឱ្យដឹងថា ហេតុការណ៍ឃាត់ខ្លួនខាងលើ បានធ្វើឡើងកាលពីវេលាម៉ោង៨និង៣០នាទីយប់ ថ្ងៃទី១៧ ខែកញ្ញា ឆ្នាំ២០២១ ទល់មុខក្រុមហ៊ុនឡានក្រុងយីហោ «ម៉ានិត» ជិតស្ពានអាកាសស្ទឹងមានជ័យ ស្ថិតនៅតាមបណ្ដោយផ្លូវ២១៧ ក្នុងសង្កាត់ទំនប់ទឹក ខណ្ឌបឹងកេងកង ។
សេចក្តីរាយការណ៍បន្តថា ជនសង្ស័យដែលសមត្ថកិច្ចឃាត់ខ្លួននេះ មានឈ្មោះ សំ ហេង អាយុ២២ឆ្នាំ មុខរបរជាព្រូឡា ស្នាក់នៅតាមរថយន្ត និងមានស្រុកកំណើតនៅភូមិកំពង់ក្តី ឃុំកំពង់ក្តី ខេត្តមរាប។ ចំណែកស្ត្រីជាជនរងគ្រោះវិញសុំមិនបញ្ចេញឈ្មោះ ហើយទូរស័ព្ទដែលត្រូវជនសង្ស័យលួចយកទៅនោះ គឺ ម៉ាក Oppo ចំនួនមួយគ្រឿង ។
តាមសម្តីរបស់ស្ត្រីជាម្ចាស់ទូរស័ព្ទ បានអោយដឹងថា មុនពេលកើតហេតុ រូបគាត់បានមកជិះរថយន្តក្រុងនៅចំណុចខាងលើ ក្នុងគោលបំណងទៅខេត្តបាត់ដំបង ដោយមានភ្ញៀវផ្សេងៗទៀតជិតនៅលើរថយន្តក្រុងនោះផងដែរ។ ហើយស្របពេលនោះ ក៏ស្រាប់តែមានបុរសជាជនសង្ស័យម្នាក់បានឡើងទៅលើរថយន្តក្រុង រួចក៏មកខ្ចីទូរស័ព្ទរបស់គាត់តេមួយភ្លែត ។
ស្ត្រីរងគ្រោះជាម្ចាស់ទូរស័ព្ទបន្តថា ហើយពេលនោះ រូបគាត់ជាម្ចាស់ទូរស័ព្ទក៏បានអោយទូរស័ព្ទទៅបុរសជាជនសង្ស័យខ្ចីតេ ព្រោះនឹកស្មានថា ជនសង្ស័យជាព្រូនៅលើរថយន្តក្រុងនេះ នៅពេលដែលបានទូរស័ព្ទហើយ ជនសង្ស័យនោះក៏បានដើរចុះពីលើរថយន្តក្រុង រួចទៅបាត់ប្រហែលជាង៣០នាទីហើយក៏ត្រលប់មកវិញ ។
ស្ត្រីរងគ្រោះបន្តថា ពេលនោះ រូបគាត់ជាម្ចាស់ទូរស័ព្ទក៏បានសួរនាំរកទូរស័ព្ទគាត់វិញ ក៏ស្រាប់តែបុរសជាជនសង្ស័យរូបនោះ ឆ្លើយថាមិនបានយក តែជាក់ស្ដែងសាក្សីដែលជិះនៅលើរថយន្តក្រុងជាច្រើននាក់បានឃើញថា បុរសរូបនោះបានខ្ចីទូរស័ព្ទរបស់ជនរងគ្រោះពិតមែន ទើបធ្វើការចាប់ឃាត់បុរសជាជនសង្ស័យ រួចប្រគល់អោយសមត្ថកិច្ចប៉ុស្តិ៍នគរបាលរដ្ឋបាលទំនប់ទឹក ធ្វើការសាកសួរតែម្តង ។
ក្រោយពេលកើតហេតុ ជនរងគ្រោះរួមទាំងសាក្សីដែលជិះនៅលើរថយន្តក្រុងចំនួន៣នាក់ត្រូវបានសមត្ថកិច្ចនាំយកទៅសាកសួរបន្ត និងដាក់ពាក្យបណ្ដឹង ដើម្បីចាត់ការជនសង្ស័យតាមនីតិវិធីច្បាប់ផងដែរ ។
ចែករំលែកព័តមាននេះ