ក្នុងពេលរដ្ឋបាលខេត្តសៀមរាប សម្រេចបិទខ្ទប់ភូមិសាស្ត្រសង្កាត់មួយចំនួន ដោយកំណត់ជា «តំបន់ក្រហម» ដើម្បីអនុវត្តនូវសេចក្តីសម្រេចរបស់រដ្ឋបាលខេត្តសៀមរាប
ខេត្តសៀមរាប ៖ ក្នុងពេលរដ្ឋបាលខេត្តសៀមរាប សម្រេចបិទខ្ទប់ភូមិសាស្ត្រសង្កាត់មួយចំនួន ដោយកំណត់ជា «តំបន់ក្រហម» ដើម្បីអនុវត្តនូវសេចក្តីសម្រេចរបស់រដ្ឋបាលខេត្តសៀមរាប ។
ក្នុងការកំណត់ «ជាតំបន់ក្រហម» ស្ថិតនៅក្នុងភូមិសាស្ត្រសង្កាត់ស្លក្រាម, សង្កាត់ស្វាយដង្គំ, សង្កាត់គោកចក, សង្កាត់ជ្រាវ និងភូមិតាវៀន សង្កាត់សាលាកំរើក, ភូមិព្រៃធំ ភូមិស្រង៉ែ សង្កាត់ស្រង៉ែ ក្នុងក្រុងខេត្តសៀមរាប ដើម្បីទប់ស្កាត់ការឆ្លងរាលដាលនៃជំងឺកូវីដ១៩ គណៈបញ្ជាការឯកភាពរដ្ឋបាលក្រុងសៀមរាប បានអនុវត្តវិធានការក្តៅ ចំពោះបងប្អូនប្រជាពលរដ្ឋណាដែលមិនគោរពនូវបំរាមដែលរដ្ឋបាលខេត្ត បានសម្រេចកំណត់ជា «តំបន់ក្រហម» ហើយត្រូវបានហាមឃាត់មិនឲ្យធ្វើដំណើរចេញពីលំនៅដ្ឋាន ឬទីសំណាក់របស់ខ្លួន រួមទាំងការមិនអនុញ្ញាតឲ្យធ្វើសកម្មភាពផ្សេងៗចេញក្រៅពីលំនៅដ្ឋានរបស់ខ្លួនឡើយ ។
ចំពោះករណីដែលបងប្អូនបំពានវិធានការ ការហាមឃាត់ ក្នុងពេលដែលកំពុងបិទខ្ទប់ជាបណ្តោះអាសន្តរយៈពេលមួយសប្តាហ៍នេះ គិតចាប់ពីវេលាម៉ោង១៣និង០០នាទីរសៀល នាថ្ងៃទី១៧ ខែកញ្ញា រហូតដល់ថ្ងៃទី២៣ ខែកញ្ញា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ១៩ រហូតមានការចេញសេចក្តីសម្រេចជាថ្មី ។
ចំពោះបងប្អូនមិនគោរពវិធានការនេះ កម្លាំងសមត្ថកិច្ចនៅគ្រប់គោលដៅ និងធ្វើការឃាត់ទុកជាបណ្តោះអាសន្ននូវមធ្យោបាយទាំងឡាយ ដោយអនុលោមតាមបទប្បញ្ញត្តិ និងនីតិវិធីជាធរមាន ។ ចំណែកការចេញចូលនៅ តំបន់ក្រហម និងតំបន់លឿងទុំ គឺត្រូវបានអនុញ្ញាតក្នុងករណីចាំបាត់ ។
ក្នុងសកម្មភាពការបិទខ្ទប់នៅថ្ងៃទី១៨ ខែកញ្ញានេះ កម្លាំងគណៈបញ្ជាការឯកភាពរដ្ឋបាលខេត្ត សហការជាមួយកម្លាំងគណៈបញ្ជាការឯកភាពរដ្ឋបាលក្រុងសៀមរាប បានធ្វើការឃាត់ទុកនូវមធ្យោបាយធ្វើដំណើរជាច្រើនគ្រឿង ដែលល្មើសទៅនឹងបំរាម រួចយកទៅរក្សាទុកនៅអធិការដ្ឋាននគរបាលក្រុងសៀមរាបមួយរយៈផងដែរ ។
រដ្ឋបាលខេត្ត មានការព្រួយបារម្ភយ៉ាងខ្លាំងចំពោះស្ថានភាពរីករាលដាលនៃជំងឺកូវីដ១៩ ហើយការដាក់ជា តំបន់ក្រហម នៅក្នុងក្រុងសៀមរាបនេះ ដោយសារមូលហេតុថា មានបងប្អូនប្រជាពលរដ្ឋមួយចំនួនមិនបានសហការ មិនអនុវត្តតាមការណែនាំ មិនចេះការពារខ្លួន និងក្រុមគ្រួសាររសប់ខ្លួន ដែលជាហេតុនាំមេរោគចម្លងបន្តទៅដល់អ្នកដទៃក្នុងសហគមន៍ ។ ដូច្នេះសូមបងប្អូនប្រជាពលរដ្ឋ មេត្តាចូលរួមអនុវត្តតាមវិធានការរបស់ប្រមុខរាជរដ្ឋាភិបាល «៣កុំ ៣ការពារ» និងការណែនាំរបស់ក្រសួងសុខាភិបាល ក៏ដូចជារដ្ឋបាលខេត្តដែលបានដាក់ចេញនាពេលកន្លងមក ៕
ចែករំលែកព័តមាននេះ