រាជធានីភ្នំពេញ ៖ ប្រធានសហភាព សហព័ន្ធយុវជនកម្ពុជា លោកហ៊ុន ម៉ានី បានអះអាងថា ព្រឹត្តិការណ៍អង្គរសង្ក្រាន្តឆ្នាំ២០១៦ ពីថ្ងៃទី១៤ ដល់១៦ ខែមេសា ឆ្នាំ២០១៦ ក្រោមវត្តមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងរំលេចឡើងនូវកេរដំណែលវប្បធម៌ អរិយធម៌ ទំនៀមទម្លាប់ ប្រពៃណី ដែលជាស្នាដៃបុព្វបុរសខ្មែរ ។
រាជធានីភ្នំពេញ ៖ ប្រធានសហភាព សហព័ន្ធយុវជនកម្ពុជា លោកហ៊ុន ម៉ានី បានអះអាងថា ព្រឹត្តិការណ៍អង្គរសង្ក្រាន្តឆ្នាំ២០១៦ ពីថ្ងៃទី១៤ ដល់១៦ ខែមេសា ឆ្នាំ២០១៦ ក្រោមវត្តមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងរំលេចឡើងនូវកេរដំណែលវប្បធម៌ អរិយធម៌ ទំនៀមទម្លាប់ ប្រពៃណី ដែលជាស្នាដៃបុព្វបុរសខ្មែរ ។
លោកហ៊ុន ម៉ានី បានថ្លែងបែបនេះនៅក្នុងកិច្ចប្រជុំកាលពីរសៀលថ្ងៃទី១៥ ខែកុម្ភៈ ឆ្នាំ២០១៦ ជាមួយលោកថោង ខុន រដ្ឋមន្ត្រីក្រសួងទេសចរណ៍ នៅទីស្តីការក្រសួង ។ លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បញ្ជាក់ថា ព្រឹត្តិការណ៍អង្គរសង្ក្រាន្តឆ្នាំ២០១៦ នឹងប្រព្រឹត្តទៅតាមការគ្រោងទុក ហើយមានលក្ខណៈខុសប្លែកពីឆ្នាំកន្លងទៅដោយបន្ថែមកម្មវិធីកម្សាន្តជាច្រើនទៀត ដើម្បីបំពេញតម្រូវចិត្តមហាគ្រួសារខ្មែរ ក៏ដូចជាទាក់ទាញអ្នកទេសចរអន្តរជាតិឲ្យចង់មកទស្សនាកម្ពុជា ។
លោកហ៊ុន ម៉ានី អះអាងថា ក្រុមការងាររៀបចំព្រឹត្តិការណ៍បានរៀបចំរួចជាស្រេច នូវគម្រោងផែនការ និងបានយកគម្រោងទាំងនោះដាក់ជូនថ្នាក់ដឹកនាំ ក៏ដូចជាមន្ត្រី ជំនាញនៃក្រសួងទេសចរណ៍ពិនិត្យ និងផ្តល់អនុសាសន៍បន្ថែមសំដៅឱ្យព្រឹត្តិការណ៍នោះប្រព្រឹត្តទៅដោយរលូន និងទទួលបានការគាំទ្រពីប្រជាពលរដ្ឋកម្ពុជា ក៏ដូចជាអ្នកទេសចរអន្តរជាតិ ។
តាមការបញ្ជាក់របស់លោកហ៊ុន ម៉ានី ព្រឹត្តិការណ៍អង្គរសង្ក្រាន្ត ដែលរៀបចំដោយ សហភាពសហព័ន្ធយុវជនកម្ពុជានៅឆ្នាំនេះ ក្រោមប្រធានបទ «ការចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ» ដែលនឹងលើកយកកេរដំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែររំលេចឡើងជាផ្ទាំងទស្សនីយភាពវប្បធម៌ជាច្រើន ដូចជាការលេងល្បែងប្រជាប្រិយ របាំបុរាណ ប្រពៃណី និងប្រជាប្រិយ ជីវភាពរស់នៅរបស់ប្រជាជនខ្មែរ និងទស្សនីយភាពបែបសិល្បៈដទៃទៀត ដែលសម្តែងដោយយុវជន យុវនារី សិល្បករ និងសិល្បការិនីខ្មែរ នៅខេត្តសៀមរាប ទឹកដីអាណាចក្រវប្បធម៌ខ្មែរ ។
លោកថោង ខុន ថ្លែងថា ព្រឹត្តិការណ៍អង្គរសង្ក្រាន្តប្រារព្ធធ្វើឡើងចំនួន៣លើករួចមកហើយទទួលបានជោគជ័យខ្លាំងណាស់ និងទទួលបានការគាំទ្រច្រើនឡើងពីមួយឆ្នាំទៅមួយឆ្នាំ ។ ជាក់ស្តែងឆ្នាំ២០១៥ ការនាំមកនូវកេរ្តិ៍ឈ្មោះកម្ពុជាចូលទៅក្នុងកំណត់ត្រាពិភពលោក បន្ថែមទៀតនូវស្នាដៃចំនួន២ជាប្រវត្តិសាស្ត្រ នោះគឺនំអន្សមយក្សរបស់កម្ពុជា ដែលមានទម្ងន់ដល់ទៅជាង៤តោន និងការបំបែកឯតទគ្គកម្មនៃការរាំចង្វាក់ម៉ាឌីហ្ស៊ន ដែលជាការរាំជាក្រុមរបស់យុវជនកម្ពុជាចំនួន២០១៥នាក់ ។
ព្រឹត្តិការណ៍នោះទទួលបានអ្នកទេសចរជាតិប្រមាណ១លាននាក់, រួមទាំងអ្នកទេសចរអន្តរជាតិប្រមាណ ២៧.០០០នាក់ ខណៈដែលការរំពឹងទុកប្រមាណតែ៥០ម៉ឺននាក់ និងបាននាំមកប្រាក់ចំណូលសម្រាប់ខេត្តសៀមរាបប្រមាណជិត៧០លានដុល្លារអា
មេរិក។
លោករដ្ឋមន្ត្រី ថោង ខុន មានសុទិដ្ឋិនិយមថា ព្រឹត្តិការណ៍អង្គរសង្ក្រាន្តឆ្នាំ២០១៦ នឹងមានអ្នកចូលរួមទាំងភ្ញៀវជាតិ និងអន្តរជាតិ កាន់តែច្រើនឡើងទ្វេដង ។ លោកបង្ហាញការគាំទ្រពេញទំហឹងចំពោះការរៀបចំព្រឹត្តិការណ៍ដ៏អស្ចារ្យមួយនេះ និងចូលរួមសហការយ៉ាងសកម្ម និងគ្រប់ជ្រុងជ្រោយ ដើម្បីឲ្យព្រឹត្តិការណ៍នេះប្រព្រឹត្តទៅដោយជោគជ័យ ។
ព្រឹត្តិការណ៍អង្គរសង្ក្រាន្តឆ្នាំ២០១៦ មានល្បែងប្រជាប្រិយប្រមាណជិត៣០ល្បែង នឹងលើកយកទៅលេងនៅទីតាំងចំនួន១១ ។ ល្បែងទាំងនោះមានបោះអង្គញ់ ខ្លាស៊ីគោ ថាសភ្ជាប់និស្ស័យ ប្រណាំងកង់យឺត ស្បែកជើងរួមមិត្ត ខាំប៉ិកួៈ ចាប់កូនខ្លែង អុក ឬចត្រង្គ ចោលឈូង លាក់កន្សែង រាវបង្កង ស្តេចចង់ឬអៀវ សី ទាញព្រ័ត្រ វាយក្អម លោតបាវ ដណ្តើមស្លឹកឈើ ធុងរត់ប្រណាំង ចងជើងរត់ប្រណាំង ស្វាដណ្តើមទី ទំពាំងឫស្សី ហោរាទស្សន៍ទាយ ខួង មួយរកាំពីរកាំ និងល្បែងពាំពងទាជាដើម ។ ក្រៅពីនោះនៅមានកម្មវិធីសិល្បៈ វប្បធម៌ សាសនា និងកម្មវិធី ផ្សេងៗជាច្រើនទៀត ។
ចែករំលែកព័តមាននេះ