រាជធានីភ្នំពេញ ៖ លោក ប៉ា សុជាតិវង្ស អភិបាលរាជធានីភ្នំពេញ បានណែនាំដល់អាជ្ញាធរសង្កាត់ផ្សារដើមថ្កូវ និងអាជ្ញាធរខណ្ឌចំការមន ឲ្យយកចិត្តទុកដាក់រក្សាការពារ
រាជធានីភ្នំពេញ ៖ លោក ប៉ា សុជាតិវង្ស អភិបាលរាជធានីភ្នំពេញ បានណែនាំដល់អាជ្ញាធរសង្កាត់ផ្សារដើមថ្កូវ និងអាជ្ញាធរខណ្ឌចំការមន ឲ្យយកចិត្តទុកដាក់រក្សាការពារប្រឡាយបឹងត្របែកឲ្យចៀសផុតពីការរំលោភបំពានពីជនឆ្លៀតឱកាសនិយម ដោយអាជ្ញាធរត្រូវធានាថា ចាប់ពីពេលនេះទៅហាមមិនឲ្យមានការចាក់ដីរំលោភបន្ថែម និងមិនត្រូវឲ្យមានសំណង់ផ្សេងៗកើតឡើងទៀតនោះទេ ។
ក្នុងពេលចុះពិនិត្យជាក់ស្តែងពីស្ថានភាពប្រឡាយ និងផលប៉ះពាល់នានា នៅប្រឡាយបឹងត្របែក កាលរសៀលថ្ងៃទី១៣ កុម្ភៈ ២០១៦ លោក ប៉ា សុជាតិវង្ស បានណែនាំឲ្យអាជ្ញាធរសង្កាត់ និងខណ្ឌ ត្រូវស្រង់ស្ថិតិចំនួនប្រជាពលរដ្ឋដែលរស់នៅតាមមាត់ប្រឡាយឲ្យបានច្បាស់លាស់ ដើម្បីងាយស្រួលក្នុងការគ្រប់គ្រង ជាមួយគ្នានេះសាលារាជធានីភ្នំពេញ នឹងបង្កើតការិយាល័យទំនាក់ទំនងមួយនៅតំបន់នេះតែម្តង ដើម្បីធ្វើការសម្របសម្រួលជាមួយប្រជាពលរដ្ឋបានងាយស្រួល ។
លោក ប៉ា សុជាតិវង្ស បានបញ្ជាក់ថា ការងារដែលត្រូវធ្វើនេះ ដើម្បីអភិវឌ្ឍប្រព័ន្ធប្រឡាយរំដោះទឹក ហើយក៏ជាពេលវេលាសមស្របដែលយើងត្រូវធ្វើព្រោះជារដូវប្រាំង រួមទាំងការអភិរក្សប្រឡាយពីការរំលោភផងដែរ ។
ជាមួយគ្នានេះដែរ លោកអភិបាលរាជធានី ក៏បានបង្ហាញពីការខកចិត្ត ពីព្រោះតែការរំលោភបឹងត្របែកដែលជាបឹង និងជាប្រឡាយបង្ហូរទឹកដ៏សំខាន់នៅប៉ែកខាងត្បូងរាជធានីភ្នំពេញ ពីអ្នកមានបុណ្យស័ក្តិមួយចំនួន ដែលជាគំរូអាក្រក់ និងជាការលើកទឹកចិត្តដល់សកម្មភាពរំលោភបំពានលើប្រឡាយបង្ហូរទឹកនេះ ។ លោកបញ្ជាក់ថា ការអភិវឌ្ឍប្រឡាយបឹងត្របែក គឹមិនអាចពន្យារពេលតទៅទៀតបានទេ ។ អាងស្តុកទឹក និងប្រឡាយបឹងត្របែកខាងជើង និងខាងត្បូង ដែលមានទំហំជាង៣០ហិកតា ត្រូវបានគេចាក់ដីរំលោភយកធ្វើកម្មសិទ្ធិផ្ទាល់ខ្លួន នៅសល់មិនដល់១០ហិកតាផងមកដល់ពេលនេះ ផ្ទៃបឹងត្រូវបានគេចាក់ដីសង់សំណង់ផ្សេងៗ រីឯផ្ទៃបឹងដែលនៅក្នុងទឹក ត្រូវបានគេបោះបង្គោលអង្កន់ជាឡូត៏រំលោភយកដោយមិនមានការកោតក្រែង និងធ្វើឲ្យប៉ះពាល់ធ្ងន់ធ្ងរដល់អាងស្តុកទឹក និងប្រព័ន្ធប្រឡាយបង្ហូរទឹកដ៏សំខាន់១នេះនៅពេលផ្ទៃបឹងកាន់តែរួមតូច និងកាន់តែគោករាក់ជាបន្តបន្ទាប់ ។
លោក ប៉ា សុជាតិវង្ស បានណែនាំឲ្យមន្ទីរជំនាញបើកដំណើរការស្តារប្រឡាយបឹងត្របែកជាង៩០០ម៉ែត្រនេះ ឲ្យបានឆាប់រហ័សទាន់ភ្លៀងមិនទាន់ធ្លាក់ រួមទាំងការកាយសំរាមដ៏ច្រើនសន្ធឹកសន្ធាប់ដែលត្រូវគេបោះចូលប្រឡាយដើម្បីបើកមុខទឹកឲ្យហូរបានលឿន ។
អាជ្ញាធរខណ្ឌចំការមនបានឲ្យដឹងថា ប្រជាពលរដ្ឋដែលរស់នៅតំបន់ប៉ះពាល់នេះ ត្រូវបានចែកចេញជា៣តំបន់ ទី១-បងប្អូនដែលរស់នៅតាមមាត់ប្រឡាយមានចំនួន៣៧៨ខ្នងផ្ទះ ទី២-អ្នករស់នៅមាត់បឹងមានចំនួន១៩៥ខ្នងផ្ទះ និងទី៣-តំបន់ក្នុងបឹងដែលមិនមានផ្ទះ តែត្រូវបានគេចាប់យកធ្វើកម្មសិទ្ធិផ្ទាល់ខ្លួនមាន១០០ក្បាលដី សរុបមាន៦៧៦ខ្នងផ្ទះ និងក្បាលដី ។
សូមបញ្ជាក់ថា សាលារាជធនីភ្នំពេញមានគម្រោងស្តារប្រឡាយ រួមទាំងការធ្វើជញ្ជាំងប្រឡាយ និងផ្លូវបេតុងអមប្រឡាយបឹងត្របែកចាប់ពីផ្លូវលេខ៤៨៨ ដល់ស្ថានីយបូមទឹកបឹងត្របែកដែលមានបណ្តោយ៩៧៥ម៉ែត្រ និងទទឹងពី១០ម៉ែត្រទៅ៣០ម៉ែត្រផងដែរ ៕
ចែករំលែកព័តមាននេះ