ខេត្តកំពង់ធំ ៖ គ្រាន់តែរយៈពេលជាង២ម៉ោង មានមនុស្ស២នាក់បានស្លាប់បាត់បង់ជីវិត និងរងរបួសធ្ងន់ម្នាក់ ដោយសារគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៦ ក្នុងទីរួមខេត្តកំពង់ធំ ដែលបង្កឡើងដោយរថយន្តបុកគ្នាជាមួយម៉ូតូ ។ ផ្អែកតាមរបាយការណ៍របស់សមត្ថកិច្ចនគរបាលចរាចរនៃស្នងការដ្ឋានខេត្ត បានឱ្យដឹងថា នៅយប់ថ្ងៃទី២៧ មីនា លើកំណាត់ផ្លូវជាតិលេខ៦ មានគ្រោះថ្នាក់ចរាចរណ៍កើតឡើងចំនួន២លើកផ្ទួនៗគ្នា គឺគ្រាន់តែចន្លោះម៉ោង៨ទៅដល់ម៉ោង១០យប់ មានមនុស្ស២នាក់ស្លាប់ និងម្នាក់ទៀតរងរបួសធ្ងន់ ព្រមទាំងខូចខាតរថយន្ត និងម៉ូតូយ៉ាងដំណំ ។
ប្រភពបន្តថា ករណីទី១ នៅវេលាម៉ោង១៩និង៥នាទី នៅចំណុចភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន មានគ្រោះថ្នាក់ចរាចរណ៍មួយកើតឡើងរវាងរថយន្តម៉ាកតូយ៉ូតា តាកូម៉ា ពណ៌ខ្មៅ បើកបរដោយឈ្មោះតយ សឿងអ៊ី ភេទប្រុស អាយុ៥១ឆ្នាំ ទីលំនៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ បានបុកម៉ូតូមួយគ្រឿង ម៉ាក C125 ស៊េរី២០១០ បណ្តាលឱ្យម្ចាស់ម៉ូតូឈ្មោះសុខ ផាន់ណា ភេទប្រុស អាយុ២៥ឆ្នាំ រស់នៅភូមិមហ៍ ឃុំជ័យ ស្រុកកំពង់ស្វាយ បណ្តាលឱ្យរងរបួសធ្ងន់ធ្ងន់ ។ ចំណែកវត្ថុតាងត្រូវបានយកទៅរក្សាទុកនៅអធិការដ្ឋាននគរបាលក្រុង ដើម្បីដោះស្រាយតាមនីតិវិធី។
ដោយឡែកគ្រោះថ្នាក់ចរាចរណ៍មួយករណីទៀតកើតឡើងនៅវេលាម៉ោង២១និង៥៤នាទីថ្ងៃដដែលនៅលើផ្លូវជាតិលេខ៦ចំណុចភូមិពពេច ឃុំចុងដូង ស្រុកបារាយណ៍ រវាងរថយន្តមិនស្គាល់ម៉ាកបានបុកម៉ូតូមួយគ្រឿង បណ្តាលឱ្យមនុស្សពីរនាក់ជាម្ចាស់ម៉ូតូ បានស្លាប់នៅនឹងកន្លែង គឺ១-ឈ្មោះញឿន ឡេង ភេទប្រុស អាយុ២៣ឆ្នាំ រស់នៅភូមិទួលដំណាក់ ឃុំចុងដូង ស្រុកបារាយណ៍ និង២-ឈ្មោះអ៊ុំ វិច្ឆិកា ភេទប្រុស អាយុ១៩ឆ្នាំ ទីលំនៅភូមិថ្មី ឃុំត្នោតជុំ ស្រុកបារាយណ៍ ភាគីរថយន្តបានគេចខ្លួនបាត់។ មន្ត្រីប៉ូលិសបានបញ្ជាក់ថា ជនរងគ្រោះក្នុងឧប្បត្តិហេតុគ្រោះថ្នាក់ចរាចរណ៍ខាងលើនេះ ពុំមានពាក់មួក សុវត្ថិភាព ទេ ។ សូមបញ្ជាក់ថា ជាមួយគ្រោះថ្នាក់ចរាចរណ៍ ដែលកើតឡើងជារៀងរាល់ថ្ងៃនេះ បានធ្វើឱ្យប្រជាពលរដ្ឋមានការខ្លាចរអាយ៉ាងខ្លាំង ពិសេស គ្រោះថ្នាក់ទាំងនោះសុទ្ធសឹងតែធ្វើឱ្យមនុស្សស្លាប់ជាក្រុមៗ ឬទាំងគ្រួសារៗ៕
ចែករំលែកព័តមាននេះ