រាជធានីភ្នំពេញ ៖ កាលពីរសៀលថ្ងៃទី៧ មីនា ឆ្នាំ២០១១ នៅសាលប្រជុំនៃអគ្គនាយកដ្ឋានគយ និងរដ្ឋាករកម្ពុជា មានប្រារព្ធកិច្ចប្រជុំមួយស្តីពីការត្រៀមអនុវត្តគម្រោងពង្រីកប្រព័ន្ធស្វ័យប្រវត្តិកម្មទិន្នន័យគយ ឬហៅកាត់ថា អាស៊ីគូដា (ASYCUDA) ក្រោមអធិបតីភាពលោកបណ្ឌិត ប៉ែន ស៊ីម៉ន ប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា ។ គោលបំណងសំខាន់នៃកិច្ចប្រជុំ គឺ ពិនិត្យមើលពីវឌ្ឍនភាពនៃការអនុវត្តប្រព័ន្ធអាស៊ីគូដាដែលបានដាក់ឱ្យដំណើរការនៅការិយាល័យ និងទីស្នាក់ការគយ និងរដ្ឋាករទាំង៥កន្លែង និងវឌ្ឍនភាពនៃការត្រៀមអនុវត្តគម្រោងពង្រីកប្រព័ន្ធអាស៊ីគូដានេះតាមបណ្តាមាត់ច្រកគយសំខាន់ៗចំនួន១៧កន្លែងថែមទៀត ។ នៅក្នុងកិច្ចប្រជុំនោះ ប្រធាន អនុប្រធាន និងសមាជិកក្រុមការងារគម្រោងជាតិ ព្រមទាំងអស់លោកជាប្រធាននាយកដ្ឋាន ការិយាល័យ សាខា និងទីស្នាក់ការគយ និងរដ្ឋាករ បានរាយការណ៍ពីវឌ្ឍនភាព លទ្ធផលការងារ ការប្រឈមនានា ក្នុងការត្រៀមអនុវត្តគម្រោងពង្រីកប្រព័ន្ធអាស៊ីគូដានេះ។
នៅក្នុងឱកាសនោះ លោកបណ្ឌិត ប៉ែន ស៊ីម៉ន បានគូសបញ្ជាក់ថា គម្រោងប្រព័ន្ធស្វ័យប្រវត្តិកម្មទិន្នន័យគយនេះ ជាផ្នែកមួយនៃផែនការ១២ចំណុចរបស់រាជរដ្ឋាភិបាលកម្ពុជា សម្រាប់ការធ្វើឱ្យប្រសើរឡើងនូវបរិយាកាសវិនិយោគ និងកិច្ចសម្រួលពាណិជ្ជកម្មនៅកម្ពុជា និងក៏ជាការងារគន្លឹះមួយនៃកម្មវិធីកំណែទំរង់ និងទំនើបកម្មរដ្ឋបាលគយ និងរដ្ឋាករកម្ពុជាឆ្នាំ២០០៩-២០១៣ ។ ជាមួយគ្នានេះ លោកក៏បានណែនាំមន្ត្រីគយទាំងអស់ឱ្យចូលរួមអនុវត្តគម្រោងនេះឱ្យបានសកម្ម និងប្រកបដោយស្មារតីទទួលខុសត្រូវខ្ពស់ ដើម្បីធានាសម្រេចជោគជ័យនៃគម្រោងដែលគាំទ្រដោយធនាគារពិភពលោកនេះ ព្រោះថា ប្រព័ន្ធស្វ័យប្រវត្តិកម្មទិន្នន័យគយ នឹងប្រើជាមូលដ្ឋានគ្រឹះសម្រាប់កសាង និងអនុវត្តគម្រោងថ្មីនោះ គឺបញ្ជរតែមួយជាតិ (National Single Window) ដែលជាផ្នែកមួយទៀតនៃផែនការ១២ចំណុចរបស់រាជរដ្ឋាភិបាល និងក៏ជាកាតព្វកិច្ចរបស់កម្ពុជាក្នុងនាមជាសមាជិកអាស៊ានផងដែរ ។
លោកប្រតិភូរាជរដ្ឋាភិបាលបានណែនាំ និងលើកទិសដៅការងារចំពោះមុខមួយចំនួនដូចខាងក្រោម ៖
- -នាយកដ្ឋាន ការិយាល័យ និងទីស្នាក់ការគយ និងរដ្ឋាករ ដែលស្ថិតនៅក្រោមគម្រោងនេះ ត្រូវជំរុញឱ្យបានឆាប់បំផុតនូវការកែលំអ ឬកសាងការិយាល័យ សម្រាប់បំពាក់និងអនុវត្តប្រព័ន្ធអាស៊ីគូដា ឱ្យស្របតាមគំនូសប្លង់ដែលគណៈកម្មការដឹកនាំគម្រោងបានឯកភាព ។
- -លោកប្រធាន និងសមាជិកក្រុមការងារគម្រោងជាតិ ត្រូវចុះតាមដាន និងជំរុញការងារនេះរួមទាំងការងារទទួល និងដំឡើងសំភារបរិក្ខារនានារបស់គម្រោងផង ។
- -ទាំងអស់គ្នាត្រូវត្រៀមធ្វើការជាមួយអ្នកជំនាញការជាតិ និងអន្តរជាតិ ដែលនឹងចាប់ផ្តើមការងារចាប់ពីថ្ងៃទី១៤ មីនា ឆ្នាំ២០១១ នេះ ។
- -លោកប្រធានក្រុមការងារគម្រោងជាតិ ត្រូវរិះរកវិធី ឬយន្តការធ្វើយ៉ាងណាស្រូបទាញយកបទពិសោធន៍ការងារ (ចំណេះដឹង និងចំណេះធ្វើ) ពីជំនាញការទាំងនោះ ទាំងផ្នែកមុខងារ និងបច្ចេកទេសរបស់ប្រព័ន្ធ គឺថាត្រូវចាប់យកភាពជាម្ចាស់ការក្រោយពេលបញ្ចប់គម្រោងនេះដែលមានរយៈពេល១៦ខែ ។
- -ត្រូវត្រៀមរៀបចំប្រជុំគណៈកម្មាធិការដឹកនាំគម្រោងលើកទី ១១ ដែលនឹងប្រារព្ធធ្វើនៅដើមខែឧសភា ឆ្នាំ២០១១ នេះ ៕
ចែករំលែកព័តមាននេះ