លោកមូអាម៉ា កាដាហ្វី កាលពីថ្ងៃទី១៧ មីនា បានថ្លែងតាមទូរទស្សន៍ថា ក្នុងករណីមានប្រតិបត្តិការយោធារបស់បរទេសលើដែនដីលីប៊ី រដ្ឋអំណាចលីប៊ីនឹងវាយប្រហារសងសឹកវិញលើបណ្តានាវា និងយន្តហោះស៊ីវិល ក៏ដូចជាយោធាក្នុងតំបន់មេឌីទែរ៉ាណេ ។ កងទ័ពដែលស្មោះត្រង់រដ្ឋាភិបាលនឹងទៅដល់ក្រុងបេនហ្គាហ្ស៊ីនាយប់នេះ ។ ប៉ុន្មានម៉ោងក្រោយការអនុម័តរបស់ អ.ស.ប សំដៅបញ្ឈប់ការបង្ក្រាបការបះបោរប្រទេសលីប៊ីបានព្រមានកាលពីថ្ងៃទី១៧ មីនា ប្រឆាំងនឹងរាល់ប្រតិបត្តិការយោធាបរទេសលើដែនដីខ្លួន ។ ប្រទេសនេះបានគំរាមកំហែងវាយប្រហារលើបណ្តាយន្តហោះ និងនាវាស៊ីវិល ព្រមទាំងយោធានៅមេឌីទែរ៉ាណេ ។
អ្នកនាំពាក្យម្នាក់របស់ក្រសួងការពារប្រទេសលីប៊ីដកស្រង់សម្តីដោយទីភ្នាក់ងារព័ត៌មានផ្លូវការ JANA បញ្ជាក់ថា រាល់សមាសភាពចល័តស៊ីវិល ឬយោធានឹងជាគោលដៅនៃការវាយបកមួយរបស់លីប៊ី ។ តំបន់សមុទ្រមេឌីទែរ៉ាណេនឹងជួបគ្រោះថ្នាក់ធ្ងន់ធ្ងរពុំត្រឹមតែរយៈពេលខ្លីមួយនោះទេ ក៏ប៉ុន្តែក្នុងរយៈពេលយូរផងដែរ ។
កងទ័ពរបស់លោកកាដាហ្វីពេលនេះហាក់ដូចជានៅទទួលជោគជ័យថ្មីៗទៀតលើទីលានប្រយុទ្ធ ។ នាថ្ងៃទី១៧ មីនា កងទ័ពនេះបានមកដល់ក្បែរទីក្រុងបេនហ្គាហ្ស៊ី ជាទីក្រុងធំទី២របស់ប្រទេស ស្ថិតនៅភាគខាងកើតនឹងជាទីតាំងបង្អែករបស់ពួកបះបោរចាប់តាំងពី១ខែមកហើយ ។ ព័ត៌មាននេះត្រូវបានបដិសេធភ្លាមៗដោយពួកបះបោរ ។
រដ្ឋមន្ត្រីការបរទេសបារាំង លោក ALAIN JUPPE គូសបញ្ជាក់កាលពីថ្ងៃទី១៧ មីនា ថា នឹងមានការវាយប្រហារតាមអាកាសលើលីប៊ី ភ្លាមៗក្រោយការអនុម័តដំណោះស្រាយមួយដោយក្រុមប្រឹក្សាសន្តិសុខ អ.ស.ប ។ រដ្ឋមន្ត្រីការបរទេសបារាំងអះអាងថា នេះជាប្រតិបត្តិការចម្រុះមួយ យើងធ្វើជាមួយប្រទេសដទៃៗ ទៀត ដោយយើងពុំមែនធ្វើតែម្នាក់ឯងឡើយ ។ នេះពុំមែនជាប្រតិបត្តិការមួយរបស់បារាំងទេ តែជាប្រតិបត្តិការមួយរបស់អន្តរជាតិ ក្នុងនោះមានការចូលរួមរបស់អាមេរិកផង ។
មុននេះ កងទ័ពលីប៊ីប្រកាសពីការបញ្ឈប់ប្រតិបត្តិការយោធាប្រឆាំងពួកបនភេរវករប្រដាប់អាវុធ ចាប់ពីថ្ងៃទី២០ មីនា ទៅ ដើម្បីទុកពេលឱ្យពួកបះបោរប្រគល់អាវុធ និងឱ្យពួកគេទទួលបានការសម្រេចចិត្តលើកលែងទោសជាទូទៅមួយ ។
កាលពីយប់ថ្ងៃទី១៧ មកទី១៨ មីនា ក្រុមប្រឹក្សាសន្តិសុខ អ.ស.ប បានអនុម័តដំណោះស្រាយមួយ ដែលអនុញ្ញាតឱ្យប្រើកម្លាំងនៅលីប៊ីដើម្បីការពារប្រជាជនស៊ីវិលពីការវាយប្រហាររបស់កងទ័ពលោកកាដាហ្វី ។ ដំណោះស្រាយនេះតម្រូវឱ្យបង្កើតតំបន់ហាមហោះហើរអាកាសមួយដែលសំដៅរាំងខ្ទប់កងទ័ពលោកកាដាហ្វីកុំឱ្យទម្លាក់គ្រាប់បែកលើពួកបះបោរ ពិសេសក្នុងទីក្រុងបេនហ្គាហ្ស៊ី ។ ដំណោះស្រាយនេះក៏រួមមានការដាក់ទណ្ឌកម្មហិរញ្ញវត្ថុថ្មីៗទៀតដែរ ។ ប្រទេស១០ជាសមាជិកក្រុមប្រឹក្សាសន្តិសុខ អ.ស.ប បានបោះឆ្នោតគាំទ្រដំណោះស្រាយនេះ ហើយសមាជិក៥ទៀតរបស់ក្រុមប្រឹក្សានេះបានបោះឆ្នោតអនុប្បវាទ ។ ចិន និងរុស្ស៊ី បានសម្តែងការសោកស្តាយដែលដំណោះស្រាយនេះពុំផ្តល់ការបញ្ជាក់ថែមទៀត លើរឿងភស្តុភារ ទីបញ្ជាការ និងបែបបទនៃការអនុវត្តន៍ ។ ប៉ុន្តែទោះបីយ៉ាងនេះក្តី ប្រទេសទាំង២នេះ បានជ្រើសរើសមិនប្រើវេតូ ។ ប្រទេសអង់គ្លេសដែលបោះអនុប្បវាទដូចរុស្ស៊ី និងចិនដែរនិយាយថា នេះគឺដើម្បីចៀសវាងកុំឱ្យឈាមហូរច្រើនទៀត ហើយអះអាងថា បណ្តាប្រទេសអារ៉ាប់នឹងចូលរួមជាមួយកងកម្លាំងអន្តរជាតិ តែពុំបានផ្តល់ភាពលម្អិតជាងនេះឡើយ ។ ក៏ប៉ុន្តែដំណោះស្រាយនេះបញ្ជាក់ថា នឹងពុំមានកងកម្លាំងកាន់កាប់ណាមួយត្រូវបានដាក់ពង្រាយឡើយ ។ គេផ្តោតជាពិសេសលើការវាយប្រហារតាមអាកាសដែលអាចធ្វើក្នុងរយៈពេលប៉ុន្មានម៉ោងខាងមុខនេះ ដូចការអំពាវនាវរបស់បារាំង ។
យោងតាមទូរទស្សន៍កាណាដា CTV NEWS កាណាដានឹងបញ្ជូនយន្តហោះប្រដេញ៦គ្រឿង ។ ចំណែកប្រទេសអុីតាលីនឹងផ្តល់ឱ្យប្រើប្រាស់មូលដ្ឋានយោធាទាំងឡាយ ។
ប្រទេសលីប៊ីមានមីស៊ីលដី-អាកាសយ៉ាងច្រើនសម័យកាលសូវៀត តែពុំមាននរណាដឹងពិតប្រាកដពីលក្ខខណ្ឌទាំងឡាយឡើយ ។ កាលពី២៥ឆ្នាំមុននេះ សហរដ្ឋអាេមរិកធ្លាប់វាយប្រហារតាមអាកាសប្រឆាំងប្រទេសនេះ តែពុំមានបាត់បង់យន្តហោះណាមួយឡើយ ។
នៅទីក្រុងបេនហ្គាហ្ស៊ីមនុស្សទាំងឡាយបានលើកគ្នាស្រែកហ៊ោនៅកណ្តាលក្រុងអបអរសាទរចំពោះការអនុម័តដំណោះស្រាយនោះរបស់ អ.ស.ប ៕
ចែករំលែកព័តមាននេះ