ខេត្ដកំពង់ចាម ៖ ស្រះទឹកមួយកន្លែងស្ថិតនៅក្នុងបរិវេណវត្ដបភាវវត្យារាម ហៅ វត្ដគគរ ឃុំគគរ ស្រុកកំពង់សៀម ដែលព្រះសង្ឃនិងពុទ្ធបរិស័ទចំណុះជើងវត្ដបានដាំសុទ្ធ តែដើមរំចង់នោះកំពុងតែបង្កើតឱ្យមានការភ្ញាក់ផ្អើលនៅក្នុងចិត្ដប្រជាពលរដ្ឋដែលពោរពេញទៅដោយអបិយជំនឿនោះយល់ថា វត្ដគគរនេះមានបារមីពូកែស័ក្ដិសិទ្ធិណាស់ ពីព្រោះដើមរំចង់ដែលដាំក្នុងស្រះនោះប្រែក្លាយទៅជាដើមឈូកចេញផ្ការីករហង់គួរឱ្យគយគន់ទៅវិញ ។ អ្វីដែលចាត់ទុកថាគួរឱ្យចាប់អារម្មណ៍ដែរនោះគឺអ្នកស្រុកចំការលើផ្អើលនាំគ្នាមកដកយកដើមឈូក៣ដើមទៅដាំបែរជាមិនដុះ ហើយម្យ៉ាងទៀតឈូក ដែលដុះក្នុងស្រះនោះក៏គ្មាននរណាយកមកដាំដែរ គឺដុះឡើងដោយឯកឯងតែម្ដងធ្វើឱ្យអ្នកស្រុកចំឡែកអារម្មណ៍គ្រប់ៗគ្នា ។
លោកឌិន សារ៉ន អាយុ៥៦ឆ្នាំ រស់នៅភូមិគគរ២ ឃុំគគរ ជាប្រធានគណៈកម្មការវត្ដគគរបានមានប្រសាសន៍ប្រាប់កោះសន្ដិភាពឱ្យដឹងនាព្រឹកថ្ងៃទី២៨ មីនា កន្លងមកថា ស្រះទឹកនេះមានតាំងតែពីជំនាន់សង្គមរាស្ដ្រ និយមមកម្ល៉េះ ប៉ុន្ដែជំរៅស្រះរាក់ហើយមានព្រៃដុះទ្រុបទ្រុល ។ លុះមកដល់ឆ្នាំ២០០៥ មានសប្បុរសជននៅសហរដ្ឋអាមេរិកបានផ្ដល់បច្ច័យចំនួន១.០០០ដុល្លារ ដើម្បីស្ដារទឹកស្រះឱ្យមានជំរៅរហូតដល់៦ម៉ែត្រ រួមជាមួយនឹងបច្ច័យរបស់សប្បុរសជននៅក្នុងស្រុកផង ក៏បានរៀបខឿនថ្មីនិងកាំជណ្ដើរថ្មី។ ជាពិសេសនៅជុំវិញស្រះក៏បានរៀបរបងព័ទ្ធជុំវិញផងដែរ ដើម្បីការពារគោ-ក្របីកុំឱ្យចុះទឹកស្រះ ធ្វើយ៉ាងណាថែរក្សាទឹកឱ្យបានស្អាតនិងមានបរិស្ថានល្អ ។ លោកប្រធានគណៈកម្មការវត្ដបានបន្ដថា រហូតមកដល់ឆ្នាំ២០០៩ ក្នុងរដូវបុណ្យភ្ជុំបិណ្ឌស្រាប់តែឃើញមានដើមឈូកដុះពេញស្រះតែម្ដង ដោយមានផ្ការីកក្រពុំចោលក្លិនក្រអូបឈ្ងុយឈ្ងប់ ដែលដើមឈូកទាំងអស់នោះដុះមកឯកឯង គ្មាននរណាម្នាក់យកមកដាំនៅក្នុងស្រះនេះទេ ហើយស្ថានភាពដើមឈូកនេះក៏មានលក្ខណៈប្លែកពីឈូកឯទៀតដែរ គឺស្លឹកមិនមានពេញលេញ ឯផ្ការីកប៉ោងជាងផ្កាធម្មតា ហើយមានស្រទាប់ច្រើន ។ លោកប្រធានគណៈកម្មការវត្ដបន្ដថា នៅដើមខែមីនានេះប្រជាពលរដ្ឋឈ្មោះ ស្រី លួម ភេទប្រុស រស់នៅស្រុកចំការលើបានមកលេងវត្ដហើយ ឃើញផ្កាឈូកចេញក្រពុំល្អក៏សុំចៅអធិការវត្ដដកដើមឈូកចំនួន៣ដើមយកទៅដាំនៅក្នុងស្រះមួយកន្លែងលាយឡំជាមួយព្រលិត និងរំចង់ ។ ប៉ុន្ដែពេលយកទៅដោតដាំនោះ បែរជាសត្វក្ដាមកាត់ដើមឈូកទាំង៣ដើមនោះចោល ក្រៅពីនេះក្ដាមមិនកាត់ទេ គាត់ជឿថា ពិតជាអច្ឆរិយៈមែន ។
នៅព្រឹកថ្ងៃទី២៨ មីនា មានសប្បុរសជន ១-ឈ្មោះឃុត សុខា ២-ឈ្មោះសួន ណេ ស្រេង ៣-ឈ្មោះសេង ចាយ បានយកឥដ្ឋចំនួន៣.០០០ដុំ និងស៊ីម៉ង់ត៍១តោន មកប្រគេនព្រះចៅអធិការវត្ដសំរាប់កសាង សមិទ្ធផលនានាក្នុងវត្ដ ព្រមទាំងបានដងទឹកស្រះសំរាប់យកទៅទុកលុបមុខនិងលាបខ្លួនប្រាណទៅតាមជំនឿដែលពួកគាត់គិតថា ពូកែស័ក្ដិសិទ្ធិ ពីព្រោះតាមរយៈការបែបន់នាពេលកន្លងមកពួកគេបានសំរេចតាមបំណងប្រាថ្នា ។ លោកលន់ លឹមថៃ អភិបាលរងខេត្ដកំពង់ចាម ក៏បានរួមចំណែកចូលបច្ច័យជាច្រើនជួយកសាងស្រះនេះដែរ ។
ចំណែកលោកតាឈ្មោះប៉ិល ហឿង អាយុ៧៥ឆ្នាំ ជាគណៈកម្មការវត្ដគគរនេះដែរ បានមានប្រសាសន៍ឱ្យដឹងថា ចំពោះស្រះទឹក ដែលមានហេតុចម្លែកអសា្ចរ្យនោះគឺស្ថិតនៅមុខកុដិរបស់ព្រះចៅអធិការវត្ដតែម្ដង។ ក្នុងជួរគណៈកម្មការវត្ដនិងព្រះសង្ឃគង់ក្នុងវត្ដទាំងអស់សុទ្ធតែបដិសេធថា មិនមាននរណាម្នាក់យកឈូកពូជនេះទៅដាំឡើយ គឺវាបានដុះឡើងដោយឯកឯង ។ ពេលនេះទឹកស្រះរាក់មិនអាចស្ដារឱ្យជ្រៅថែមទៀតបានទេ ព្រោះប៉ះពាល់ដល់ដើមឈូកដែលដុះយ៉ាងច្រើនស្អេកស្កះពេញស្រះ ដោយធ្វើយ៉ាងណាបន្ដថែរក្សាទុកមើល១ឆ្នាំទៅ២ឆ្នាំទៀត ក្រែងមានអព្ហូតហេតុប្លែកណាមួយកើតឡើងទៀត ។
លោកពេញ សុខជា នាយប៉ុស្ដិ៍រដ្ឋបាលឃុំ គគរ ប្រាប់តាមទូរស័ព្ទថា នៅពេលដែលទទួលបាននូវព័ត៌មានខាងលើនេះ រូបលោកបានទៅសួរគណៈកម្មការវត្ដគគរ ក៏បានដឹងថា ពីដំបូងមានលោកនេន១អង្គ បានយកដើមរំចង់ចំនួន២ដើមទៅដាំនៅក្នុងស្រះ លុះពេលដុះរីកសាយឡើងបែរជាចេញសុទ្ធតែជាដើមឈូកនេះទៅវិញ ហើយលោកក៏មិនដឹងថាវាបែបណាដែរ ។ រុក្ខជាតិមានច្រើនប្រភេទណាស់ សូម្បីតែឈូកក៏មានលក្ខណៈខុសគ្នាផងដែរ ឯអ្នកខ្លះថាដាំរំចង់ដុះចេញមកជាឈូក ឬអ្នកខ្លះថាមិនបានដាំ គឺដុះមកឯកឯង នោះជាការនិយាយតៗគ្នា ហើយថាការយកទៅដាំខុសពីស្រះនេះមិនដុះក៏ជាការនិយាយតៗគ្នាប៉ុណ្ណោះ ៕
ចែករំលែកព័តមាននេះ