រាជធានីភ្នំពេញ ៖ ក្រុមហ៊ុនធានារ៉ាប់រងអាយុជីវិត មេនូឡាយហ្វ៍ ខេមបូឌា បានប្រគល់ពានកិត្តិយសជូនទីប្រឹក្សាធានារ៉ាប់រងឆ្នើមរបស់ខ្លួនប្រចាំឆ្នាំ២០១៥ ។ កាលពីថ្ងៃទី០៥ កុម្ភៈ ២០១៦ ក្រុមហ៊ុនមេនូឡាយហ្វ៍ខេមបូឌា បានរៀបចំសនិ្នសីទសារព័ត៌មានមួយនៅសណ្ឋាគារ សូហ្វីតែល ភ្នំពេញ ភូគីត្រា ស្តីការប្រគល់ពានរង្វាន់ឆ្នើមនេះ ដោយមានការរួមពីថ្នាក់ដឹកនាំក្រុមហ៊ុន ប្រធានផ្នែកលក់ និងទីប្រឹក្សាធានារ៉ាប់រងឆ្នើមរបស់ក្រុមហ៊ុនប្រមាណ៥០នាក់ ដើម្បីសម្ដែងការកោតសរសើរ និងអបអរសារទរដល់ទីប្រឹក្សាធានារ៉ាប់រងឆ្នើមប្រចាំឆ្នាំដែលបានសម្រេចលទ្ធផលលេចធ្លោជាងគេ និងបានផ្ដល់នូវសេវាកម្មប្រកបដោយគុណភាព និងមានវិជ្ជាជីវៈខ្ពស់ជូនអតិថិជន ។
លោក Robert Elliott អគ្គនាយកប្រតិបត្តិ និងនាយកចាត់ការទូទៅរបស់ក្រុមហ៊ុន មេនូឡាយហ្វ៍ ខេមបូឌា បានមានប្រសាសន៍ថា ក្រុមហ៊ុន មេនូឡាយហ្វ៍ ពេញចិត្តជាខ្លាំងចំពោះលទ្ធផលសម្រេចបាននាឆ្នាំ២០១៥ និងសូមសម្តែងនូវការកោតសរសើរខ្ពស់ចំពោះទីប្រឹក្សាធានារ៉ាប់រងដែលពោរពេញទៅដោយសមត្ថភាព និងចំណេះដឹងល្អៗ ។ ជោគជ័យ និងសមិទ្ធផលនានាដែលយើងសម្រេចបានគូសបញ្ជាក់ពីការប្រឹងប្រែងឥតឈប់ឈររបស់យើង ដើម្បីក្លាយខ្លួនជាក្រុមហ៊ុនផ្ដល់ដំណោះស្រាយផ្នែកហិរញ្ញវត្ថុ និងសេវាកម្មធានារ៉ាប់រងអាយុជីវិតឈានមុខគេនៅកម្ពុជា ។
លោកបន្តថា អតិថិជន គឺជាស្នូលនៃរាល់អាជីវកម្មរបស់ក្រុមហ៊ុន ខណៈយើងកំពុងជួយក្រុមគ្រួសារនៅកម្ពុជាកសាងអនាគតដ៏ប្រសើរមួយ។ ទីប្រឹក្សាធានារ៉ាប់រងរបស់យើង ដែលពោរពេញទៅដោយចំណេះដឹង និងវិជ្ជាជីវៈ កំពុងតែផ្តល់ប្រឹក្សា និងដំណោះស្រាយផ្នែករៀបចំផែនការហិរញ្ញវត្ថុជូនប្រជាជនកម្ពុជា ដូចជា ការការពារប្រាក់ចំណូល អនាគតការសិក្សាបុត្រធីតា និងសេវាកម្មសន្សំប្រាក់សម្រាប់ក្រុមគ្រួសារជាដើម។
លោក ចៅ សុជាតិ ដែលជាប់ជាទីប្រឹក្សាធានារ៉ាប់រងឆ្នើម និងជាប្រធានដឹកនាំក្រុមឆ្នើមបានសម្តែងនូវក្តីសប្បាយរីករាយ និងមោទនភាពចំពោះសមិទ្ធផលដែលសម្រេចបានសម្រាប់ឆ្នាំ២០១៥ កន្លងទៅនេះ។ លោក ចៅ សុជាតិ បាននិយាយថា «ខ្ញុំពេញចិត្តនឹងការងារដែលខ្ញុំកំពុងតែធ្វើជាមួយក្រុមហ៊ុន មេនូឡាយហ្វ៍ ពីព្រោះការងារនេះ មិនត្រឹមតែមានសារសំខាន់សម្រាប់រូបខ្ញុំ និងក្រុមគ្រួសារខ្ញុំប៉ុណ្ណោះទេ ប៉ុន្តែគឺសម្រាប់ប្រជាជនកម្ពុជាគ្រប់រូប ។ ធានារ៉ាប់រងអាយុជីវិត គឺជាការធានាបន្ទុកក្រុមគ្រួសារ និងការពារហានិភ័យនានាចំពោះប្រភពចំណូលអនាគតក្រុមគ្រួសារលោកអ្នក ។
គួរបញ្ជាក់ថា ក្រុមហ៊ុនក៏បានប្រគល់ពានកិត្តិយស និងបានកោតសរសើរខ្ពស់ចំពោះទីប្រឹក្សាធានារ៉ាប់រងឆ្នើមរបស់ក្រុមហ៊ុនចំនួន៣នាក់ រួមមាន លោក ចៅ សុជាតិ ជាទីប្រឹក្សាឆ្នើម និងជាប្រធានដឹកនាំក្រុមឆ្នើម និងលោក ស្រេង ប៊ុនខេង ប្រធានផ្នែកលក់ឆ្នើមប្រចាំក្រុមហ៊ុន ៕
ចែករំលែកព័តមាននេះ