ខេត្តកំពង់ស្ពឺ ៖ លោកយាយពិការមួយរូបបានលើកដៃសំពះសុំក្តីមេត្តាពីសំណាក់សប្បុរសជនដែលមានចិត្តមេត្តាសូមជួយដល់លោកយាយផង ព្រោះពេលនេះជីវភាពលោកយាយមានការលំបាកខ្លាំងណាស់និយាយរួម គឺមិនសូវមានរបស់របរម្ហូបអាហារហូបចុកគ្រប់គ្រាន់ដូចគ្រួសារដទៃនោះទេ ។
ពេលនេះទៀត សោតលោកយាយមានអារម្មណ៍ថា ចង់ហូបឆ្ងាញ់ឱ្យបានមួយពេល ឬពីរពេល មុនពេលដែលលោកយាយលាចាកលោកនេះទៅ ស្ថិតក្នុងស្ថានភាពពិការផងនោះ លោកយាយស៊ូយឿន អាយុ ៦៥ឆ្នាំ រៀបរាប់ទាំងទឹកភ្នែកថា លោកយាយមានស្រុកកំណើតនៅភូមិក្រាំងស្វាយ ឃុំរលាំងគ្រើល ស្រុកសំរោងទងខេត្តកំពង់ស្ពឺ លោកយាយត្រូវបានឪពុកម្ដាយទុកដាក់អោយមានគូស្រករដូចអ្នកនៅក្នុងភូមិដទៃដែរ លុះក្រោយមកក្រោយឆ្នាំ៧៩ ទើប លោកយាយ និងប្ដីបង្កើតបានកូនប្រុសបីនាក់ ។
នៅឆ្នាំមិនចាំ ក្រោយពេលដែលលោកយាយបង្កើតកូនប្រុសទីបី(បច្ចុប្បន្នអាយុ២៥ឆ្នាំ) បានមួយខែ ប្ដីរបស់លោកយាយចេញពីផ្ទះបាត់ដំណឹងសូន្យឈឹង រហូតមកដល់សព្វថ្ងៃមិនដឹងថា ស្លា.ប់ ឬរស់នោះទេ ហើយលោកយាយក៏គ្មានលទ្ធភាពតាមស្វែងរកដែរ ។
លោកយាយបន្តថា សព្វថ្ងៃគាត់រស់នៅបាន គឺអាស្រ័យអ្នកភូមិផងរបងជាមួយ ជាពិសេសលោកមេភូមិដែលតែងតែយកចិត្តទុកដាក់ជាមួយលោកយាយ មានពេលខ្លះលោកយាយត្រូវបានអ្នកភូមិហុចបាយទឹកព្រឹកល្ងាច នៅពេលដែលលោកយាយខ្វះខាតម្ដងៗជាងនេះទៅទៀត រាល់ថ្ងៃបានកូនប្រុសទាំងពីររបស់គាត់រកស៊ីចិញ្ចឹមដើរស៊ីឈ្មួលមើលគោក្របីអោយគេ(គាត់នៅផ្ទះ) ចំណែកកូនបងមិនដឹងថា ពេលនេះគេទៅដល់ទីណានោះទេ ព្រោះចេញបាត់ពីផ្ទះទៅយូរហើយ ។
អ្វីដែលលោកយាយចង់បាននៅពេលនេះ គឺចង់បានរបស់របរគ្រឿងឧបភោគបរិភោគហូបឆ្ងាញ់នាជីវិតចុងក្រោយបានម្តងព្រោះតាំងពីដើមមកលោកយាយមិនដែលស្គាល់អ្វីដែលហៅថា ម្ហូបអាហារឆ្ងាញ់នោះទេ លោកយាយមានតែលើកម្រាមដៃដប់សំពះសុំក្តីមេត្តាពីសំណាក់សប្បុរសជនដែលមានចិត្តបុណ្យ សូមជួយសម្រេចបំណងលោកយាយនាជីវិតចុងក្រោយនេះបានម្ដងផង ។
លោកព្រំ សំអន មេភូមិក្រាំងស្វាយ ឃុំរលាំងគ្រើល ស្រុកសំរោងទង ខេត្តកំពង់ស្ពឺ បានប្រាប់អ្នកយកព័ត៌មានយើងថា គ្រួសារលោកយាយ ស៊ូយឿន គឺក្រីក្រ បើនិយាយពីក្រ គឺហៅលែងឮតែម្ដង តែកន្លងមកលោកយាយធ្លាប់ត្រូវបានអាជ្ញាធរស្រុក និងកាកបាទក្រហមផ្ដល់អំណោយឲ្យខ្លះដែរ ដែលអំណោយទាំងនោះអាចជួយដោះទាល់ លោកយាយក្នុងជីវភាពប្រចាំថ្ងៃបានមួយរយៈដែរ គឺមិនអាចទ្រទ្រង់ជីវភាពបានជាប់ជាប្រចាំនោះទេ ។
ក្នុងនាមអាជ្ញាធរ គឺបានស្វះស្វែងរកសប្បុរសជនមកជួយដល់លោកយាយមានជាប់ជាហូរហែររហូតមកដែរ នាពេលកន្លងមកម្យ៉ាងទៀតសោត លោកយាយត្រូវបានអាជ្ញាធរផ្តល់បណ្ណក្រីក្រប្រភេទមួយនឹងបានទទួលប្រាក់ឧបត្ថម្ភពីរាជរដ្ឋាភិបាលជារៀងរាល់ ថ្ងៃទី២៥ ប្រចាំខែនីមួយៗ គឺបើកតាមរយៈវីង ។
ក្នុងនាមអាជ្ញាធរលោកមិនព្រងើយកន្តើយចំពោះប្រជាពលរដ្ឋក្នុងមូលដ្ឋានរបស់ខ្លួននោះទេ គឺលោកតែងតែយកចិត្តទុកដាក់ហើយរាយការណ៍ទៅថ្នាក់លើជាប់ជាប្រចាំ ម្យ៉ាងវិញទៀត បើអស់លោកអ្នកមានចិត្តសប្បុរសចង់ជួយដល់លោកយាយ ឬក៏ធ្វើបុណ្យជាមួយមនុស្សដែលមានជីវភាពទីទាល់ក្រដូចជា លោកយាយសូមអញ្ជើញមកកាន់ភូមិក្រាំងស្វាយឃុំរលាំងគ្រើលនោះអាជ្ញាធរយើងខ្ញុំនឹងជូនទៅឲ្យដល់ផ្ទះដែលលោកយាយស្នាក់នៅតែម្ដង៕
ចែករំលែកព័តមាននេះ