ប្រទេសម៉ាឡេស៊ី ៖ ចិននៅតែរក្សាតំណែង ជាដៃគូពាណិជ្ជកម្មធំជាងគេបំផុតរបស់ម៉ាឡេស៊ី ក្នុងរយៈពេល៧ឆ្នាំជាប់ៗគ្នា បើទោះបីជាតម្លៃទំនិញប្រើប្រាស់បានធ្លាក់ថ្លៃខ្លាំងក្តី ។ នេះបើយោងតាមស្ថិតិជាតិបានចុះផ្សាយកន្លងមក ។
នៅឆ្នាំ២០១៥ ការធ្វើពាណិជ្ជកម្មរវាងចិននិងម៉ាឡេស៊ីបានកើនឡើង១១,១% ពោលគឺស្មើនឹង៥៥,៦៧ប៊ីលានដុល្លារ ។ នេះបើយោងតាមក្រសួងពាណិជ្ជកម្ម និងឧស្សាហកម្មអន្តរជាតិ ។
ចំពោះការនាំចេញពីប្រទេសម៉ាឡេស៊ីទៅកាន់ប្រទេសចិនបានកើនឡើង១០% ស្មើនឹង២៤,៤៨ប៊ីលានដុល្លារ ។ ទំនិញម៉ាឡេស៊ីដែលបាននាំចេញទៅកាន់ប្រទេសចិនរួមមាន ប្រេងឥន្ធនៈ ផលិតផលលោហៈធាតុ ឧបករណ៍អុបទិក និងវិទ្យាសាស្ត្រ បានបន្តកើនឡើងគួរឲ្យកត់សម្គាល់ ។ ចំណែកផលិតផលអេឡិចត្រូនិកមានអត្រា៤២,៦% នៃការនាំចេញសរុបពីម៉ាឡេស៊ីទៅចិន ។ រីឯទំនិញរ៉ែបានកើនឡើង៥៣,៦% នៅឆ្នាំ២០១៥ ។ ការកើនឡើងនេះ ដោយសារតែការនាំចេញមាស ពេជ្រ ត្បូង បានកើនឡើងខ្លាំង ។
ដូច្នេះហើយចិននៅតែរក្សាតំណែងជាអ្នកនាំចូលផលិតផលម៉ាឡេស៊ីធំជាងគេបំផុតក្នុងអត្រា១៨,៩% នៃការនាំចេញសរុប និងកើនឡើង១២% ក្នុងទឹកប្រាក់ប្រមាណ៣១,១៩ប៊ីលានដុល្លារនៃការនាំចេញផលិតផលសម្លៀកបំពាក់ គ្រឿងម៉ាស៊ីន សម្ភារប្រើប្រាស់ និងឧបករណ៍ដឹកជញ្ជូនច្រើនជាងគេនៅឆ្នាំ២០១៥ ។
គួរបញ្ជាក់ដែរថា ចិនបានក្លាយជាដៃគូពាណិជ្ជកម្មធំជាងគេរបស់ម៉ាឡេស៊ីចាប់តាំងពីឆ្នាំ២០០៩ មកម្ល៉េះ ។ មិនតែប៉ុណ្ណោះ ម៉ាឡេស៊ីបានក្លាយជាដៃគូពាណិជ្ជកម្មធំជាងគេក្នុងចំណោមបណ្តាប្រទេសជាសមាជិកអាស៊ាន ។
សរុបមក ពាណិជ្ជកម្មម៉ាឡេស៊ីបានកើនឡើង១,២% ពោលគឺស្មើនឹង៣៥៣ប៊ីលានដុល្លារនៅឆ្នាំ២០១៥ បើធៀបនឹងឆ្នាំមុនមានត្រឹមតែ៣៤៩ប៊ីលានដុល្លារប៉ុណ្ណោះ ។ ការកើនឡើងនេះ គឺបណ្តាលមកពីការរើបឡើងវិញនៃសេដ្ឋកិច្ចម៉ាឡេស៊ី នាពាក់កណ្តាលឆមាសឆ្នាំ២០១៥ ។ ម៉ាឡេស៊ីមានទំនាក់ទំនងពាណិជ្ជកម្មខ្ពស់ជាមួយបណ្តាប្រទេសជាដៃគូដូចជា ចិន បណ្តាប្រទេសអាស៊ាន សហរដ្ឋអាមេរិក និងសហគមន៍អឺរ៉ុប ។
ដោយឡែក ការនាំចេញបានកើនឡើង ១,៩% ទោះបីជាបរិយាកាសសេដ្ឋកិច្ចហាក់ មានសភាពអាប់អួក្តី ដែលមានទឹកប្រាក់សរុប ១៨៨,០៤ប៊ីលានដុល្លារ ។ រីឯការនាំចេញនៅឆមាសទីពីរនាឆ្នាំ២០១៥ បានធ្លាក់ចុះខ្សោយ ប៉ុន្តែវាបានកើនឡើងខ្លាំងវិញក្នុងអត្រា៦,៨% នារយៈពេល៦ខែដំបូង ។
ការនាំចេញនូវទំនិញប្រើប្រាស់ចម្បងដូចជា ប្រេងដូង កៅស៊ូធម្មជាតិ និងឧស្ម័នធម្មជាតិ បានធ្លាក់ចុះយ៉ាងគំហុក ។ ការនាំចេញប្រេងដូងបានធ្លាក់ចុះ៦,២% ខណៈដែលកៅស៊ូធម្មជាតិធ្លាក់ចុះ១១,៩% ។ រីឯប្រេងឥន្ធនៈបានធ្លាក់ចុះ២០,៣% ចំណែកឧស្ម័នធម្មជាតិបានធ្លាក់ចុះរហូតដល់២៦,២% ។
ទោះជាយ៉ាងណា ការនាំចូលសរុបបានកើនឡើង០,៤% ពោលគឺស្មើនឹងទឹកប្រាក់ចំនួន១៦៥,៣ប៊ីលានដុល្លារអាមេរិក ។ ចំណែកការនាំចេញនៅឆ្នាំ២០១៥ មានកំណើនលឿន ។
គួរកត់សម្គាល់ថា ការធ្វើពាណិជ្ជកម្មមានអត្រា១៤,៣% និងមានផលលើស២២,៧៣ប៊ីលានដុល្លារ ដែលធ្វើឲ្យការធ្វើពាណិជ្ជកម្មរបស់ម៉ាឡេស៊ីមានផលលើសក្នុងរយៈពេល១៨ឆ្នាំជាប់ៗគ្នាតែម្តង ៕
ចែករំលែកព័តមាននេះ