រាជធានីភ្នំពេញ ៖ ស្របពេលវិស័យខុនដូ នៅប្រទេសកម្ពុជាកំពុងមានការរីកចម្រើន ប្រជាពលរដ្ឋខ្មែរមួយចំនួនធំហាក់នៅមិនទាន់យល់ និងផ្លាស់ប្តូរឥរិយាបថមករស់នៅក្នុងខុនដូនៅឡើយទេ តែទោះជាយ៉ាងណា ក៏មានសិល្បករខ្មែរល្បីៗមួយចំនួនបានចាប់អារម្មណ៍ និងងាកមករកការរស់នៅបែបទំនើប ស៊ីវិល័យតាមបែបប្រទេសជឿនលឿន ខណៈកាលពីពេលកន្លងមក សិល្បករខ្មែរភាគច្រើនចូលចិត្តរស់នៅផ្ទះល្វែង ឬវីឡា ។
ពិធីការិនីល្បីឈ្មោះមួយរូប និងជាពិធីការិនីប្រចាំស្ថានីយទូរទស្សន៍ MyTV អ្នកនាង ខៀវ សានសាណា បានចាប់អារម្មណ៍លើគម្រោងខុនដូមួយនៅប្រទេសកម្ពុជា គឺគម្រោងខុនដូ D’seaview ហើយក៏បានទិញគម្រោងនេះសម្រាប់ការស្នាក់នៅផងដែរ ។
អ្នកនាង ខៀវ សានសាណា ឱ្យដឹងថា៖ « ខ្ញុំបានទិញគម្រោងខុនដូ D’seaview ដែលស្ថិតនៅខេត្តព្រះសីហនុ កាលពីខែមុននេះ (ខែមករា) ដោយសារតែគម្រោងនេះស្ថិតនៅតំបន់មាត់សមុទ្រដ៏ស្រស់ស្អាតរបស់កម្ពុជា និងជាកន្លែងសម្រាកលំហែកាយដ៏អស្ចារ្យបន្ទាប់ពីការងារ ។ អ្វីដែលធ្វើឱ្យខ្ញុំចាប់អារម្មណ៍លើគម្រោងខុនដូ D’seaview នេះ ដោយសារតែគម្រោងនេះសាងសង់ឡើងនៅក្បែរឆ្នេរសមុទ្រ ដែលនាងខ្ញុំ និងក្រុមគ្រួសារអាចទៅសម្រាកលំហែកាយ និងគយគន់ទេសភាពដ៏ស្រស់ត្រកាលនៃឆ្នេរសមុទ្រកម្ពុជាបានយ៉ាងងាយស្រួល ។ ម្យ៉ាងវិញទៀត នៅដែលខ្ញុំមានខុនដូផ្ទាល់ខ្លួននៅតំបន់ទេសចរណ៍មួយនេះ ខ្ញុំមិនចាំបាច់ខ្វល់ខ្វាយពីរឿងរកសណ្ឋាគារស្នាក់នៅរាល់ពេលដែលខ្ញុំមកទស្សនា ឬមានកម្មវិធីនៅខេត្តព្រះសីហនុនោះទេ » ។
អ្នកនាងបន្តថា ៖ « ការមានខុនដូផ្ទាល់ខ្លួន ក៏ជារឿងមួយល្អសម្រាប់ការធ្វើវិនិយោគផងដែរ។ ក្រៅពីការស្នាក់នៅផ្ទាល់ខ្លួន ក៏អាចជួលឱ្យភ្ញៀវទេសចរជាតិ និងអន្តរជាតិ ដែលមកស្នាក់នៅក្នុងខេត្តព្រះសីហនុថែមទៀត ។ ម្យ៉ាងទៀត ប្រទេសជាសមាជិកសមាគមសេដ្ឋកិច្ច ASEAN បានធ្វើសមាហរណកម្មជាមួយគ្នាហើយ ។ ដូចនេះ នឹងមានជនបរទេសមកស្នាក់នៅ និងធ្វើការនៅទីនោះច្រើន ដែលជាឱកាសល្អមួយសម្រាប់វិនិយោគទៅលើគម្រោងខុនដូនេះ » ។
ចំណែកកញ្ញា មាស សុខសោភា ជាតារាចម្រៀងដ៏ល្បីប្រចាំព្រះរាជាណាចក្រកម្ពុជា ក៏បានចាប់អារម្មណ៍ និងទិញគម្រោងខុនដូមួយនៅក្នុងប្រទេសកម្ពុជាផងដែរ គឺគម្រោងខុនដូ កាសាមេរីឌាន ដែលជាគម្រោងខូនដូស្ថិតនៅ ទីក្រុងកោះពេជ្រ រាជធានីភ្នំពេញ ។
កញ្ញាឱ្យដឹងថា ៖ « មូលហេតុដែលធ្វើឱ្យខ្ញុំជ្រើសរើសយកការស្នាក់នៅក្នុងខុនដូនេះ ដោយសារតែវាមានលក្ខណៈងាយស្រួលស្ងប់ស្ងាត់ អាចសម្រាកបានស្រួលបន្ទាប់ពីការងារច្រៀង ឬសម្ដែង ។ ការស្នាក់នៅក្នុងខុនដូ ធ្វើឱ្យខ្ញុំអាចសម្រាកបានស្ងប់ ពីព្រោះនៅខុនដូស្ងប់ស្ងាត់ អាចហាត់ច្រៀង និងមានទេសភាពល្អ ជាពិសេស សុវត្ថិភាពក្នុងការរស់នៅ ដោយមានសន្តិសុខ២៤ម៉ោង ។ ទោះបីជាខ្ញុំចេញទៅថតនៅខេត្តឆ្ងាយៗ ក៏ខ្ញុំនៅតែមានទំនុកចិត្តពីសុវត្ថិភាពទ្រព្យសម្បត្តិនៅក្នុងផ្ទះដែរ ។ ម្យ៉ាងទៀត ពេលដែលខ្ញុំចង់ហាត់ប្រាណ គឺមានកន្លែងហាត់ប្រាណនៅជិតកន្លែងស្នាក់នៅស្រាប់ បើចង់ទៅផ្សារដើរកម្សាន្ត ឬទិញអីវ៉ាន់ ក៏មានស្រាប់ » ។
គួរបញ្ជាក់ដែរថា ក្រៅពីសិល្បករខ្មែរល្បីៗដែលចាប់អារម្មណ៍ស្នាក់នៅក្នុងខុនដូ ប្រជាពលរដ្ឋកម្ពុជាមួយចំនួនក៏បានផ្លាស់ប្តូរ និងងាកមកស្នាក់នៅក្នុងខុនដូដែរ ដោយសារតែខុនដូមួយចំនួនសាងសង់ឡើងនៅជិតកន្លែងការងារ ផ្សារទំនើប កន្លែងកម្សាន្ត និងជាកន្លែងដែលមានសុវត្ថិភាពខ្ពស់សម្រាប់អ្នកស្នាក់នៅទីនោះ។ ម្យ៉ាងទៀត ផ្ទះល្វែង និងវីឡាមួយចំនួនដែលសាងសង់នៅតំបន់ជាយក្រុង ដែលត្រូវចំណាយពេលវេលា និងថវិកាជាច្រើនក្នុងការធ្វើដំណើរមកកាន់កន្លែងការងារ ឬមកកាន់ទីក្រុង ៕
ចែករំលែកព័តមាននេះ